Manwin ma ma nlédés hémle

Mbôgi Yéhôva i ntôñ lôkisañ i bôlôm ni i bôda. (1 Pétrô 2:17) Ngandak ikété yés i nôgda kiki Tannis, sita yada i loñ Kénya i i nkal le: “Me ngwés me nok manwin ma lôk kéé i bôlôm ni i bôda i nkoñ ’isi wonsôna.” Lelaa Tannis ni didun di lôk kéé i nla yi kii i mpémél lôk kéé yap ipe? Ibôdôl i nwii 2013, di bi bôdôl ep manwin ma lôk kéé ni njel jw.org i Homa inyu manwin.

I homa nu a mpôdôl mintén mi mam mi mpémél Mbôgi Yéhôva kiki bo mapam ma Bibel, mahôla ba nti bilôk bikéé bikuu bi nkwél, maoñ ma ntôñ ni mam mape. A nyis bés kii i mpémél bilôk bikéé bi ba nha i mok inyu hémle yap. I homa nu a mpôdôl ki miñañ mi mi ntina makénd mi lôk kéé i i nke i hônd likalô ni lelaa Mbigda i nyemb Yésu i ntagbe. Bonjee ba mboñ nyiña inyu tila i manwin ma? Lelaa ba ntila i manwin ma?

Imbe bôlô i nséla ilole ba mpémés manwin?

Man juu nu a mpémés minlegla nu ba nsébél ni hop Pulasi le service des relations publiques (SRP) nyen a nkot manwin momasôna inyu pémés mo i jw.org i Homa inyu manwin. I man juu nu a yéne i Hikuu hikeñi, a nsal ni juu li bakot li Juu li bakena ntôñ. I man juu nu, a nsal ni iloo 100 lôk kéé (ngandak ikété yap i nsal i bak i mandap map.) Mukété yap, bahogi ba yé batila manwin, bape ba mboñ nyiña, bape ba ñôt bititii ni njel ordinater, bape ki ba yé bakobol. Lôk kéé ipe mu i nsal ni bangomin, ni balét ba bisuklu bikeñi yak ni batjam manwin. I dikuu di biloñ di nkoñ ’isi, iloo 80 ma dikip (BRP) di nhôla man juu nu a mpémés minlegla.

Inyu kôôba ngim ño nkwel, SRP (service des relations publiques) i nsal ni BRP (bureau des relations publiques). I ngéda ba nléba ngim nwin i i nla lémél bôt, lôk kéé i mboñ nyiña inyu wan mam momasôna ma mbéñge ñañ u. Ba nla bat bôt mambadga, ba kwel ki ni bayimam. I ngéda ba mal, ba ntila ñañ u, ba tiimba añ wo, ba kodol wo, i mbus ba ha bifôtô, ba éble wo juu li bakot li Juu li bakena ntôñ inyu boñ li ti kunde le u mpam.

Bibuk inyu ti mayéga

Kii lôk kéé i nhoñol inyu manwin ma mpam i jw.org? Cheryl, sita i i yé i loñ Filipin a nkal le: “Hiki kel, me mbôk ndugi me añ manwin ma mpam i jw.org.”

Ngandak bôt i nyimbe le manwin ma mpam i jw.org ma mpôôna bé mana manwin mape. Tatiana, nu a yé i loñ Kasakstañ a nkal le: “Me ngwés manwin ma jw.org inyule ma yé maliga.” I loñ Meksika, sita yada le Alma a nkal le: “Maselna ni manwin ma mpam munu bakégikel, manwin ma jw.org ma ntina makénd.”

I homa manwin nunu a mpémés ndik bé manwin ma ma yé maliga, ndi a nhôla ki bôt i lédés hémle yap. Bernard nu a yé i loñ Kénya a ntoñol le: “Homa inyu manwin a nhôla me i tehe le lôk kéé i bôlôm ni i bôda i nkoñ ’isi wonsôna i yé lihaa jem, to ibale ba yiine numbe homa. Ikété masoohe, me nla sima môl map ni i mam ma mpémél bo.” Sita yada le Bybron nu yak nye a yé i loñ Kénya, a nkal le: “Me yé maséé hiki ngéda nwin u mpam le ba mpémés Bibel ikété ngim hilémb! Hala a ñéba me le Yéhôva a ntodol bé bôt.”

Yak manwin ma ma mpôdôl ndééñga lôk kéé i nkôs ma ntina makénd. Jackline nu a yé i loñ Kénya a nkal le: “I ôt pék mu ñem ngui lôk kéé i gwé i nhôla me i bana makénd.” A nkal ki le: “Me mboñ biliya i yimbe kii i nhôla bo i téñbe.” Me bi nigil le mam kiki bo masoohe, lisoñgol li Bibel ni i tôp tjémbi ma yé nseñ inyu lédés hémle yés.

Beatriz sita yada i Kôsta Rika a ngwés manwin ma ma mpôdôl bikuu. A nkal le: “Homa inyu manwin a nhôla me i tehe le ntôñ wés u mpala lona lôk kéé i bikuu bi nkwél mahôla. I nti bo i mam ma mbéda bo, u mboñ ki hala ni gwéha. Hala a nkwés me nkaa le ntôñ unu, u yé toi ntôñ u Yéhôva.”

Kinje maséé i kôhna manwin ma ntip pam ikété lihaa jés li bikristen! Hala a nla ndik bôña ni njel makébla ni nti inyu nson u ñañ nlam i nkoñ ’isi wonsôna. Ngandak makébla mu i mbôña ni njel donate.jw.org. Di nti bé mayéga inyu makébla manan.