Inyuki ni imbe ngéda Kristen muda i nlama hô ño?

Inyuki ni imbe ngéda kristen muda i nlama hô ño ibale a yé i boñ mam ma mbuu? Di béñge jam ñôma Paul a bi tila mu jam li. A nti maéba di gwé ngôñ inyu yoñ makidik malam ma ma nti Djob lipém. (1 Korintô 11:3-16) Paul a nsima mam maa di nlama béñge: (1) mam ma ma mbat le muda a hô ño, (2) bahoma muda a nlama hô ño, ni (3) mahoñol ma ma nlama tinde muda i hô ño.

Mam ma ma mbat le muda a hô ño. Paul a bi sima mam ima: masoohe ni bipôdôl. (Minlôñ 4, 5) Ntiik, masoohe ma yé bibañga bi bibégés di nti Yéhôva. I len ini, bipôdôl bi nla ba biniigana bi Bibel le ngim kristen i nti. Ndi, baa Paul a bé sômbôl kal le muda a nlama hô ño wé hiki ngéda a nsoohe tole ngéda a niiga bape maliga ma Bibel? Heni. I bahoma muda a nsoohene tole a niiga, bon ba nhôla nye i yi too a nlama hô ño, too a nlama bé boñ hala.

Bahoma. Bibañga bi Paul bi mpôdôl bahoma iba—i lihaa ni i likoda. A nkal le: “Munlôm ki a yé ño muda; . . . hi muda a nwéha ño wé nyuu ibale a nhô bé wo ngéda a nsoohe, to ngéda a mpôdôl Nyambe.” (Minlôñ 3, 5) Ikété ndap lihaa, munlôm nyen Yéhôva a bi téé kiki ño u ñwaa wé. Ibale a ñunda bé kiki i nsômbla le a neebe kunde nlôm a gwé i ngii yé, a nwéha nlôm nyuu hiki ngéda a mbegel mbegee Yéhôva a bi ti nlôm. Kiki hihéga, ibale i mbéda le a tégbaha yigil i Bibel, nlôm a bak ha, a nlama hô ño inyu unda le a nsuhus nyemede i si kunde nlôm. A nlama boñ hala, to nlôm a yé sôblege to a ta bé, inyule nlôm nyen a yé ño u ndap lihaa.a Ibale a nlama soohe tole a nlama niiga, ndi nsôblege wé man munlôm u bak ha, a nlama ki hô ño wé. A ga boñ bé hala inyule man wé a nyila ño u ndap lihaa, ndi inyule minsôblege mi bôlôm nwon Yéhôva a nti kunde i niiga ikété likoda.

Paul a mpôdôl homa numpe: Likoda. A nkal le: “Ibale mut a nene le a ngwés ndañ, wee bés di gwé bé lem i; i ta bé ki to ikété ntôñ Nyambe.” (Nlôñ 16) Ikété likoda li bikristen, minsôblege mi bôlôm nwon mi yé baéga. (1 Timôtéô 2:11-14; Lôk Héber 13:17) Bôlôm botama bon ba nla yila mimañ ni bahôla nson inyu tééda bémba i Djob. (Minson mi baôma 20:28) Ndi ngim mangéda, ba nla bat kristen i i yé muda le a boñ bôlô le minsôblege mi bôlôm nwon mi kôli boñ. Kiki hihéga, a nla éga makoda inyu likalô ibale nsôblege munlôm to wada u u nla boñ bôlô i, u ta bé. Tole ibale a nke ni nsôblege munlôm inyu tégbaha yigil i Bibel i a mbéna tégbaha.b Kiki bibôlô bini bi njôp ikété bibôlô bi likoda, a nlama hô ño wé inyu unda le a nyi le bôlôm bon ba kôli sal bôlô a yé boñ.

Ndi i pes ipe, kristen muda i nla boñ ngandak mam ikété likoda ibabé nye i hô ño. Kiki hihéga, a gwé bé le a hô ño ngéda a ntimbhe i makoda, ngéda a ntéé likalô mandap ni mandap ni nlôm tole ni nsôblege munlôm umpe, tole ngéda a yé nigil tole soohe ni bon bé ba ba yé ngi sôblana. Ngim bahoma bape ba yé le muda a nla badba too a nlama hô ño. Ibale kristen muda i nyi bé i yom a nlama boñ, a nla kônde wan bikaat bi ntôñ inyu kôs ndimbhe.c Ibale mbus nyiña wé, a ngi badbaga i yom a nlama boñ, tole ibale kiññem yé i ntinde nye i hô ño, i ga ba bé béba le a boñ hala, kiki titii i ñunda.

Mahoñol ma ma nlama tinde muda i hô ño. I nlôñ 10, di nléba manjom ima, ma ma nlama tinde kristen muda i hô ño. “Inyu angel, muda a nlama bana yimbne ane ño wé.” Njom bisu i nlôl munu bibañga bini le “yimbne ane.” Hô ño li yé njel muda a nla unda le a neebe kunde Yéhôva a bi ti minsôblege mi bôlôm ikété likoda. A ñunda ki le a ngwés Yéhôva ni le a ntéñbe i nôgôl matiñ mé. Njom i nyônôs iba i nlébna i bibañga bini le “inyu biañgel.” Ngéda muda a nhô ño, lelaa hala a ntihba mimpémba mi bihégél bi mbuu bini?

Biañgel bi yé maséé i tehe le bihégél bi mbuu i ngii ni bi minsôn hana isi, bi nsuhus bomede i si énél i Yéhôva. Yak bo ba ñôt biniigana ngéda ba ntehe ndémbél ilam bikwéha bi bôt bi nti. Yak biañgel bi nlama suhus bomede i si matéak ma Yéhôva—jam le jôga ikété yap li bi la bé boñ ngéda kôba. (Yuda 6) I len ini, biañgel bi nla tehe kristen muda i i nyi kaat ngandak, i i gwé ngandak pék, i i ma tehe ki ngandak mam iloo nsôblege munlôm ikété likoda; ndi to hala, a yé bebee i suhus nyemede i si énél i munlôm nu. Ngim mangéda, yak kristen muda i i yé nhook inyu yila kiñe i ngii ipañ Yésu, i nlama boñ nlélém jam. I muda nunu, a ga sôk bana kunde iloo yak biañgel inyule a ga énél ni Kristô i ngii. Kinjee ndémbél ilam bikristen bi bôda bi nti biañgel! Kinjee bisai bisista gwobisôna bi gwé i unda suhulnyu ni manôgla ngéda ba ntéñbe i bana maboñog ma suhulnyu i mis ma didun di biañgel!