YIGIL 7

Ba maliga, u kwéhak bôt nkaa

Lukas 1:3

I SEM KWEP: Gwélél bikaat bôt ba nla bôdôl ñem inyu hôla baemble le ba pam i bana nogna lam.

Boñ nyiña ikété bikaat bôt ba nla bôdôl ñem. Nkwel woñ u nlama ba u umi i Bañga i Nyambe; ibale pôla i nene, añ ikété Bibel yomede. Ibale u mpôdôl mam ma njoñ yi, miñañ mi kégikel, miñañ mi niñ, tole jam lipe li li nit nkwel woñ, wan i bisu bi ngéda le miñañ ni bikaat u ngwélél bi ba mam bôt ba nla bôdôl ñem ni le bi nkiha ni biniigana bi ntip pam.
Yi gwélél bikaat bi. Toñol minlôñ mi Bibel inoñnaga ni miñañ mi nkéña nwo, ni ño nkwel u Bibel, ni bikaat bi “nkol u maliga ni u pék.” (Matéô 24:45) Tibil gwélél bikaat bipe ibabé i héñha yom i bi tilba, to mahoñol ma bôt ba bi tila gwo.

Añal mam kiki ma yé, kal minsoñgi kiki mi yé, nlélém ni bititii; u kéñbaha bañ to yom. Yoñ yihe le bibuk bini le “bôt bahogi” bi yila bañ “libim bôt,” “ngim mangéda” a yila bañ “hiki ngéda,” to “i nla ba le” a yila bañ “ibabé pééna.”
Hôla baemble i hek pék i ngii mam ma yé ntiik. I ngéda u mal soñgol nlôñ u Bibel tole u nsima kaat ipe, gwélél mambadga malam, tole ti hihéga hi hi kôli, inyu hôla baemble le ba pam bomede i ôt biniigana mu.