Yésu a ntéé likalô I Galiléa, a ñuñgus ki baôma bé

Hala a yé nwii ima le Yésu a ntéé likalô ngandak. Baa ngéda ini le a hôyôs likalô, a noi? Heeni. Maselna ni hala, Yésu a nkéñbaha nson wé likalô, a nke “bitison gwobisôna ni mambai momasôna, a niigaga i mandap ma bibégés, a añlak ñañ nlam u Ane, a mélhak ki mintén mi makon nwominsôna ni bibôk bi bôt gwobisôna.” (Matéô 9:35) I jam a ntehe li nkwés nye nkaa le a nlama kéñbaha nson wé u likalô. Ndi lelaa a nla yônôs wo?

Mu liké jé, Yésu a ntehe bôt ba gwé ngôñ ni mbôô ni hogbe i pes mbuu. Ba yé kiki mintômba mi mi gwé bé nkena, nkogok ni nyôyôk. Konangoo i ntinde Yésu i kal banigil bé le: “Ñ, libumbul li yé likeñi, ndi basal bôlô ba yé ndék. Jon, soohana Nwet libumbul le a ep basal bôlô mu libumbul jé.”​—Matéô 9:37, 38.

Yésu a nyi kii i ga hôla bo. A nsébél baôma bé 12, a ha bo iba iba. I mbus a ti bo bini biniigana: “Ni yoñ bañ njel i nke yak bôt ba matén mape, ni jôp bañ to ikété tison i bôt ba Samaria yo ki yo; ndi kena ibabé waa yak minimlak mi mintômba mi ndap Israel. Mu kiki ni nke, ni téé likalô, ni kalak le: ‘Ane i ngii i nkôôge bebee.’”​—Matéô 10:5-7.

I Ane ba nlama añal i yé Ane Yésu a bi pôdôl mu ndémbél yé masoohe. ‘Ane i nkôôge bebee’ ni njel ini le Kiñe Djob a bi pohol le Yésu Kristô a yé ni bo. Kii i ga unda le banigil bé ba yé toi bakôdôl ba Ane i? Yésu a nti bo ngui i mélés makon ni i tugul bawoga. Ba mboñ hala yañga. Lelaa baôma ba ga boñ inyu kôhna mam ma niñ, kiki bo koga kel?

Yésu a nkal banigil bé le ba yoñ bañ yom yo ki yo inyu likalô. Ba yoñ bañ gôl, to silba, to mamuna mu bibot gwap. Ba gwé bé ki to ngôñ ni bijek inyu liké jap, to mbot, to bitamb bipe. Inyuki? Yésu a nlédés bo, a kal bo le: “Nsal bôlô a kôli ni bijek gwé.” (Matéô 10:10) I bôt nwin wap u ga lémél, ba ga ti bo yom ba gwé ngôñ. Yésu a nkal bo le: “To imbe ndap ni njôp, yéna mu letee ni nyodi ha homa nu.”​—Markô 6:10.

Yésu a ñunda ki bo lelaa ba nlama boñ inyu kwélés bôt ba ndap nwin u Ane. A nkal le: “I ngéda ni njôp i ndap, ni yéga bôt ba ndap. Ibale ndap i kôli, wee nsañ nan u lo i ngii yé; ndi ibale i kôli bé, wee nsañ nan u témb i bééni. Nu ni nu a nleege bé bé to emble bibuk binan, i ngéda ni mba ni nyodi mu ndap i tole mu tison i, ni kumb lipum li biték li li yé mu makôô manan.”​—Matéô 10:12-14.

I nla ki pam le tison yosôna tole ngim mbai yosôna i ntjél nwin wap. Kii i ga pémél nya homa i? Yésu a ñunda le b’a bana bikééhene bi ngui, a ntoñol le: “Me nkal bé maliga le: I kogse y’a kwél nkoñ u Sôdôm ni Gômôra i Hilo hi Mbagi y’a hoi iloo kogse y’a kwél i tison i.”​— Matéô 10:15.