Lelaa Yéhôva a nkwés bés nkaa le a ga yilha hisi paradis

1. Umbe nwin mpôdôl Yésaya a bi legel bon ba Israel bape?

INYU pôdôl Yéhôva, mpôdôl Yésaya a nsébél nye le “Nyambe nu maliga.” I buk ba ngwélél hana le “maliga” i nkobla le “amen.” (Yésaya 65:​16, buk isi lipep.) “Amen” hala wee “i ba hala,” tole “ntiik.” I ngéda i buk ini le “amen” i ngwéélana ikété Bibel inyu pôdôl Yéhôva tole Yésu, hala a yé inyu unda le ngim jam i yé maliga. Jon, i nwin Yésaya a bé leglak lôk kéé yé bon ba Israel u bé ndigi le: I yom Yéhôva a nkal bo hiki kel ba kôli bôdôl yo ñem. Yéhôva a ñunda hala inyule a nyônôs hiki mbônga wé.

2. Inyuki di nla bôdôl mimbônga mi Yéhôva inyu dilo di nlo ñem, mambe mambadga di ga tehe munu i yigil ini?

² Baa di nla ki bôdôl mimbônga mi Yéhôva inyu dilo di nlo ñem? Bebee le 800 i nwii i mbus dilo di Yésaya, ñôma Paul a bi toñol inyuki di nlama bôdôl mimbônga mi Nyambe ñem. Paul a kal le: “Nyambe a nla bé tembee.” (Lôk Héber 6:18) Lingen li malép li nla bé ti i nlélém ngéda malép malam ni malép mabe, nlélém jam ni Yéhôva nu a yé Lingen li maliga, a nla bé pot bitembee. Jon, di nla bôdôl i mam momasôna Yéhôva a nkal i ñem, yak mimbônga nwé nwominsôna inyu dilo di nlo. Munu yigil ini, di ga wan mambadga mana: I dilo di nlo, kii Yéhôva a mbôn le a ga ti bés? Kii Yéhôva a bi boñ inyu kwés bés nkaa le mbônga wé u ga yon?

KII YÉHÔVA A BI BÔN?

3. (a) Umbe mbônga bagwélél ba Nyambe ba nlôôha gwés? (Masoola 21:​3, 4) (b) Lelaa bôt bahogi ba ntimbhe i ngéda ba nkal bo mbônga u?

³ Bagwélél ba Nyambe ba nkoñ ’isi wonsôna ba nlôôha gwés i mbônga di ga wan hanano. (Añ Masoola 21:​3, 4.) Yéhôva a mbôn le ngim ngéda i ga lo le “nyemb y’a ba ha bé, to maéya, to nlondok, to njôghe bi ga ba ha bé.” I ngéda di ntééne bôt bape likalô, ngandak ipôla yés i mbéna añ nlôñ u Bibel unu, u u ntoñol lelaa niñ i ga ba i Paradis. Lelaa bôt bahogi ba yé ba nôgda i ngéda di yé di ñunda bo mbônga unu? Bôt bape ba yé ba kal le, “mbônga u u ta bé le u yon.”

4. (a) Kii Yéhôva a bé yi, kii a bôk tehe? (b) U héya mimbônga Yéhôva a mbôn, kii ipe a yé a boñ?

⁴ Ni njel mbuu mpubi wé, i ngéda Nyambe a bi tinde ñôma Yôhanes i tila mbônga u niñ i Paradis, Yéhôva a bé yi le i len ini, di ga kabna i botñem i ni bôt bape i ngeñ di mba di nlegel nwin u Ane. Yéhôva a bé yi bisu bi ngéda le, hala a ga lédél ngandak bôt i hémle le mbônga u “mam ma mondo” u ga yon. (Yésaya 42:9; 60:2; 2 Korintô 4:​3, 4) Lelaa di nla ni kwés bôt bape nkaa​—ni bésbomede​—le bisai bi nlébna i kaat Masoola 21:​3, 4 bi ga yon? Yéhôva a bi ti ndigi bé mbônga u u nhôgbaha, ndi a bi ti ki manjom ma ngui ma ma ntinde bés i ba nkwoog nkaa le a ga yônôs mbônga wé. Mambe manjom a bi ti?

YÉHÔVA A NKWÉS BÉS NKAA LE MBÔNGA WÉ U GA YON

5. Mambe manjom di gwé inyu bôdôl mbônga u Paradis ñem, hee di nlébna mo?

⁵ Di nléba manjom ma ma ntinde bés i bôdôl mbônga u Paradis i ñem mu minlôñ mi Bibel mi noñ ha. Di ñañ mu le: “Nu a bé a yii mu yééne ane a kal le: ‘Nuna-ki! Me mboñ mam momasôna yondo.’ A kal ki le: ‘Tila, inyule bibañga bini bi yé maliga, bi yé ki ntiik.’ A kal me le: ‘Bi mal yon! Men me yé Alfa ni Ôméga, bibôdle ni lisuk.’”​—Masoola 21:​5, 6a.

6. Inyuki bibañga bi yé i kaat Masoola 21:​5, 6 bi mboñ le di kônde bôdôl mbônga u Nyambe ñem?

⁶ Inyuki nlôñ u Bibel unu u nlédés botñem yés i mbônga u Nyambe unu? I kaat ini ni hop Pulasi le La Révélation. Dénouement i mpôdôl minlôñ mi Bibel mini i nkal le: “Munu minlôñ mini, i yom Yéhôva a yé boñ di nla hégha yo ni mut nu a nsane ngim lipep, inyu unda le a ga yônôs mbônga wé.”b Ikété kaat Masoola 21:​3, 4, di nléba mbônga u Nyambe u. Ndi i nlôñ u 5 ni 6, i yé wengoñle Yéhôva a yé sane, inyu kwés bés nkaa le i yom a mbôn bés i ga yon ndigi. Di béñge bibañga Yéhôva a ngwélél inyu kwés bés nkaa.

7. Njee a mbôdôl pot nlôñ 5, inyuki hala a yé jam li tôbôtôbô?

⁷ Nlôñ 5 u mbôdôl ni bini bibuk le: “Nu a bé a yii mu yééne ane a kal le.” (Masoola 21:5a) Bibañga bini bi yé tôbôtôbô, inyule di nléba gwo i bahoma baa ikété kaat Masoola i het Yéhôva nyemede a mpot. Añgel bé yon i bi ti bés mbônga u, to Yésu, ndi Yéhôva nyemede mede! I jam li, li ñunda le di nla ba nkwoog nkaa le, bibañga bi bi yé maliga. Inyuki di nkal hala? Inyule Yéhôva “a nla bé tembee.” (Titô 1:2) Jon bibañga di ñañ i kaat Masoola 21:​5, 6 bi ga yon ibabé set.

“NUNA KI! ME MBOÑ MAM MOMASÔNA YONDO”

8. Lelaa Yéhôva a nyigye le mbônga wé w’a yon? (Yésaya 46:10)

⁸ Yéhôva, a nkal ki le “Nuna ki!” (Masoola 21:5) I buk ba nkobol ni hop Grikia le “nuna ki!” ba ntiimba yo ngandak ngélé i kaat Masoola. I bôt ba bi noode toñol i buk i, ba nkal le “lipodok li, li ngwéélana inyu kal i mut a ñañ le a tibil bok mis mu jam li noñ ha.” I mbus bibañga bini kii i noñ? Nyambe a nkal le: “Me mboñ mam momasôna yondo.” Ntiik, Yéhôva a yé pôdôl mahéñha ma ga bôña i dilo di nlo, ndi inyu yé mbônga u u ga yon ibabé set, jon a mpôdôl mahéñha ma kiki bo le ma yé bôña.​—Añ Yésaya 46:10.

9. (a) Bibuk bini le i ‘boñ mam momasôna yondo’ bi tihba mimbe minson mi Yéhôva? (b) Kii ba ga boñ ni “ngii” yomede ni “hisi” hiomede?

⁹ Di wan ki bibuk bi noñ ha, bi di nléba i kaat Masoola 21:5: “Me mboñ mam momasôna yondo.” Munu i pes Bibel ini, bibuk bini bi mpôdôl minson ima mi Yéhôva​—héñha mam ni boñ mam. Pog, kii Yéhôva a ga héñha? I kaat Masoola 21:​1, di ñañ le: “Ngii i bisu ni hisi hi bisu bi bi tagbe.” “Ngii i bisu” i yé biane bi nkoñ ’isi u Satan ni mimbuu wé mimbe ba ñéga. (Matéô 4:​8, 9; 1 Yôhanes 5:19) Ikété Bibel i buk ini le, “hisi” i nla gwéélana inyu pôdôl i bôt ba yiine mu. (Bibôdle 11:1; Tjémbi 96:1) Jon, “hisi hi bisu” hi yé bibéba bi bôt bi bi niñ i len ini. Yéhôva a ga tiimba ha bé hek “ngii” yomede; to “hisi” hiomede, ndi a ga tjé i bet ba nyééne mu. A ga héñha ngii ni hisi hi len, ni “ngii yondo ni hisi hi yondo,” hala wee énél i mondo ni bôt ba ba téé sép.

10. Kii Yéhôva a ga yilha yondo?

¹⁰ I kaat Masoola 21:​5, di ñañ ki i mam Yéhôva a nkal le a ga yilha yondo. Yéhôva a ta bé kal le: “Me yé boñ mam ma mondo momasôna.” Ndi a nkal le: “Me mboñ mam momasôna yondo.” Yéhôva a ga boñ le hisi ni bôt ba binam ba yila yondo i ngéda a ga tibil hisi a boñ le bôt ba binam ba ba peles. Kiki Yésaya a bi bôk a legel, hisi hiosôna hi ga yila hilam​—nlélém kiki wom Éden. Yak bés a ga yilha bés yondo, le di ba mbôô ngélé yada inyu ngélé yosôna. Bibôk bi bôt, bôt ba ndim, bôt ba ndok ba ga mbôôp, yak bôt ba ba bi wo ba ga témb i niñ.​—Yésaya 25:8; 35:​1-7.

“BIBAÑGA BINI BI YÉ MALIGA BI YÉ KI NTIIK. . . . BI MAL YON!”

11. Kii Yéhôva a bi kal Yôhanes le a boñ, imbe njom a bi ti nye?

¹¹ Kii ipe Nyambe a bi kal inyu boñ le di laa bôdôl nye ñem? Yéhôva a kal Yôhanes le: “Tila, inyule bibañga bini bi yé maliga, bi yé ki ntiik.” (Masoola 21:5) Yéhôva a bi ti ndigi bé oda le ba “tila.” Ndi a bi kal ki inyuki ba nlama tila. A kal le: “Inyule bibañga bini bi yé maliga, bi yé ki ntiik”​—hala we bibañga bi Nyambe bi téé. Di nla bôdôl gwo ñem, di nla ki kon maséé le Yôhanes a bi nôgôl i oda ini le “tila.” Hala a mboñ le, di nla añ mbônga u Nyambe inyu Paradis, di ôt ki pék mu mam malam ma mbem bés i dilo di nlo.

12. Inyuki Yéhôva a bi kal le: “Bi mal yon!”

¹² I mbus ha, kii Nyambe a nkal? “Bi mal yon!” (Masoola 21:6) Nano Yéhôva a yé i pot i pôn-ga wee i mam momasôna a bi pôdôl inyu mbônga u Paradis ma mal yon. Ni le a nla kal hala inyule, yom to yada i nla bé kéñ nye i yônôs sômbôl yé. I mbus, Yéhôva a nkal jam lipe li li nkwés bés nkaa le mbônga wé u ga yon ngélé yada inyu ngélé yosôna. Kii a bi kal?

“MEN ME YÉ ALFA NI ÔMÉGA”

13. Inyuki Yéhôva a bi kal le: “Men me yé Alfa ni Ôméga”?

¹³ Kiki di mbôk di ntehe, mu yiinda i Yôhanes, Yéhôva nyemede a mpot mu letee ni ngélé iaa. (Masoola 1:8; 21:​5, 6; 22:13) Hiki ngélé mu mangéda ma mo maa, Yéhôva a nkal nlélém jam: “Men me yé Alfa ni Ôméga.” I bañga ini le alfa i yé bañga i mbôdôl i alphabet ni hop u Grikia, ôméga a bak bañga i nsôk. I ngéda a nkal le “Alfa ni Ôméga,” Yéhôva a ñunda le i ngéda a mbôdôl ngim jam a mélés ndigi jo.

14. (a) Ti hihéga hi hi ñunda le, Yéhôva a bé a kôli kal le, “Alfa” ni imbe ngéda a ga kal le “Ôméga.” (b) Kii di nléba i kaat Bibôdle 2:​1-3 i i nkwés bés nkaa le mbônga u u nyon?

¹⁴ I mbus le Yéhôva a hek Adam bo Éva, a bi kal bo bitelbene gwé inyu bôt ba binam ni hisi. Bibel i nkal le: “Nyambe a sayap bo, a kal ki bo le: “Gwala, bôla, ni yônôs hisi, ni ane ki hio.’” (Bibôdle 1:28) Ha i ngéda i Yéhôva a bi kal kii bo le, “Alfa.” A bi tibil toñol bitelbene gwé: Ngim ngéda i ga kola le mbôda i Adam bo Éva i i yé manôgla, i bak peles i yon ni ’isi hiosôna, i yilha hio paradis. Ha i ngéda i Yéhôva a ga kal kii be le, “Ôméga.” I mbus le Yéhôva a bi mal hek “ngii ni hisi ni gwom gwobisôna bi yé mukété,” a bi kal ngim jam inyu unda bés le bitelbene gwé bi ga yon ibabé set. Di ntehe hala i kaat Bibôdle 2:​1-3. (Añ.) Hilo hi nyônôs hisaambok hi yé hipubhaga inyu yé. Kii hala nkobla? Yéhôva a bi unda le ibabé set, bitelbene gwé inyu bôt ba binam ni hisi bi ga yon. Bi ga yon i mamélél ma dilo disaambok.   

15. Kii i bé le i boñ le, i nene wengoñle Satan a nkéñ le bitelbene bi Nyambe inyu bôt ba binam bi yon?

¹⁵ I mbus le Adam bo Éva ba bi ndogbene Nyambe, ba yila bikwéha bi bôt, ba lôôs ki mbôda yap béba ni nyemb. (Rôma 5:12) I bé le i nene wee Satan a bi kéñ bitelbene bi Nyambe bi bi yé le, hisi hi yon ni bôt ba manôgla ni ba ba yé peles. I bé le i nene wengoñle Satan a nkéñ le Yéhôva a kal le “Ôméga.” Satan a bé le a hoñol le Yéhôva a gwé bé njel ipe inyu yônôs mbônga wé. Njel yada i bé le a nol Adam bo Éva, a tiimba hek babiina ba ba yé peles inyu yônôs bitelbene gwé. Ndi, ibale Nyambe a boñ hala, Nsohop a bé le a ôm nye nsohi le a yé mut bitembee. Inyuki? Inyule kiki i yé ntilga i kaat Bibôdle 1:​28, Yéhôva a kal Adam bo Éva le mbôda yap yon y’a yônôs hisi.

16. Inyuki Satan a bé le a hoñol le a bé le a kéñ Yéhôva i yônôs sômbôl yé?

¹⁶ Imbe njel ipe Satan a bé le a hoñol le Nyambe a nla yoñ? Bebek le Satan a bé le a hoñol le, Yéhôva a ga nwas le Adam bo Éva ba bana bon ba ba ga ba bé peles kekikel. (Ñañal 7:20; Rôma 3:23) Ha ngéda i, ibabé pééna, Nsohop a bé le a ôm Yéhôva nsohi le a nyônôs bé bañga yé. Inyuki? Inyule ki Nyambe a bé ha bé le a yônôs bitelbene gwé, bi bi yé le a yônôs hisi ni mbôda i Adam bo Éva i i yé manôgla, i bak peles.

17. Kii Yéhôva a bi boñ inyu mélés ndok i Satan ni i bôt ba binam ba bisu, lisuk li ga ba lelaa? (Béñge yak titii.)

¹⁷ Satan a bé bé le a hégda i yom Yéhôva a bé le a boñ. Yéhôva a bééna njel i nlôôha ilam inyu yônôs njômbi yé, tolakii Satan, Adam ni Éva ba bi ndogbene nye. (Tjémbi 92:5) Yéhôva a bi nwas le Adam bo Éva ba bana bon, ni i njel i, Yéhôva a bi yônôs bañga yé, hala a unda le a ta bé Djob li bitembee. Yéhôva a bi unda le, ibale a nkal le a mboñ jam, yom yo ki yo i ga kéñ bé le a boñ jo. A bi yônôs bitelbene gwé i ngéda a bi ti “mbôda” i i bé lama tohol bon ba Adam bo Éva ba ba yé manôgla. (Bibôdle 3:15; 22:18) Makidik ma Yéhôva ma, ma bi lama hélés Satan! Inyuki? Inyule gwéha yon i bi tinde Yéhôva i ti binoñ. (Matéô 20:28; Yôhanes 3:16) Satan a gwé bé i lem ilam i, inyule a yé mut nu a ntôñ ndigi ni nyemede. Jon kii i ga bôña ni njel binoñ? I mamélél ma Ane i hikôô hi nwii, mbôda i Adam bo Éva i i yé manôgla, i bak peles, i ga kôdôl hisi hi ma yila paradis​—kiki Yéhôva a bi kal i bibôdle. Ha i ngéda i, i ga ba wengoñle Yéhôva a nkal le, “Ôméga.”

LELAA DI NLA LÉDÉS BOTÑEM YÉS INYU PARADIS YÉHÔVA A MBÔN

18. Inyu nkwés bés nkaa le a ga yônôs mimbônga nwé, kii Nyambe a bi ti bés? (Béñge yak minkéñék mi matila le “Manjom maa ma ma ntinde bés i bôdôl mbônga u Yéhôva ñem.”)

¹⁸ Munu yigil ini, di ntehe manjom ma ma ñunda bés inyuki di nla ba nkwoog nkaa le, hisi hi ga yila paradis. Kii di nla kal bôt ba ba gwé pééna inyu kwés bo nkaa le i jam li li ga yon? Pog, Yéhôva nyemede nyen a mbôn i jam li. Kaat Masoola i nkal le: “Nu a bé a yii mu yééne ane a kal le: ‘Nuna-ki! Me mboñ mam momasôna yondo.’” A gwé pék, ngui, ni ngôñ i yônôs mbônga wé. Iba, Yéhôva a nyi le, i yom a nkal i ga set bé, jon i yé ndik wee i mal yon. A nkal le: “Bibañga bini bi yé maliga, bi yé ki ntiik. . . . Bi mal yon!” Aa, i ngéda Yéhôva a mbôdôl ngim jam, a nkena jo loñge letee ipam lisuk, kiki bibañga bini bi nkal: “Men me yé Alfa ni Ôméga.” Yéhôva a ga unda le Satan nyen a yé mut bitembee, ni le a nla bé kéñ le bitelbene bi Yéhôva bi yon.

19. I ngéda bôt ba mpééna mbônga u Nyambe u Paradis, kii di nla boñ?

¹⁹ Bigda le, hiki ngéda u nkal bôt lelaa Yéhôva a bi kwés bés nkaa le mimbônga nwé mi ga yon toi, u nlédés botñem yoñ wemede mu mimbônga nwé. Jon lisañga lipe u mba u ñañ mbônga u u mpôdôl Paradis i i ga loo, i di nléba i kaat Masoola 21:​4, ndi mut a kal le: “Mbônga u u ta bé le yon.” Kii u ga boñ? Baa u ta bé le u éñél nye nlôñ 5 ni 6, u ntoñol ki nwo? Éba nye lelaa Yéhôva a bi unda le mbônga wé u ga yon ibabé set, kiki bo le nyemede nyen a bi sane.​—Yésaya 65:16.