Yésu a nkôhna lipém nye ngi gwéé

I mbus le Gabriel a nkal Maria le a ga bana man munlôm nu a ga o jôl le Yésu, ni nu a ga ane kiki Kiñe i boga ni boga, Maria a mbat le: “Lelaa hala a nla bôña, hala kiki me yé ngi lal ni munlôm?”​—Lukas 1:34.

Gabriel a ntimbhe le: “Mbuu mpubi w’a lo i ngii yoñ, yak lipémba li Nungingii l’a hô we. Inyu hala nyen nu a ngwéé a’ séblana le numpubi, Man Nyambe.”​—Lukas 1:35.

Bebek inyu boñ le Maria a neebe nwin unu, Gabriel a nkônde le: “Nun-ki! Hala a yé sôñ isamal le Élisabet mut woñ lihaa a yé jém li man munlôm i biuni gwé, to hala kiki bôt ba kalak le a yé kom muda. Inyule lipôdôl li Nyambe to jada li nla bé yén ngi yon.”​—Lukas 1:36, 37.

Maria a neebe yom Gabriel a nkal nye, ndimbhe yé i ñéba hala, a nkal le: “Nun-ki! Me yé nkol u Yéhôva! I bôña ni me kiki u mpot.”​—Lukas 1:38.

Kiki Gabriel a nke, Maria a mbôdôl kôôba inyu ke yuuga Élisabet nu a niñ ni nlô wé Sakaria bebee ni Yérusalem, i dikôa di Yudéa. I nyodi i mbai yé inyu ke i Yérusalem, hala a nla yoñ nye dilo daa tole dina.

Maria a nsôk a bol i mbai Sakaria. Kiki a njôp, a nyéga maasañ le Élisabet. Nlélém ngéda Élisabet a nyon ni mbuu mpubi, a kal Maria le: “Ba nsaibak ikété bôda, yak man a yé ikété libum joñ a ba nsaibak! Kinje bisai me gwé le nyañ Nwet wem a nlo i meeni! Inyule nun-ki! Kiki kiñ i mayéga moñ i njôp ndik me maôô, man a yé me ikété libum a nyiñgha ni maséé.”​—Lukas 1:42-44.

Maria a ntimbhe ni mayéga ma nlôl nye ñem: “Me ñañal bikeñi bi Yéhôva, yak mbuu wem u nlôôha kon maséé inyu Nyambe Ntohol wem, inyule a bi béñge libak jem lititigi li nkol muda. Inyule nun-ki! Ibôdôl nano, tjai tjodisôna d’a kal le me yé kimasoda, inyule Nu lipémba a mboñ mam makeñi inyu yem.” Di nla yimbe le to hala kiki Maria a nkôs bisai bi tôbôtôbô, a nti Nyambe lipém jolisôna. A nkal le: “Jôl jé li yé lipubi; hiai i mbus hiai, konangoo yé i yé i ngii ba ba nkon nye woñi.”​—Lukas 1:46-50.

I mbus hala, Maria a nke ni bisu i bégés Djob, a nkal le: “A mboñ mimpémba mi mam ni woo wé; a nsand ba ba gwé mahoñol ma ngôk ikété miñem nwap. A nhéya mimpémba mi bôt i biyééne bi ane; a suhus bo, ndi a bédés bôt batitigi; a bi nuus bôt ba yé njal ni mam malam, ndi a huuha mingwañ mi bôt moo nso. A mbigda konangoo yé, a lona ngwélél wé Israel mahôla kiki a bi kal basôgôlsôgôl bés, Abraham ni mbôda yé, i boga ni boga.”​—Lukas 1:51-55.

Maria a nyén yak Élisabeth bebee le sôñ iaa, a nhôla nye mu kiki hilo hié hi gwal hi bé bebee. Kinje loñge jam le bôda ba hémle bana bo iba ba ntégbaha ngéda ntôñ, mu kiki hiki wada wap a bééga man ni ngui Djob!

Baa ni nyimbe lipém Yésu a nkôhna nye ngi gwéé? Élisabet a nsébél nye le “Nwet wem.” Man ikété libum jé “a nyiñgha ni maséé” ngéda Maria a njôp i ndap i ngéda bisu. Kiki di ga tehe, hala a yé mahéñha ni maboñok bape ba ga bana ipañ Maria ni man a nke gwal.