Yésu a néñél i Nasaret

Yésu a néñél i Nasaret, i man tison a gwé bé ngandak mahee. I tison i, i yé i nwelmbok u nkoñ Galiléa het dikôa di yé, i pes hiôñg hi soso tegep lép ba nsébél le tuye Galiléa.

I ngéda a gwé yom kiki bo nwii ima, Yôsep bo Maria ba nkena Yésu i tison Nasaret, ba lôlak Égiptô. I nene le ha ngéda i, Yésu a bé mpom wap man. Ndi i mbus, a ga bana bilôk binyañ bi bôlôm: Yakôbô, Yôsep, Simôn ni Yuda. Yôsep bo Maria ba ga bana yak bingond, bilôk binyañ bi bôda bi Yésu. Jon i ndék yosôna, Yésu a gwé bilôk binyañ bisamal.

Ndi Yésu a gwé bôt ba lihaa bape. Di mbôk di yi Élisabet ni man wé munlôm le Yôhanes. Ba niñ haa ni bo, i Yudéa, i nwelmbok. Ndi Salômé, nu a nlama ba manyañ Maria nu mbus, a niñ bebee ni bo, i Galiléa. Jôl li nlôm Salômé le Sébédéô. Bon bap bôlôm iba, Yakôbô bo Yôhanes, ba nlama ba kiki bilôk binyañ bi Yésu. Di nyi bé too Yésu a ntégbaha ngandak ngéda ni bo binéñél gwé, ndi sôk i nsôk ba ga yila bañga yé mawanda, ba gwelek nson kiki baôma bé.

Yôsep a nlama sal ni ngui inyu niñis lihaa jé li li yé keñep. A yé kapinda. Yôsep a néñés Yésu kiki man wé, jon ba nsébél Yésu le “man kapinda.” (Matéô 13:55) Yôsep a niiga Yésu bôlô kapinda. Yésu a ntibil nigil bôlô i kayéle bôt ba nkal le “a yé kapinda.”​—Markô 6:3.

Niñ i lihaa li Yôsep i umne i ngii bibégés bipubi. Inoñnaga ni Mbén Djob, Yôsep bo Maria ba niiga bon bap matiñ ma Yéhôva ‘ngéda ba nyii i ndap yap, i ngéda ba yé nlôm njel, ngéda ba nañal, ni ngéda ba ntelep.’ (Ndiimba Mbén 6:6-9) Tison i Nasaret i gwé ndap bibégés yada. Di nla ba nkwoog nkaa le Yôsep a gwé lem i kena lihaa jé nyoo inyu bibégés. Ñañ u nke ni bisu i kal le Yésu a bé ke i ndap bibégés “kiki lem yé i kel Sabat.” (Lukas 4:16) Lihaa jolisôna li nkon ki maséé i ke i témpel i Yéhôva i Yérusalem.