Kaat i yigil i Bibel i i yé maselna ngandak ni bini bikaat bipe

I sôñ Kondoñ 2021, Juu li bakena ntôñ li bi legel mapam ma kaat i mondo inyu yigil i Bibel i i gwé jôl le Niñ ilam i boga ni boga!a Kii u bi nôgda i ngéda ba bi legel nwin u? Matéô nu a yé i Kanada a nkal le: “Me bé maséé kiyaga! Maséé mem ma bi kônde keñep kiki me bé emble minkwel, me béñgege vidéô i i bé toñol inyuki ba bi pémés i kaat i, ni imbe bôlô i bi séla inyu pémés yo. Me bé bem i kaat i ni maséé.”

Niñ ilam i boga ni boga! i nlémés likeñge jés inyu niiga bôt Bibel. I yé maselna ni bini bikaat bipe di bé gwélél inyu niiga bôt Bibel. Inyu tibil yimbe mahéñha ma, di béñge lelaa ba bi boñ yo.

Kaat mondo i i yé mahéñha

Pépa yé i nyét. Inyuki i bé sômbla i ntén pépa u? I kaat i, i gwé 600 i bititii i i gwé ngandak minsonol, hala wee jôm li ngélé iloo i kaat ini le Niiga! Mukété, a gwé ngim bahoma i het mut a nla tila. Ibale ba boñ bé i kaat i hala, ki bititii bi nene ii pes i lipep. Inyu boñ le hala a bôña bañ, lôk kéé i i nsal i service international de l’impression (IPD), i Wallkill, i Amérika i bi noode sal i mintén mi mapep ma-na. Juu li matila li Juu li bakena ntôñ li bi pohol lipep li li bé li ñéba bé bititii ii pes. To ibale i pépa i, i nlôôha hee diye iloo bipépa di bé gwélél inyu tila bini bikaat gwés bipe, hala a nhôla nnigil Bibel i tibil añ hiki lipep ibabé le bititii bi bi yé ii pes ipe bi tééñga nye.

Kôgôp i mondo. Kôgôp i kaat yés i mondo i ta bé kiki bini bikaat bipe, inyule ilole kôgôp yé i bai kiki bini bikaat bipe, i gwé plastik i i mboñ le titii i i yé i lipep li bisu i tibil nene, ni ki le kaat i pala bañ un. I yé maliga le i kônde plastik mu kaat i nla hee diye, jon ngandak dikuu di biloñ di bi sal ntôñ inyu boñ le i bôlô yosôna i hee bañ diye.

Ndi inyuki ba bi pohol i gwélél gwom bi bi nhee diye hala? Mankéé wada nu a nsal i IPD a ntoñol le: “Kiki di nyi le i kaat ini i ga gwéélana ntandaa ngéda, jon di mboñ yo loñge ngandak inyu boñ le i pala bañ ôbi.” Eduardo, mankéé wada nu a nsal i homa ba mpémés bikaat i Brésil a nkal le: “Di yé maséé ngandak le ntôñ u Yéhôva u ngwélél biloñge bi bisélél inyu pémés i kaat yés mondo ini, y’a nom, i ntomb ki i gwélél. Ba ntibil ki gwélél makébla.”

I bôlô i bi séla inyu pémés yo i ngéda COVID-19

Ba bi bôdôl pémés ini le Niñ ilam i boga ni boga! i sôñ Matumb 2021, himala hi ma tip bôdôl. Hala a bé ndutu ngandak inyule dikuu di biloñ di bé lama yip manwemel, yak i homa ba mpémhene bikaat a bééna ha bé mahôla ma lôk kéé i i bé lôl i mbédgé. Ba bé bé ki to le ba naña lôk kéé i mondo inyu lo sal i Bétel. Inyu hala nyen bahoma i het ba mpémés bikaat ba bééna bé bôt inyu ti mahôla. Jon ngim bahoma i het ba mpémés bikaat ipe i bi yip inyu nôgôl mbén i ngomin.

Lelaa ba bé le ba yémbél mandutu ma? I ngéda ba bi témb ba yibil bahoma i het ba mpémés bikaat, lôk kéé i i bé sal i bahoma bape i bé i lo i ti mahôla i homa ba mpémés bikaat. Mankéé Joel nu a nsal i IPD.a nkal le: “Kiki lôk kéé i bé bebee i nigil makeñge ma mondo, ni i ti mahôla, hala a bi boñ i bôlô i i pala séla,”

To hala kiki di bi boma mandutu ma momasôna, di ma pémés iloo didun di didun, di kaat ini le Niñ ilam i boga ni boga! Inyu pémés i kaat i ngandak hala, i mbéda bisélél kiki bo bikei bi bi mpémés bikaat, biplastik, tiñti, ni kol. I bôlô i bi séla i sôñ itan i bisu, i bi béda iloo $2.3 million (U.S.) Inyu boñ le di pémés bañ ngandak moni, di bi pémés ndik bikaat makoda ma bééna toi ngôñ.

“Kaat i i nlôôha ba ilam”

Kii banigil Bibel ni i bet ba niiga Bibel ba nhoñol inyu kaat ini? Paul, mankéé nu a yé i Ôtralia, a nkal le: “I kaat ini le Niñ ilam i boga ni boga! i nlôôha ba ilam kayéle me mbem hiki ngéda inyu tégbaha gwigil bi Bibel mu. I ntoñol mam loñge, i nhôla i kwel ni mut we ni nye ni nigil. I gwé biniigana bi bi ntomb, bititii, bividéô, bititii bi minkoñ ni njômbi nnigil Bibel a nlama yônôs. I kaat i, i nti me makénd i kônde hôlôs likeñge jem i niiga.”

Nnigil wada nu a niñ i Amérika a nkal le: “Me ngwés i kaat ini ngandak. Bititii bi nhôla me i tibil nok balôm ba matode. Bividéô bi ntihba me kayéle bi ntinde me i bii i mam me nigil i bisélél.” I nnigil Bibel nunu a nigil ngélé iba hiki sonde, a nke ki makoda hiki sonde.

Di nlama ki pémés didun di didun di bikaat bipe ikété ngandak dilémb. Juu li bakena ntôñ li ma neebe le kaat ini i pam ikété 710 dilémb, hala wee 340 ma ngélé iloo kiki di bi pémés i kaat ini le Niiga!

Hee moni mi nlôl inyu pémés i kaat ini? Moni mi nlôl ni njel makébla ma di nti ni njel donate.jw.org. Di nti bé mayéga inyu lem nan likap i i nhôla bés i pémés i nya bikaat ini i i nhôla bôt i tibil yi Yéhôva​—Tjémbi 22:26.