BEBEE LE ikété hiki litén ni hiki base, bôt ba nsoohe. Ba nsoohe i ngéda ba yé botama, ni ngéda ba yé ntôñ ni bôt bape. Ba nsoohe i ngéda ba yé i ndap base, i témpel, i ndap mitin, i base bausa, ni bahoma bape. Ba nla soohe ni nyo, ni nsañ mbasa, ni ngim ôñgba i i yé ngiiña i ba nkép, ni bititii, ni bikaat bi masoohe, ba nla gwélél masoohe ba ntila ba péñg mabam.

Masoohe ma ñunda le bôt i nkoñ ’isi ba yé mahéñha. I yé maliga le bôt ba binam ni binuga ba mpôna i ngim bahoma. Kiki binuga, bôt ba binam ba gwé ngôñ ni bijek, ni mbebi, ni malép. Ba gwéé, ba niñ, i mbus ba wo. (Ñañal 3:19) Ndi ndik bôt ba binam bon ba nsoohe. Inyuki?

Ndimbhe i sem kwep i yé le di yé di bana ngôñ i soohe. Bôt ba mbéna hoñol le i ngéda mut a nsoohe wee a gwé maada ni mam ma mbuu, tole mam ma pubi, ni ma ma yé i boga. Bibel i ñunda le di bi gwééna ngôñ i. (Ñañal 3:11) Yésu Kristô a kal kel yada le: “Maséé ni bôt ba nyi le mam ma mbuu ma yé bo nseñ.”—Matéô 5:3.

“Mam ma mbuu”—kii di nla kal inyu mandap makeñi ma bibase ni bisat gwap, i ngéda yosôna bôt ba ntégbaha masoohe? Bôt bahogi ba mbot ñem le bisat bi tole ngim bôt ba binam bon ba nla yônôs ngôñ yap i mam ma mbuu. Ndi baa ni ntehe bé le bôt ba binam ba boñ hala? Di gwé bé ngap, niñ yés i yé kidik, yak litehge jés li mam li yôni bé. Ndi mut wada nu a gwé pék ikeñi a bak a gwé ngui iloo bôt bobasôna a bak nu bôga nyen a nla yônôs ngôñ yés i pes i mbuu. Di nsoohe ni inyu mambe mam ma mbuu?

Ni hégda le: Baa ni gwé ngim bitelbene ni nsômbôl noñ, pék tole ngim mandimbhe bôt ba binam ba nok bé? Baa ni ma bana ngôñ le ba lédés bé i mbus le ni nimis ngim yom, le ba unda bé i yom ni boñ i mbus le ni yoñ ngim makidik tole ba nwéhél bé i mbus le ni mboñ ngim jam libe?

Inoñnaga ni Bitilna, inyu i nya mam i yon di nlama soohe. Bibel i nti biniigana bilam inyu i nya mam i, i gwé masoohe malam ma bagwélél ba Yéhôva, bôda kiki bôlôm. Ba bi soohe inyu boñ le ba kôhna ngui, ba éga bo, ba kôs nwéhél inyu mam ba mboñ ni le ba kôs ndimbhe i ngim mambadga ba nok bé.—Tjémbi 23:3; 71:21; Daniel 9:4, 5, 19; Habakuk 1:3.

Masoohe ma, ma bé mintén ndi mintén, ndi mape mu ma bé pôna. Hiki mut nu a bi soohe mu, a bééna hiliba hi tôbôtôbô inyu masoohe mé, hilba hi, hi nimil, tole a nyôi hio i len ini. Ba nyi njeeba nlama soohe.

BAA masoohe momasôna ma nke yak Djob , to ibale di ngwélél to limbe jôl inyu sébél nye i ngéda di nsoohe? Hala nyen ngandak bôt i nhoñol i len ini. Mahoñol map ma yé le base wee base, bibase gwobisôna bi yé loñge, to ibale biniigana ni maboñok bi ta bé nlélém. Ndi baa mahoñol ma ma téé?

Bibel i ñunda le libim li masoohe bôt ba mboñ len ma nke bé i het ba nhoñol. I ngéda ba bé tila Bibel, bôt ba bé béna soohe bisat. Jon, Nyambe a béhe litén jé ngandak ngélé le ba keñgle liboñok li. Kiki hihéga, kaat Tjémbi 115:4-6 i nkal inyu bisat le: “Bi gwé maôô, ndi bi noga bé.” Umbe nseñ di gwé i soohe ngim djob i i noga bé?

Ñañ u Bibel wada u ntibil nôgha bés i jam li. Éliya nu a bé bañga mpôdôl Yéhôva a bi naña bapôdôl ba Baal, le ba loo ba soohe djob jap, mbus yak nye a’ soohe Djob jé. Éliya a kal le i mbus masoohe, ba ga tehe njee a yé bañga Djob, nyen a ga timbhe, ki le djob li bitembee li nla bé boñ jam. Bapôdôl ba Baal ba bi neebe nsébla, ba soohe letee, ba soohege ba eek ni kiñ keñi, ndi to yom! Ñañ u nsugus le: “Kiñ to ndimbhe bi nôga bé, to yimbne jam.” (1 Bikiñe 18:29) Mam ma bi bôña lelaa i pes i Éliya?

I ngéda Éliya a bi mal soohe, Djob a bi timbhe kunda yada, a om hié, hi lôlak i ngii, hi ligis i sesema Éliya a bii i ngii juu li bisesema. Kii i bé njom i maselna ma? Masoohe ma Éliya ma di nléba i kaat 1 Bikiñe 18:36, 37 i nyelel jam jada. Masoohe ma ma bé sem kwep ngandak, ma gwé ndik jam kiki bo 30 ma bibuk ni hop u Lôk Héber. Mu masoohe ma, Éliya a bi sébél Djob le Yéhôva.

Baal a bé djob jada bon ba Kanaan ba bé bégés, jôl jé li nkobla le “nwet” tole “malét.” Ndi mut wada ndigi nyen ba nsébél le Yéhôva ikété ngiinda yosôna. Djob li gwé i jôl li li bi kal litén jé le: “Men me yé Yéhôva. Lini jon li yé jôl jem; ndi me ntjak bé me lipém jem ni lôôs jo i moo ma mut mbe.”—Yésaya 42:8.

Baa masoohe ma Éliya ni ma bapôdôl ba Baal ma bi ke homa wada? Bibégés bi Baal bi bé nyonok ni ndéñg, bi tin-ge bôt i ti bôt ba binam kiki sesema. Maselna ni hala, i bégés Yéhôva i bi hôla bon ba Israel i bana niñ ilam, bibégés ba bé ti nye bi bi hôla bo i tjôô maboñok mabe ba bééna kôba. Hégda le i jam lini: Ibale u ngwés ômle liwanda joñ li bôt ba nti lipém kaat, baa u ga ti yo mut nu a nyi bé to jôl li liwanda joñ, ni nu maboñok mabe ma nlôôha ba maselna ni ma liwanda joñ? Heni!

Ibale u nsoohe Yéhôva, wee u nsoohe Nhek nyemede, Isañ bôt ba binam.a Mpôdôl Yésaya a kal ikété masoohe mé le: “Ndi, A Yéhôva, wen u yé bés Tata.” (Yésaya 63:16) Nlélém Tata nyen Yésu Kristô a bé pôdôl i ngéda a kal banigil bé le: “Me yé bet yak Tata wem ni Isoñ nan, yak Nyambe wem ni Nyambe nan.” (Yôhanes 20:17) Yéhôva a yé Isañ Yésu. I Djob li jon Yésu a bé soohe, jon Yésu a bi niiga banigil bé le ba soohe.—Matéô 6:9.

Baa Bibel i niiga le di nla soohe Yésu, Maria, bapubhaga, tole biañgel? To, ndik Yéhôva nyetama. Di tehe inyuki. Pog, mu ikété bibégés di nti Djob, masoohe ma yé mu, ndi Bibel i nkal le di nlama ndik bégés Yéhôva. (Manyodi 20:5) Iba, Bibel i yé i nsébél nye le: “A we nu u ñemble masoohe.” (Tjémbi 65:3) Tolakii Yéhôva a ngwés a nti bôt bape minson, a nti bé mut numpe nye ki nye mbegee i emble masoohe. A nyis bés le a yé Nyambe nu a ñemble masoohe.

Jon ibale u ngwés le Nyambe a emble we, u nlama bé hôya i yom Bibel i nkal: “Hiki mut a nlôndôl jôl li Yéhôva a’ kôhna tohi.” (Minson mi baôma 2:21) Ndi baa Yéhôva a ñemble masoohe momasôna to kii leñek? Tole baa jam lipe li yé le di nlama yi ibale di ngwés le a emble masoohe més?

NGÉDA Ngandak bibase i niiga le i ngéda di nsoohe hala a nlama nene i mis, kiki bo litelbak jés, lipodok jés ni mam mape di mbéna boñ. Ndi Bibel i ñéba le i mam ma bé mon ma yéne bés nseñ, di nlama tibil wan inyu yi “Lelaa di nlama soohe.”

Bibel i ñéba le ngim bagwélél ba Nyambe i bi soohe ngandak bahoma, litelbak jap tole liyénak jap li bé nlélém. Ba bé ba nsoohe ni kiñ si tole makeñi kiki pôla i bé tina bo. Ba bé ba nsoohe ba nunuk ngii, ndi mangéda mape ba bé ba ue masu ’isi. Iloole ba kahal gwélél gwom kiki bo bititii, minsañ tole bikaat bi masoohe, ba bé kal Nyambe kii yosôna i yé bo ñem. Kii i bé boñ le Nyambe a emble masoohe map?

Kiki di ntehe mu ño nkwel u ntagbe, ndik Yéhôva Nyambe nyetama nyen ba nlama soohe. Ndi jam lipe li yé ki nseñ. Kaat 1 Yôhanes 5:14 i nkal le: “Ndi i botñem ini yon di gwé inyu yé, le to kinje jam di mbat inoñnaga ni sômbôl yé, a ñemble bés.” Masoohe més ma nlama kiha ni sômbôl i Djob. Kii hala a nkobla?

Inyu boñ le masoohe més ma kiha ni sômbôl i Djob, di nlama ndugi yi kii i yé sômbôl i Djob. Yigil i Bibel i nhôla bés i soohe. Baa hala a nsômbôl kal le Djob a ga tjél emble masoohe més inyule di ta bé batoñol Bibel? To, Djob a nsômbôl le di yi kii i yé sômbôl yé, di nok yo, di boñ ki yo. (Matéô 7:21-23) Masoohe més ma nlama kiha ni i yom di nigil.

Kiki di nke ni bisu i yi kii i yé sômbôl i Djob, di boñok ki yo, hala nyen hémle yés i nlet, hala ki nyen di nke ni bisu i soohe. Yésu a kal le: “Mam momasôna ni mbat ikété masoohe, ni ban-ga hémle, n’a kôhna mo.” (Matéô 21:22) Hémle i ta bé i neebe jam ibabé wan. I yé i ba nkwoog nkaa ni ngim jam to i nene bé i mis. (Lôk Héber 11:1) Bibel i yé nyonok ni biniigana bi bi ñunda le Yéhôva a yé toi, a yé mut nu di nla bôdôl ñem to ibale di ntehe bé nye ni mis, a yé ki bebee i emble masoohe ma ba bobasôna ba nhémle nye. Di nla ki ke ni bisu i yemhe nye le a kônde lédés hémle yés, inyule Yéhôva a yé bebee i ti bés i yom yosôna di gwé ngôñ.—Lukas 17:5; Yakôbô 1:17.

Likeñge lipe lini inyu yi lelaa di soohe. Yésu a kal le: “Mut to wada a nlo bé yak Tata handugi ni njel yem.” (Yôhanes 14:6) Yésu a yé njel di ntagbene inyu kôôge Tata wés Yéhôva bebee. Jon, a bi kal banigil bé le ba soohe i jôl jé. (Yôhanes 14:13; 15:16) Hala a nsômbôl bé kal le di nlama soohe Yésu. Ndi di nsoohe i jôl li Yésu, di yik le ni njel yé nyen di nla kôôge Tata wés nu pubi bebee.

Banigil ba Yésu ba bi kal nye kel yada le: “A Nwet, niiga bés lelaa ba nsoohe.” (Lukas 11:1) Maliga ma yé le, ba bé pôdôl bé inyu disii di mam di ntip pôdôl. Ba bé gwés yi kii ba nla pôdôl ikété masoohe: ‘Kii di nlama kal i ngéda di nsooe?’

MA YÉ masoohe bebee le bikristen gwobisôna bi nyi. Le hala a yé maliga tole bitembee, masoohe Yésu a bi niiga —ma ba mbéna nsébél le a Tata wés —ma yé masoohe bôt ba nok bé loñge. Didun di didun di bôt di mbéna gwélél masoohe ma hiki kel kiki bo hiémbi le mut ba nigil ni ñem. Ndi inyu hala bé nyen Yésu a bi niiga masooha ma. Lelaa di nyi hala?

Ilole Yésu a niiga masoohe ma, a kal le: “I ngéda ni nsoohe, ni tiimba bañ pot minlélém mi mam, tiimba ni tiimba.” (Matéô 6:7) Baa hala a ñunda le Yésu a bi pot jam a témb a pot lipe li li bé kolba i yom a bi bôk a pot? To jam! A bé niiga bés i yom di nlama kal Nyambe ikété masoohe, a bé ti dihéga di mam di nla kal i ngéda di nsoohe. Di tibil le wan bibuk bi Yésu bini. Bi yé i kaat Matéô 6: 9-13.

“A Tata wés nu a yé i ngii, jôl joñ li tééba lipubi.”

Yésu a bé hôñlaha banigil bé le Yéhôva Tata wé nyen ba nlama soohe. Baa ni nyi inyuki jôl li Djob li yé nseñ ni inyuki li nlama tééba lipubi tole ba nlama pubus jo?

I bibôdle, i ngéda Djob a hek mut binam, Satan a hoo jôl jé lipubi mahindi. Satan a bi kal le Yéhôva a ntembee ni le a yé béba Ñénél, a kôli bé bana kunde i ngii bihégél gwé. (Bibôdle 3:1-6) Ngandak i bi noñ nye, i niigaga le Djob a nok bé mandutu ma bôt ba binam, a yé Djob li li mpun jomede, a ta bé Nhek. Bape ba bi kahal kolba jôl li Djob kayéle ba héya i jôl jé lini le Yéhôva ikété ngim ngobol i Bibel, ba sôñga yak le bôt ba gwélél jo.

Bibel i niiga le Djob a ga kodol i ngitelepsép i. (Ézékiel 39:7) I ngéda a ga boñ hala, a ga yônôs ngôñ yés yosôna, a mélés yak mandutu més momasôna. Lelaa a ga boñ hala? Di nléba ndimbhe munu bibuk bini a bi kal masoohe mé.

“Ane yoñ i lo.”

I len ini, baéga bibase ba nti ngandak biniigana inyu Ane i Djob. Ndi kiki Yésu a bi kal, bapôdôl ba bi legel ibôdôl behee le Mésia, nu Djob a bi pohol a ga éga Ane i i ga héñha mam ma nkoñ ’isi momasôna. (Yésaya 9: 6, 7; Daniel 2:44) I Ane i, i ga pubus jôl li Djob, i yelel bitembee bi Satan, i tjé nye ni minson nwé nwominsôna. Ane i Djob i ga mélés gwét, makon ni njal, i ga mélés yak nyemb. (Tjémbi 46:10; 72:12-16; Yésaya 25:8; 33:24) I ngéda u nsoohe le Ane i Djob i loo, wee u yé i soohe le mimbônga mi nwominsôna mi yon.

“Sômbôl yoñ i bôña, kiki i ngii, yak hana ’isi.”

Bibañga bi Yésu bini bi ñunda le ibabé pééna, sômbôl i Djob i ga bôña hana ’isi nlélém kiki i bôña i ngii i het Djob nyemede a yé. Yom yo ki yo i bi nla bé kéñ le sômbôl i Djob i bôña i ngii; Yésu Man Djob a bi jôs Satan Nsohop ni biañgel gwé a leñ bo munu ’isi. (Masoola 12:9-12) I pes i nyônôs iaa i masoohe ma, kiki bini bipes biba bi bisu, i nhôla bés i bok mahoñol i jam li nlôôha ba nseñ, he bé i yom bés di nsômbôl, ndi i yom Djob a nsômbôl. Jon yak Yésu nu a bé peles a bi kal Isañ le: “Sômbôl yoñ yon i bôña, ha yem bé.”—Lukas 22:42.

“Ti bés koga yés len.”

I mbus, Yésu a bi unda le di nla ki soohe inyu mam di gwé ngôñ. I ta bé béba i soohe Djob inyu mam di gwé ngôñ inyu niñ i hiki kel. I ngéda di mboñ hala, di mbigda le Yéhôva nyen a “nti bôt bobasôna niñ, nhébék, ni gwom gwobisôna.” (Minson mi baôma 17:25) Bibel i ñunda le Yéhôva a yé Isañ nu a nkon maséé i ti bon bé i yom ba gwé ngôñ. Kiki loñge isañ mbai, a nti bé bés i mam ma tane bé bés nseñ.

“Nwéhél ki bés mapil més.”

Baa Djob a mbat bés pil? Baa di gwé ngôñ le a nwéhél? Ngandak bôt i len ini i nyi ha bé kii i yé béba, i yi bé to le béba i ta bé jam li njôha. Ndi Bibel i niiga le béba yon i nlona bés ndutu, yon i yé yom i bisu i i nlona bés nyemb. Bésbobasôna di bi gwééne ikété béba, jon di nhôs hiki ngéda, botñem yotama di gwé inyu bana bilôl bilam, i yé ndik le Djob a nwéhél bés bibéba gwés. (Rôma 3:23; 5:12; 6:23) Hala a nlédés bés i nok Bibel i nkal le: “U yé loñge, a Nwet [Yéhôva, MN], u nyégi ki i nwéhél.”—Tjémbi 86:5.

“Tohol bés i moo ma mut mbe.”

Baa ni ntehe ipam hee di gwé ngôñ le Djob a sôñ bés? Ngandak bôt i nkal le ngim yom ta bé le “mut mbe,” hala wee Satan a ta bé. Ndi Yésu a niiga le ntiik Satan a yé, a sébél nye le “ñane nkoñ ’isi unu.” (Yôhanes 12:31; 16:11) Satan a nyumus nkoñ ’isi, nyen a ñéga wo, a gwé ngôñ i yumus yak we inyu boñ le u waa gwélél Yéhôva Tata woñ. (1 Pétrô 5:8) Ndi Yéhôva a gwé ngui iloo Satan hium, a yé maséé i sôñ i bet ba gwés nye.

I yigil ini, i mpôdôl i sem kwep balôm ba matôde ba masoohe Yésu a niiga bés, i mpôdôl bé i mam momasôna di nla soohe. Di bigda le i yom 1 Yôhanes 5: 14 a nkal bés inyu Djob: “To kinje jam di mbat inoñnaga ni sômbôl yé, a ñemble bés.” Jon di hoñol bañ le i jam li ntééñga bés li nlôôha ba hisii le di gwé bé ngôñ i kal jo Djob. —1 Pétrô 5:7.

Nano, hee ni imbe ngéda di nlama soohe? Baa ngéda ni homa di nlama soohe bi yé nseñ?

BEBEK LE ni nyimbe le bibase bikeñi bi gwé mandap ma masoohe ni mangéda ma tôbôtôbô inyu soohe. Baa Bibel i nkal imbe ngéda ni hee homa di nlama soohe?

Bibel i nsima ngim mangéda di nlama soohe. Kiki hihéga, ilole a nje ni banigil bé, Yésu a bi ti Nyambe mayéga. (Lukas 22:17) I ngéda banigil ba Yésu ba bé kodba inyu bégés Nyambe, ba bé soohe. Nwii di nwii, bôt ba bi bana lem i soohe i mandap ma bibégés ni i témpel i Yérusalem. Sômbôl i Nyambe i bé le témpel i ba “ndap masoohe inyu matén momasôna.”—Markô 11:17.

I ngéda bagwélél ba Nyambe ba nkodba ntôñ inyu soohe, Nyambe a nla emble masoohe map. Ibale ba gwé hémle yada ni le masoohe map ma nkiha ni sômbôl i Nyambe, ma nlémél nye. Masoohe ma nla ki tinde Nyambe i ti mut i jam a sômblak bé ti nye. (Lôk Héber 13:18, 19) Mbôgi Yéhôva i gwé lem i soohe i makoda map. Di naña we i lo emble masoohe map i ndap Ane i i yé we bebee.

Ndi, Bibel i niiga bé le di nlama ndik soohe Nyambe i ngim bahoma ni i ngim mangéda ba tôbôtôbô. Bibel i mpôdôl ngim bagwélél ba Nyambe i i bé soohe nye to imbe ngéda ni to hee homa. Yésu a bi kal le: “Ibale u nsoohe, jôp ikété tuñ yoñ. I ngéda u mal kwés likôga joñ, soohe Isoñ nu u ntehe bé. Ha nyen, Isoñ nu a ntehe mam ma sôli a’ sayap we.”—Matéô 6:6.

Kinje loñge nsébla, hala bé? U nla kwel ni Ñane ngiinda yosôna i ngéda u yé wetama, u bak nkwoog nkaa le a ga emble we. Hala a nhélés bé bés le Yésu a bé yéñ i ba nyetama inyu soohe Nyambe! Lisañ jada, a bi tégbaha ngim u i masoohe, inyu boñ le Nyambe a hôla nye i yoñ makidik ma ngui.—Lukas 6:12, 13.

Bibel i mpôdôl bôlôm ni bôda ba ba bi soohe i ngéda ba bé boma mandutu tole i ngéda ba bé sômbôl yoñ makidik. Ngim mangéda, ba bé soohe ni kiñ ngii tole ikété ñem; ba bé soohe ni bôt bape tole i ngéda ba bé botama. I jam li yé nseñ li yé le ba bé soohe. Nyambe a nkal bagwélél bé le: “Soohana hiki ngéda.” (1 Tésalônika 5:17) Ibabé nwaa, a yé bebee i emble masoohe ma bôt ba mboñ sômbôl yé. Kinje loñge jam?

Maliga ma yé le, munu béba nkoñ ’isi ini, bôt ba mpééna le masoohe ma ngi gwé mahee. Bebek u badba le: ‘Baa masoohe ma yé nseñ?’

BAA Masoohe ma yé toi nseñ? Bibel i ñunda le ntiik, masoohe ma yéne bagwélél ba Djob nseñ. (Lukas 22:40; Yakôbô 5:13) Masoohe ma nla hôla bés i pes mbuu, i minsôn ni i mahoñol. Lelaa?

Hégda le man woñ a nkôs likébla. Baa u ga niiga nye le i kon maséé ni likébla li, hala a kôli? Tole w’a niiga nye i kal le me nyéga . I ngéda maboñok més ma nkiiha ni bibuk gwés, ha nyen ma gwé toi ngui. Baa hala a yé nlélém jam i ngéda di mpôdôs Yéhôva? Ntiik! Di béñge le dihéga dini.

I ti mayéga. I ngéda di nti Tata wés nu ngii mayéga inyu mam malam a mbôñol bés, di mbok mahoñol més mu bisai di nkôs. Hala a mboñ le di nkônde kon maséé, di nkônde ki ti mayéga.—Filipi 4:6.

Hihéga: Yésu a bé ti Isañ mayéga inyule a bé emble masoohe mé.—Yôhanes 11:41.

I bat nwéhél. I ngéda di mbat Djob nwéhél inyu bibéba gwés, di gwé kiññem i mpôp, di ntam bibéba gwés, di nkônde ki jo sañ le di kwo bañ i béba ikeñi. Hala a mboñ le kiññem i nkéés ha bé bés.

Hihéga: David a bi soohe inyu tam béba yé ni inyu bat Nwéhél.—Tjémbi 51.

Masoohe inyu kôs maéba ni pék. I ngéda di mbat Yéhôva le a éga bés tole a ti bés pék i i kôli inyu yoñ makidik malam, hala a nhôla bés i bana suhulnyuu. Hala a mbidaha bés le di gwé minwaa, a hôlga ki bés i ke ni bisu i bôdôl Tata wés Nungingii ñem.—Bingéngén 3:5, 6.

Hihéga: Salômô a bi bat Yéhôva maéba ni pék inyu éga litén li Israel.—1 Bikiñe 3:5-12.

I ngéda u gwé nduña: I ngéda di gwé nduña ikeñi, ndi di yiblene Yéhôva ñem, di nôgda hogbe, di mbôdôl ki nye ñem he ngui yés bésbomede bé.—Tjémbi 62:8.

Hihéga: Kiñe Asa a bi soohe Yéhôva i ngéda ñoo wé wada a bi kolba nye.

Masoohe inyu loñge i bôt bape. I nya masoohe i i nhôla bés i jôs lem i tôñ ndigi bésbomede ni i bana ñem ngôô ni konangoo.

Hihéga: Yésu a bi soohe inyu banigil bé.—Yôhanes 17:9-17.

Masoohe inyu bibégés: I ngéda di mbégés Yéhôva inyu mam malam a mboñ ni inyu bilem a gwé, di nkônde ti nye lipém ni mayéga. I nya masoohe i i nhôla ki bés i kôôge Djob jés ni Tata wés bebee.

Hihéga: David a bi bégés Yéhôva inyu mam a bi hek.—Tjémbi 8.

Bisai bipe masoohe ma nlona bi yé “nsañ Nyambe, u u nloo mam momasôna mut binam a nla nok.” (Filipi 4:7) I bana ñem nwee munu i hiai hibe hini i yé bisai bikeñi ngandak, yak i pes i minsôn. (Bingéngén 14:30) Ndi baa bisai bi di nkôs gwo ni biliya gwés bésbomede? Tole jam lipe li yé li li nlôôha nseñ?

I mbadga ini i ntinde bôt i yéñ ndimbhe. Bibel i niiga le Yéhôva a ñemble masoohe i len ini. Bés bon di nla boñ le Djob a emble masoohe més tole a emble bañ mo.

Yésu a bi yelel baéga bibase ba ngéda yé ba ba bé soohe inyu bihéñba; ba bé gwés unda i mis ma bôt le ba nkônôl bôt ngoo. A bi kal le i nya bôt i i ga kôhna “bibom gwap gwobisôna,” ba ga bana ndigi i yom ba gwé ngôñ, hala wee i nene i mis ma bôt ba binam he bé i yom i yéne bo nseñ, hala wee i nene loñge i mis ma Djob. (Matéô 6:5) Nlélém i len ini, ngandak bôt i nsoohe inoñnaga ni i yom i nkon bo ngôñ he bé inoñnaga ni sômbôl i Djob. Mu kiki ba nyan matiñ ma Bibel di mpôdôl, Djob a ñemble bé bo.

Kii we u nhoñol? Baa Yéhôva a ñemble masoohe moñ, a ntimbhe mo? Ndimbhe i masoohe ta bé inoñnaga ni kôkôô yés, ni loñ yés tole inyule di nyep tole di yé ngwañ. Bibel i nkal bés le: “Nyambe a ntodol bé mut, ndi ikété biloñ gwobisôna, i mut a nkon nye woñi, a boñok ki mam ma téé sép, nyen a nlémél nye.” (Minson mi baôma 10:34, 35) Bibañga bini bi mbéñge we? Ibale u nkon Djob woñi, hala a ñunda le u nti nye lipém, u nkon ki woñi i boñ mam ma ma nlémél bé nye. Ibale u noñ telepsép, u mboñ i yom i nlémél Djob he bé i yom i nlémél we, tole i i nlémél bôt ba binam. Baa u gwé toi ngôñ le Djob a emble masoohe moñ? Bibel i ñunda we lelaa u nla soohe Djob kayéle a emble we.a

Ngandak bôt i mbem le Djob a timbhe masoohe map i nya hélha. To i ngéda kôba, Djob a bé béna bé boñ mam ma hélha inyu timbhe masoohe ma bôt. I ngéda di mbéñge Bitilna, di ntehe le mbôgôl nwii tole iloo ha i bé le i tagbe ndi Djob a boñ jam li hélha. Bibel i ñunda ki le Djob a bi waa boñ mam ma hélha i dilo di baôma. (1 Korintô 13:8-10) Baa hala a nkobla le Djob a ntimbhe ha bé masoohe i len ini? To jam! Di béñge ngim masoohe a bi timbhe.

Djob a nti pék. Yéhôva a yé Liñgen li bañga pék. A nti yo hiki mut nu a gwé ngôñ i gwélél nye ni i noñ manjel mé.—Yakôbô 1:5.

Djob a nti bés mbuu mpubi ni bisai gwobisôna u nlona. Mbuu mpubi u yé ngui i Djob. Ngui ipe i nloo bé i. I nhôla bés i hônba mandutu. I nti bés nsañ i ngéda di gwé nduña. I nhôla ki bés i bana bilem bilam. (Galatia 5:22, 23) Yésu a bi kal banigil bé le Djob a nti ibabé i yahal.—Lukas 11:13.

Djob a nti i bôt bobasôna ba nyéñ nye ni ñem wap wonsôna yi. (Minson mi baôma 17:26, 27) Ikété nkoñ ’isi wonsôna bôt ba nyéñ maliga. Ba nyéñ yi Djob, jôl jé, bitééne gwé inyu nkoñ ’isi ni inyu bôt ba binam, ni lelaa ba nla kôôge nye bebee. (Yakôbô 4:8) Mbôgi Yéhôva i mbéna boma i nya bôt i, i nkon ki maséé i ti bo mandimbhe ma Bibel.

Baa inyu hala nyen u bi kôhna mbamble unu? Baa u nyéñ Djob? Bebek ni njel ini nyen Djob a yé i timbhe masoohe moñ.