Maria a yé jém nye ngi biiba

Hala a yé bebee le sôñ ina le Maria a yé jém. U hôya bañ le i bibôdle bi jém jé, a bi tégbaha ngéda i yuuga mut wé lihaa le Élisabet nyoo dikôa di Yudéa, i nwelmbok. Ndi nano Maria a ntémb i mbai yé i Nasaret. Ndék ngéda wee bôt ba nyi le a yé jém. U nla hégda lelaa jam lini li nla tééñga nye!

Maria a bi yegna libii ni kapinda yada le Yôsep. A nyi le inoñnaga ni Mbén Djob a ti Israel, ibale muda a bi yegna libii ni munlôm ndi a bana maada ma nyega ni munlôm numpe, ba bé lama ôm nye ngok letee a wo. (Ndiimba Mbén 22:23, 24) Ndi to hala kiki Maria a bi ke bé i ndéñg, ibabé pééna a yé badba lelaa a ga toñle Yôsep le a yé jém, ni kii i ga tagbe i mbus.

Hala a yé sôñ aa le Maria a bi ke liké, jon di nla hégda le Yôsep a nyamnda ni ngôñ i tehe nye. Ngéda ba mbomna, Maria a nyis nye le a yé jém, a noode ki toñle nye le hala a nlôl ni ngui i mbuu mpubi u Djob. Ndi kiki u nla hégda, inyu Yôsep hala a ta bé jam li ntomb i neebe.

Yôsep a nyi le Maria a yé loñge muda, le a gwé jôl lilam. A ngwés ki nye ngandak. Ndi i yé nye ndutu i neebe jam Maria a nkal, a ta bé tehe lelaa Maria a yé le a ba jém ngi bana maada ni munlôm numpe. Yôsep a gwé bé ngôñ le ba ôm Maria ngok letee a wo tole ba wéha nye nyuu i mbamba. Jon a nkit le a mbos ni nye bisôsôli. Ha ngéda i, ba bé tehe bayegna libii kiki babiina, inyu hala nyen i bé béda mabos inyu mélés mayegna.

I mbus, kiki a nke ni bisu i ôt mahoñol mu mam ma, Yôsep a nke a nañal. Añgel i Yéhôva i mpémél nye i eem, i nkal nye le: “U kon bañ woñi i yoñ nwaa woñ Maria i weeni, inyule i jém a nyoñ li nlôl ni mbuu mpubi. A’ gwal man munlôm, u nlama o nye jôl le Yésu inyule a’ tohol bôt ni bibéba gwap.”​—Matéô 1:20, 21.

I ngéda a ntôde, Yôsep a yé maséé ngandak mu kiki a nyi lelaa mam ma bi tagbe. Ibabé i lep ngéda, a mbôdôl boñ jam añgel i nkal nye. A nyoñ Maria i mbai yé. Liboñok lini li yé kiki ngand libii, li nyis bôt bobasôna le Yôsep bo Maria ba yé mbiibaga. Ndi, Yôsep a mbana bé maada ni Maria mu ngéda yosôna a yé jém li Yésu.

Ngandak sôñ i mbus, mu kiki Maria a yé bebee ni gwal, nye ni Yôsep ba yé kôôba i nyodi i mbai yap Nasaret inyu ke liké. Hee ba yé ke, ki le Maria a yé bebee ni gwal?