Njee a yé Djob?

1, 2. Mambe mambadga bôt ba mbéna bat?

BOÑGE ba mbéna bat ngandak mambadga. To ibale u nyoñ ngéda i toñle bo ngim jam, ba mbat we le: “inyuki?” Ngéda u noode ti bo ndimbhe, ba nla ki kônde bat we le: “Ndi, inyuki?”

² Bés bobasôna, boñge kiki mimañ mi bôt, di gwé mambadga. Di nla badba le: Baa kii di ga je? Kii di ga haba? Tole kii di ga somb? Ndi, di nla ki bana mambadga makeñi ma niñ tole mambadga inyu dilo di nlo. Ibale di nkôhna bé mandimbhe ma kôli inyu mambadga més, di nla nimis makénd i bat mambadga mape.

3. Inyuki ngandak bôt i nhoñol le ba nla bé léba mandimbhe inyu mambadga makeñi ba mbadba?

³ Baa Bibel i gwé mandimbhe inyu mambadga makeñi di mbadba? Bahogi ba nhoñol le mandimbhe ma Bibel ma nlet ngandak i nok. Inyu yap, bipada ni bipastô gwon bi nla toñol Bibel. Ndi, bape ba nwo nyuu i neebe i bisu bi bôt le ba nyi bé mandimbhe. Baa we u nhoñol lelaa?

4, 5. Mambe mambadga makeñi u mbadba? Inyuki u nlama bé waa yéñ mandimbhe?

⁴ Bebeg le u nsômbôl bana mandimbhe inyu mambadga kii bo: Inyuki di yé munu nkoñ isi? Me ga yila kii ngéda me nwo? Djob a yé lelaa? Yésu, Malét nkeñi a bi kal le: “Yaglana, ndi y’a tina bé; yéña, ndi n’a léba; koodana, ndi y’a yiblana bé.” (Matéô 7:7) Jon u waa bañ yéñ letee u léba mandimbhe u nla bôdôl ñem.

⁵ I yé ntiik le u nla léba mandimbhe ibale u nwaa bé yéñ mo ikété Bibel. (Bingéngén 2:1-5) Mandimbhe ma, ma nlet bé i nok. Yom u ga nigil y’a kônde ti we maséé i len ini, y’a ti ki we botñem inyu dilo di nlo. Di béñge ni mbadga yada i ntééñga bôt i len ini.

BAA DJOB A NTÔÑ TOI BÉS TOLE A GWÉ NLEDEK ÑEM?

6. Inyuki ngandak bôt i nhoñol le Djob a ntôñ bé bo ngéda ndutu?

⁶ Ngandak bôt i nhoñol le Djob a ntôñ bé bés. Ba nkal le ibale a tôñôk toi bés, ki mam mabe ma ta bé i nkoñ isi. Kii héga, nkoñ isi u yé nyonog ni ôa, ni liyep, ni makon, ni mandutu, ni nyemb. Jon ngandak i mbadba le: “Ibale Djob a ntôñ toi bés, inyuki a ngwel bé mam mabe le ma kwél bañ bés?”

7. (a) Lelaa baniiga ba bibase ba mboñ le bôt ba hoñol le Djob a gwé nledek ñem? (b) Kii nkwés bés nkaa le Djob bé nyen a mboñ le mam mabe ma kwél bés?

⁷ Ngim mangéda, baniiga ba bibase bon ba mboñ le bôt ba hoñol le Djob a gwé nledek ñem. Ngéda mandutu makeñi ma nkwo, ba nkal le sômbôl i Djob i, ni ki le nyen a ngwés le ma bôña. Ngéda ba mpot hala, ba ñôm Djob nsohi. Ndi, Bibel i niiga le mam mabe ma mah bé lôl yak Djob. Kaat Yakôbô 1:13 i nkal bés le Djob a noode bé mut nye ki nye ni mam mabe. I pes kaat i, i nkal le: “Ndi ngéda manoodana, mut nye ki nye a kal bañ le, manoodana mana ma nlôl me ni Nyambe; inyule Nyambe a ta bé le a noodana ni mam mabe, to nyemede ki a noode bé mut.” Hala a nkobla le to ibale a bi gwel bé mam mabe le ma mbôña bañ, nye bé nyen a mboñ le ma kwél bés. (Añ Hiôb 34:10-12.) Di yoñ hihéga inyu toñol jam lini.

8, 9. Inyuki hala a ta bé mbagi i téé sép i ôm Djob nsohi inyu mandutu més? Yoñ hihéga inyu timbhe.

⁸ Nhôôlak mañge munlôm u niñ i ndap bagwal bé. Isañ a ngwés nye ngandak, a nyoñ ki ngéda i niiga nye i yoñ makidik malam. Kel yada, mañge nu a tonbana isañ, a nyodi i ndap. A bôdôl boñ mam mabe. Ndi kiki yom mut a nsal, yon a mbumbul, hala nyen yak mam mabe ma bôdôl kwél nye. Baa u ga ôm isañ nsohi inyu mandutu ma nkwél man wé? Baa hala kiki a ngwel bé man le a nyodi ndap, w’a unbene isañ le nyen a mboñ le mandutu ma kwél man wé? Heni! (Lukas 15:11-13) Kiki isañ mu hihéga hini, Djob a ngwel bé mut binam ngéda a ntep le a ndogbene nye tole a mboñ yom i yé béba. Jon, ngéda béba i nkwo, di hôya bañ kekikel le Djob bé nyen a mboñ le béba jam i kwél bés. Hala a ta bé mbagi i téé sép ibale di ñôm Djob nsohi inyu mandutu més.

⁹ Ngim loñge njom yon i mboñ le Djob a ngi nwahak mam mabe le ma kwél bés. I Pes 11 munu kaat ini, u ga nigil yom Bibel i nkal inyu njom i. Ndi, ba nkwoog nkaa le Djob a ngwés bés, jon di nlama bé unbene nye ngéda di gwé mandutu. Nyetama nyen a nla ki tohol bés ngéda di yé ikété mandutu.​—Yésaya 33:2.

10. Kii nkwés bés nkaa le Djob a ga mélés bibéba bi mam bôt ba mboñ?

¹⁰ Djob a yé Numpubi. (Yésaya 6:3) Hala a nkobla le hiki yom a mboñ i yé loñge, i bak ki ngi nsohi tole peles. Jon di nla bôdôl nye ñem. Ndi, bôt ba binam ba ta bé hala inyule ba mbéna boñ bibéba bi mam. Yak ñénél loñ nu a nlôôha ba telepsép, a nla bé tibil bibéba bi mam bôt ba mboñ. Mut nye ki nye a gwé bé ngui kiki Djob. Djob a gwé ngôñ, a nla ki mélés mandutu momasôna ma nlôl ni bibéba bi bôt. A ga nup béba yosôna i boga ni boga.​—Añ Tjémbi 37:9-11.

LELAA DJOB A NÔGDA MU ÑEM WÉ NGÉDA BÔT BA NOK NDUTU?

11. Lelaa Djob a nôgda mu ñem wé ngéda u nok ndutu?

¹¹ Lelaa Djob a nôgda mu ñem wé ngéda a ntehe mam mabe ma ntagbe munu nkoñ isi ni i niñ yoñ? Bibel i niiga bés le Djob a “ngwés telepsép.” (Tjémbi 37:28) Jon, loñge ni béba i i mbôña hana isi i nlôôha tihba nye ñem. Djob a ñoo a ntehe bôt ba nok ndutu. Bibel i nkal le “hala a siidaha nye ñem” ngéda a bi tehe le nkoñ isi u bi nai ni béba i dilo di Nôa. (Bibôdle 6:5, 6) Djob a nhéñha bé. (Malaki 3:6) Bibel i nkal le Djob a ntôñ toi we.​—Añ 1 Pétrô 5:7.

12, 13. (a) Inyuki di gwé gwéha ni nduña inyu bôt bape, ni lelaa di nôgda ngéda di ntehe bôt bape ba nok ndutu i nkoñ isi? (b) Kii nkwés bés nkaa le Djob a ga mélés mandutu momasôna ni ngitelepsép?

¹² Bibel i nkal ki le Djob a bi heg bés i pôôna yé. (Bibôdle 1:26) Hala a nkobla le bilem bilam Djob a gwé, yak bés di gwé gwo. Jon, ibale hala a nsiida we ñem i tehe biloñge bi bôt bi nok ndutu, yi le yak Djob, hala a nlôôha siida nye ñem. Inyuki di nkal hala?

¹³ Bibel i niiga bés le “Nyambe a yé gwéha.” (1 Yôhanes 4:8) Gwéha yon i ntinde Djob i boñ hiki yom a mboñ. Jon, di gwé gwéha inyule Djob nu a bi heg bés a yé gwéha. Hoñol le jam lini: Ibale u ban-ga ngui i mélés mandutu momasôna ni ngitelepsép i yé ikété nkoñ isi, baa ki u mélés bé mo? Ñ, w’a boñ hala inyule u ngwés mut woñ libôk. Bôô ni ngélé yañen inyu Djob! Nye a gwé ngui, a nlôôha ki gwés bés. Inyu hala nyen a ga mélés mandutu momasôna ni ngitelepsép. Ba nkwoog nkaa le Djob a ga yônôs hiki mbônga u yé i bibôdle bi kaat ini! Ndi, inyu hémle mimbônga mi, i nsômbla le u tibil yi njee Djob a yé.

DJOB A NSÔMBÔL LE U YI NJEE A YÉ

14. (a) Baa jôl li Djob le njee? (b) Kii nyis bés le di nlama gwélél jo?

¹⁴ Ibale u nsômbôl yila liwanda li mut, jam li bisu u mbat nye li yé kii? Jôl jé bé? Baa yak Djob a gwé jôl? Ngandak bibase i nkal le jôl jé le Djob, Nyambe, tole Nwet. Ndi, bibuk bini bi ta bé môl. Bi yé ndigi bitel kiki “Kiñe,” “Kaisa” tole “Isañ nkoñ.” Ndi, Djob a bi kal bés le jôl jé le Yéhôva. Kaat Tjémbi 83:19 i nkal le: “Le ndi ba yi le wetama wen u yé, nu jôl jé li yé Yéhôva, u yé Nungingi ngii isi hiosôna.” Batila Bibel ba bi bôñôl jôl li Djob dikôô di ngélé. Yéhôva a nsômbôl le u yi jôl jé, u gwélél ki jo. A nkal we jôl jé inyu boñ le u yila liwanda jé.

15. Lini jôl le Yéhôva li nkobla le kii?

¹⁵ Ngobol i jôl li Djob le Yéhôva i gwé nseñ ngandak. Jôl li, li nkobla le Djob a nla yônôs hiki mbônga a nti, ni le yom to yada i nla bé sôña le sômbôl yé i yon. Yom to yada i nlédél bé nye. Jon Yéhôva nyetama nyen a nla kadba i jôl li.a

16, 17. Ngobol i bini bibuk i yé le kii: (a) “Bayemlikok”? (b) “Kiñe tjai di boga”? (c) “Nheg”?

¹⁶ Kiki di mbôk añ, kaat Tjémbi 83:19 i nkal inyu Yéhôva le: “Wetama wen u yé Nungingi.” Yak kaat Masoola 15:3 (MN), i nkônde ki le: “A Nwet le Yéhôva Djob, Bayemlikok [tole Nu ngui yosôna], minson nwoñ mi yé minkeñi, mi mbuma ki ñañ; A Kiñe nu boga ni boga, manjel moñ ma téé sép, ma yé ki bañga.” Ini tel le “Bayemlikok” i nkobla le kii? I nkobla le Yéhôva a gwé ngui iloo bôt bobasôna, ni mam momasôna, i ngii ni isi. Yak ini tel le “Kiñe nu boga ni boga” i nkobla le Djob a gwé bé bibôdle to lisuk. Kaat Tjémbi 90:2 i ntoñol le Djob a yé “ibôdôl yaga boga ikepam boga.” Baa hala a ta bé hélha jam?

¹⁷ Yéhôva nyetama nyen a yé Nheg. Kaat Masoola 4:11 i nkal le: “We, a Nwet wés ni Nyambe wés, wen u kôli ni lipém ni bibégés, ni lipémba; inyule wen u heg gwom gwobisôna, inyu sômbôl yoñ ki nyen bi bane, bi héga ki.” Jon, ibôdôl biañgel ni tjôdôt di ngii, ikepam matam ma bie ni tjobi di tuye​—hala wee hiki yom u nla hoñol, yi le Yéhôva nyen a bi heg yo!

BAA U NLA BA LIWANDA LI YÉHÔVA?

18. Inyuki bôt bape ba nhoñol le ba nla bé yila mawanda ma Djob? Ndi kii Bibel i niiga mu jam li?

¹⁸ Ngéda bôt bape ba nigil ikété Bibel le Yéhôva a gwé bilem bi hélha, hala a nkônha bo woñi. Ba mbadba le: “Ibale Djob a nlôôha bana lipémba, a nloo ki me bañga liloog, a bak ki haa ni me mu ngii, umbe nseñ a gwé i tôñ me? Ndi, baa hala nyen Djob a ngwés le di hoñol? Heni! Yéhôva a ngwés le di kôôge nye bebee. Bibel i nkal le Djob “a ta bé nonok [tole haa] ni hi wada wés.” (Minson mi baôma 17:27) Djob a ngwés le u kôôge nye bebee. A mbôn ki le “yak nye a’ kôôge” we bebee.​—Yakôbô 4:8.

19. (a) Lelaa u nla yila liwanda li Djob? (b) Bimbe bilem bilam bi Yéhôva bi nlôôha lémél we?

¹⁹ Lelaa u nla yila liwanda li Djob? Yésu a bi kal le: “Niñ boga ini, le ba yi we bañga mpom Nyambe wada, ni nu u om, le Yésu Kristô.” (Yôhanes 17:3) Ibale u nkena yigil yoñ i Bibel ni bisu, hala a ga hôla we i yi bonjee ba yé Yéhôva ni Yésu. Mbus, u nla ki kôhna niñ boga. Kii héga, u bi nigil le “Nyambe a yé gwéha.” (1 Yôhanes 4:16) Ndi, a gwé ngandak bilem bilam bipe. Bibel i nkal bés le Yéhôva a yé “Nyambe nu konangoo, ni nu karis, nu a mpala bé unup, ndi a nyaba ni loñgeñem ni maliga.” (Manyodi 34:6) Yéhôva a yé “loñge, a nyégi ki i nwéhél.” (Tjémbi 86:5) Djob a yé wongut, a bak ki maliga. (2 Pétrô 3:9; Masoola 15:4) Ngéda u ga soñgol ikété Bibel njee Yéhôva a yé, u ga kônde nigil bilem gwé bilam bipe.

20-22. (a) Lelaa u nla ba liwanda li Djob to hala kii u ntehe bé nye? (b) Kii u nlama boñ ibale bôt bape ba ngwés bé le u kena yigil yoñ i Bibel ni bisu?

²⁰ Kii u ntehe bé Djob, lelaa ni u nla ba liwanda jé? (Yôhanes 1:18; 4:24; 1 Timôtéô 1:17) Ngéda w’a nigil maboñog ma Yéhôva ikété Bibel, w’a léba le a yé ntiik i mis moñ kiki mut we ni nye ni nla bana maada malam. (Tjémbi 27:4; Rôma 1:20) Kii u nkônde nigil i yi Yéhôva, hala nyen u ga hôlôs gwéha yoñ inyu yé, u ga kôôge ki nye bebee.

²¹ U ga nôgda le Yéhôva a yé we Isañ. (Matéô 6:9) A bi ti we niñ, a ngwés ki le u kôhna bañga niñ. Hala nyen hiki isañ nu gwéha a nsômbôl le man wé a ba. (Tjémbi 36:10) Di yé nkwoog nkaa le Bibel i niiga bés le di nla ba liwanda li Yéhôva. (Yakôbô 2:23) Hoñol ki: Yéhôva, Nheg ngii ni isi, a nsômbôl le u ba nye liwanda!

²² Bôt bape ba ga gwés bé le u kena yigil yoñ i Bibel ni bisu. Ba nla kon woñi le u ga héñha base yoñ. Ndi u nwas bañ le mut nye ki nye a kéñ we njel i yila liwanda li Yéhôva. Mut nye ki nye a nla bé ba we bañga liwanda kiki Yéhôva.

23, 24. (a) Inyuki u nlama bé waa bat mambadga? (b) Kii u ga nigil i pes i noñ?

²³ Kiki u nkena yigil yoñ Bibel ni bisu, u ga léba ngandak mam mu le u nok bé. U wo bañ nyuu i bat mambadga tole mahôla. Yésu a bi kal le di nlama bana suhulnyu kiki boñge batitigi. (Matéô 18:2-4) Di nyi le boñge ba mbat mambadga ngandak. Djob a nsômbôl le u léba mandimbhe inyu mambadga u mbadba. Jon, nigil Bibel bañga bañga inyu kwo nkaa le yom u nigil i yé maliga.​—Añ Minson mi baôma 17:11.

²⁴ Yigil Bibel yon i nhôla i yi njee a yé Yéhôva. Njel ipe i i nlel yo i ta bé. Ikété pes i noñ, u ga léba inyuki Bibel i mpôôna bé kaat ipe yo ki yo.