Njee a yé Djob?

1. Inyuki di nlama bégés Djob?

Bañga Djob a yé Nheg gwom gwobisô. A gwé bé bibôdle to lisuk. (Tjémbi 90:2) Miñañ minlam mi yé ikété Bibel mi nlôl ni nye. (1 Timôtéô 1:11) Kii nyen a bi ti bés niñ, jon ndi nlama ndik bégés nyetama.​—Añ Masoola 4:11.

2. Lelaa Djob a yé?

Mut nye ki nye a maa bé tehe Djob inyule a yé Mbuu. Mbuu u yé ngim ntén niñ i gwé ngui iloo bihégél bi minsôn. (Yôhanes 1:18; 4:24) Ndi, di nla yi njee Djob a yé ni njel gwom a bi heg. Kii héga, gwéha i Yéhôva ni pék yé i nene ngéda di ntehe matam ma bie ni mbônji a bi heg. Ngéda di mbéñge bikeñi bi ngii ni isi a bi heg, hala ñunda bés lipémba jé.​—Añ Rôma 1:20.

Di nla ki kônde yi bilem bi Djob ngéda di ñañ Bibel. Kii héga, Bibel i niiga bés mam Djob a ngwés ni mam a ñoo. I nkal ki bés lelaa a ntôñ ni bôt, ni lelaa a nôgda ngéda di boñ loñge tole béba.​—Añ Tjémbi 103:7-10.

3. Baa Djob a gwé jôl?

Yésu a bi kal le: “A Tata wés nu a yé ngi, jôl joñ li tééba lipubi.” (Matéô 6:9) Tolaki Djob a gwé ngandak mangédi, a gwé ndik mpom jôl jada. Bôt ba nsébél nye mintén mintén inoñnaga ni dilémb tjap. Ni hop Basaa, Jôl li Djob le “Yéhôva.”​—Añ Tjémbi 83:19.

Bôt ba bi héa jôl li Djob ikété ngandak ngobol i Bibel, ndi ba héñha jo ni mangédi kii Nwet tole Nyambe. Ndi ngéda Bibel i tilbana, jôl li Djob li bé mu jam kii bo 7,000 ngélé. Yésu a bi yis bôt jôl li Djob ngéda a bé niiga bo.​—Añ Yôhanes 17:26.

Béñge vidéô Baa Djob a gwé ngim jôl?

4. Baa Djob a ntôñ toi bés?

Baa mandutu ma yé len i nkoñ isi wonsô, ma nkobla le Djob a ntôñ bé bés? Bôt bape ba nkal le Djob nyen a mboñ le di nok ndutu, ndi hala a ta bé maliga.​—Añ Yakôbô 1:13.

Djob a bi heg mut le a nla tep ni nyemede njee a ngwélél. Baa hala a nlémél bé bés le Djob a nti bés kunde i pohol ni bés bomede i gwélél nye? (Yôsua 24:15) To hala, ngandak i mpohol i boñ bôt bape béba, jon mandutu ma nlôôha ngandak i nkoñ isi. Hala nsiidaha Yéhôva ñem i tehe nya ngitelepsép i.​—Añ Bibôdle 6:5, 6.

Yéhôva a yé Djob nu a ntôñ bés. A ngwés le di kôn masé i niñ yés. Ndég ngéda, a nke mélés mandutu momasôna ni baboñ béba. Ndi ilole mam ma mba hala, a gwé loñge njom i neebe le béba i ba inyu ntjegeg ngéda. Ikété yigil 8, di ga nigil imbe njom a gwé.​—Añ 2 Pétrô 2:9; 3:7, 13.

5. Lelaa di nla kôôge bebe ni Djob?

Yéhôva a naña bés i kôôge nye pañ ni njel masoohe. A nyoñ ngéda ni hiki mut. (Tjémbi 65:3; 145:18) A yé bebe i nwéhél bés. Tolaki ndi mboñ bé sômbôl yé hiki ngéda, a ntehe biliya di mboñ inyu lémél nye. To hala kii di ta bé peles, di nla yila bañga liwanda li Djob.​—Añ Tjémbi 103:12-14; Yakôbô 4:8.

Kiki Yéhôva nyen a bi ti bés niñ, di nlama gwés nye iloo bôt bobasôna. (Markô 12:30) Inyu unda Djob gwéha yoñ, u nlama nigil i yi njee a yé, ni boñ yom a ngwés. Hala nyen w’a kônde kôôge nye bebe.​—Añ 1 Timôtéô 2:4; 1 Yôhanes 5:3.