Inyuki Djob a nwas béba ni mandutu?

1. Lelaa béba i bi bôdôl?

Béba i bi bôdôl hana isi ngéda Satan a bi pot tembee bisu. I bibôdle, Satan a bé peles añgel, ndi ‘a telbene bé maliga.’ (Yôhanes 8:44) A bi bôdôl yéñ le a bana bibégés le Djob nyetama nyen a kôli kôhna. Satan a lôk muda nu bisu le Éva. A tinde ki nye i nôgôl nye iloo Djob. Adam a bi noñ Éva i ndogbene Djob. Makidik ma Adam ma bi lona bés mandutu ni nyemb.​—Añ Bibôdle 3:1-6, 19.

Ngéda Satan a bi nyuge Éva i ndogbene Djob, a bi bôdôl kolba Djob. A bi yéñ unda le Djob a kôli bé énél tole a ta bé Nungingi. Libim li bôt li noñ Satan, ba ntjél le Djob a ba Kiñe yap. Hala nyen Satan a bi yila “ñane nkoñ ’isi.”​—Añ Yôhanes 14:30; 1 Yôhanes 5:19.

2. Baa ngim jam i bé hañ ikété lihegeg li Djob?

Djob a bi heg mam momasôna peles. Djob a bi heg bôt ba binam ni biañgel le ba nla nôgôl nye i nya yôni. (Ndiimba Mbén 32:4, 5) Djob a bi heg bés ni kunde i pohol ipôla boñ loñge tole béba. Di nla ni gwélél i kunde i, inyu unda le di ngwés Djob.​—Añ Yakôbô 1:13-15; 1 Yôhanes 5:3.

3. Inyuki Djob a nwas mandutu letee ni len ini?

Inyu ntjegeg ngéda, Yéhôva a bi nwas le bôt ba binam ba kolba énél yé. Inyuki? Inyu unda le biliya bi bôt ba binam i énél bomede bi nla bé lona bo bisai. (Ñañal 7:29; 8:9) Mbus 6 000 ñwii u ñañ u bôt ba binam hana isi, mam ma ñunda le baénél ba nkoñ isi ba nla bé mélés gwét, njôô, ngitelepsép, ni makon.​—Añ Yérémia 10:23; Rôma 9:17.

Ane i bôt ba binam i ta bé kii Ane Djob inyule Ane Djob i nlona bisai inyu bet ba neebe yo. Ndég ngéda, Yéhôva a ga tjé biane bi bôt ba binam. Ndik bet ba ntep i ba isi Ane Djob bon ba ga yén hana isi.​—Yésaya 11:9; Añ Daniel 2:44.

Béñge vidéô Inyuki Djob a nwas mandutu?

4. Wongut i Djob i nhôla bés i boñ kii?

Satan a bi kal le mut to wada a ngwélél bé Yéhôva ni mahoñol malam. Baa u gwé ngôn i unda le hala a yé bitembee? Ñ, u nla! Wongut i Djob i nti bôt bobasôna ngéda i pohol ipôla Ane Djob ni i bôt ba binam. Maboñog més ma ga unda imbe pes di yé.​—Añ Hiôb 1:8-12; Bingéngén 27:11.

5. Lelaa di nla pohol Djob kiki Ñane wés?

Di nla unda le di mpohol Djob kii Ñane wés, ngéda di nyéñ bégés nye kiki Bibel i niiga. (Yôhanes 4:23) Di nla tjél le Satan a ba ñane wés ngéda di nyoñ bé ngaba ni pôlitik, to ni gwét kiki Yésu.​—Añ Yôhanes 17:14.

Satan a mbôñôl ngui yé i tinde bôt ikété mpungu mam ma ndéñg ni mam mabe mape. Ibale u nwas mam mabe ma, ngandak ikété mawanda moñ ni bôt boñ ba lihaa ba nla noode sôña we i nigil Bibel, tole ba nla kôhna we woñi. (1 Pétrô 4:3, 4) Inyu hala nyen di nlama pohol. Baa di ga kôôge bebe ni bôt ba ngwés Djob? Baa di ga nôgôl mambén ma Djob ma ma yé nyonog ni pék ni gwéha? Ibale di mboñ toi hala, di ga unda le Satan a bi tembee ngéda a bi kal le ikété ndéénga, mut a nla bé nôgôl Djob.​—Añ 1 Korintô 6:9, 10; 15:33.

Gwéha i Djob inyu bôt ba binam i nkwés bés nkaa le béba, ni mandutu ma ga mal. Ba ba ñunda le ba nhémle le Djob nyetama nyen a kôli énél, bon ba ga kôhna niñ boga hana isi.​—Añ Yôhanes 3:16.