Baa hee di nke ngéda di nwo?

1-3. (a) Mambe mambadga bôt ba mbadba inyu nyemb? (b) Mambe mandimbhe ngim bibase i nti?

BIBEL i mbôn bés le kel yada, “nyemb y’a ba ha bé.” (Masoola 21:4) Di nigil i Pes 5 munu kaat ini le, binoñ bi nyible bés njel i niñ boga. Ndi, bôt ba ngi wok i len ini. (Ñañal 9:5) Jon, di mbat ini mbadga i yé nseñ ngandak le: Kii ntagbe ngéda mut a nwo?

² Ndimbhe i mbadga i, i yé nseñ ngandak téntén ngéda di nimis mut di ngwés. Di yé di badba le: Baa hee a nke? Baa a ntehe bés? Baa a nla hôla bés? Di ga tehe ki nye kel yada?

³ Bibase bi ntimbhe mambadga ma nya ndi nya. Ngim bibase i niiga le ngéda mut a nwo, ibale a bak loñge mut, a nke ngii. Ndi ibale a bak béba mut, a nke i bee hié. Bihogi bi niiga le ibale mut a nwo, a nyila mbuu, a bôdôl niñ ni bôt bé ba lihaa ba ba bi bôk ba wo. Bibase bipe ki bi niiga le ngéda mut a nwo, ba nkéés nye, mbus a témb a gwéé tole a témb i niñ ni nyuu ipe, bebeg ni nyuu i nuga tole i mut numpe.

4. Limbe jam li tôbôtôbô bibase bi niiga inyu nyemb?

⁴ Bibase bi gwé bé biniigana gwada. Ndi, bebee le gwobisôna bi niiga jam jada li li yé tôbôtôbô. Bi niiga le ngéda mut a nwo, ngim yom ikété yé i nkônde niñ. Ndi, baa hala a yé maliga?

BAA HEE DI NKE NGÉDA DI NWO?

5, 6. Kii ntagbe ngéda mut a nwo?

⁵ Yéhôva a nyi kii ntagbe ngéda mut a nwo. Jon, a niiga bés le ngéda mut a nwo, a niñ ha bé hies. Nyemb ni niñ bi yé maselna. Jon, ngéda mut a nwo, boña wé a nsal ha bé, a nhoñol ha bé ki to jam.a Ngéda mut a nwo, a nla ha bé tehna, a nla bé to nok, a nla ha bé ki hoñol.

⁶ Kiñe Salômô a bi tila le: “Bawoga ba nyi bé to jam.” Bawoga ba nla bé gwés, to oo ba nla bé oo mut, “inyule nson u ta bé, to mahoñol, to yi, to pék nyoo Séôl (tole soñ).” (Añ Ñañal 9:5, 6, 10.) Bibel i niiga ki i kaat Tjémbi 146:4 le, ngéda mut a nwo, yak “mahoñol mé ma mal.”

JAM YÉSU A BI NIIGA INYU NYEMB

7. Kii Yésu a bi niiga inyu nyemb?

⁷ Ngéda Lasarô, loñge yé liwanda li bi wo, Yésu a bi kal banigil bé le: “Ngwa yés Lasarô a nke ’ilo.” Ndi, hala a nkobla bé le Yésu a bé kal le Lasarô a bé ke toi ’ilo. Jon a bi tibil toñol le: “Lasarô a nwo.” (Yôhanes 11:11-14) Yésu a bé kal ndigi le nyemb i yé kiki hilo. A bi kal bé le Lasarô a nke ngii, tole a nke i boma bôt bé ba lihaa ba ba bi wo. A bi kal bé to le Lasarô a yé nok njôghe ikété bee hié, tole a ntémb a gwéé ni nyuu nuga tole nyuu i mut numpe. Heni! A bi kal ndigi le Lasarô a yé kiki mut nu a yé ’ilo sum sum. Bipes bi Bibel bipe bi ñunda le nyemb i yé kiki bañga bañga hilo. Kii héga, Bibel i nkal le ngéda ba bi nol Stéfanô, “a ke ’ilo.” (Minson mi baôma 7:60) Yak ñoma Paul a bi tila le bikristen bipe bi “bi ke ’ilo” ikété nyemb.​—1 Korintô 15:6.

8. Kii nyis bés le Djob a bi heg bé bôt ba binam le ba wo?

⁸ Baa Djob a bi heg Adam bo Éva le ba wo? To! Yéhôva a bi heg bo le ba kon maséé i boga ni boga, ba ban-ga ki mbôô u bôt ba yé peles. Ngéda Yéhôva a bi heg bôt ba binam, a bi heg bo ni ngôñ i niñ i boga ni boga. (Ñañal 3:11) Nlélém kiki bagwal ba ta bé maséé i tehe bon bap ba nkon tole ba nwo, hala nyen Yéhôva a nôgda inyu yés ngéda bôt ba nwo. Ndi, ibale Djob a bi heg bés le di niñ i boga ni boga, inyuki di nwo ni?

INYUKI DI NWO?

9. Kii nyis bés le mbén Yéhôva a bi ti Adam bo Éva i bé bé ndutu i noñ?

⁹ I wom Éden, Yéhôva a bi kal Adam le: “U yé kunde i je matam ma hi e mu wom; ndi u jek bañ matam ma e i yi loñge ni béba; inyule i kel u nje mo, wee u nwo.” (Bibôdle 2:9, 16, 17) I mbén i, i bé bé ndutu i noñ. Yéhôva a bééna kunde i kal Adam bo Éva kii i yé loñge ni kii i yé béba. Ibale ba nôgôl Yéhôva, ki ba bi unda le ba nti tel yé lipém, ni le ba nti nye mayéga inyu mam momasôna a bi ti bo.

10, 11. (a) Bimbe bitembee Satan a bi añle Adam bo Éva? (b) Inyuki nwéhél i ta bé inyu yom Adam bo Éva ba bi boñ?

¹⁰ Ndi Adam bo Éva ba bi pohol i ndogbene Yéhôva. Satan a bi bat Éva le: “Baa hodo le Nyambe a kal le, ni je bañ matam ma bie gwobisôna mu wom?” Éva a bi timbhe nye le: “Di yé le di je mu matam ma bie bi wom; ndi mu matam ma e i i yé ngembe wom, Nyambe a bi kal le, ni je bañ mu, to tis ni tis bañ yo, ni tiga le ni wo.’”​—Bibôdle 3:1-3.

¹¹ Ha nyen Satan a bi kal le: “N’a wo yaga bé; inyule Nyambe a nyi le kel ni nje mu, ha nyen mis manan m’a yiblana, bé ki n’a ba kii Nyambe le ni yik loñge ni béba.” (Bibôdle 3:4-6) Satan a bé yéñ le Éva a hoñol le a gwé kunde i kit ni nyemede kii yé loñge ni kii yé béba. I nlélém ngéda a bi tembene nye, a kal bé nye yom i nke kwél nye ibale a ndogbene Djob. Ndi Satan a bi kal Éva le a ga wo yaga bé. Jon Éva a bi je litam li, a ti yak nlô wé. Adam bo Éva ba bé yi loñge le Yéhôva a bi kal bo le ba je bañ litam li. Ndi, ngéda ba bi je jo, ba bi pohol i ndogbene mbén i i bé bé ndutu i noñ. Ba bi unda ki le ba nyan Isañ wap nu gwéha nu a yé i ngii. Ba bé kôli bé bana nwéhél inyu jam ba bi boñ.

12. Inyuki hala a bi wéha Yéhôva nyuu ngéda Adam bo Éva ba bi ndogbene nye?

¹² Kinje wonyu Adam bo Éva ba bi ti Nheg wap! Hégda le u nsal ni ngui inyu néñés mañge munlôm ni mañge muda, ndi ba sôk ba ndogbene we, ba boñ jam u nkal bo le ba boñ bañ. Baa w’a nôgda lelaa mu ñem woñ? Hala a ga babaa nga we?

13. Ngéda Yéhôva a bi kal le “w’a témb ki nluñ ték,” kii hala a bé kobla?

¹³ Ngéda Adam bo Éva ba bi ndogop, ba bi nimis botñem i kôhna niñ boga. Yéhôva a bi kal Adam le: “Inyule u yé nluñ ték, w’a témb ki nluñ ték.” (Añ Bibôdle 3:19.) Hala a nkobla le Adam a ga témb a yila nluñ ték, kii ngéda ba bé ngi heg nye. (Bibôdle 2:7) Ngéda Adam a bi boñ béba, a bi wo, hala wee niñ yé i bi mal.

14. Inyuki di nwo?

¹⁴ Ibale Adam bo Éva ba nôgôl Djob, ki ba ngi yii niñ i len ini. Ndi kiki ba bi ndogbene nye, ba boñ béba, jon ba bi kahal wo. Béba i yé kiki ngim kon le di nkôdôl ni bagwal bés ba bisu. Bés bobasôna di bi gwéé ikété béba, inyu hala nyen di nwo. (Rôma 5:12) Ndi hala a ta bé bitééne bi Djob inyu bôt ba binam. Kekikel, sômbôl i Djob i mah bé ba le bôt ba binam ba wo. Jon Bibel i nsébél nyemb le “ñoo.”​—1 Korintô 15:26.

MALIGA MA NYILHA BÉS NGWÉLÉS

15. Lelaa maliga inyu nyemb ma nyilha bés ngwélés?

¹⁵ Maliga inyu bawoga ma bi yilha bés ngwélés i kolba biniigana bi bitembee. Bibel i niiga bés le bawoga ba nok bé njôghe, to ñem wap u nsiida bé. Di nla bé pôdôs bo, to bo ba nla bé pôdôs bés. Di nla bé hôla bawoga, to bo ba nla bé hôla bés. Bawoga ba nla bé boñ bés béba, jon di gwé bé le di kon bo woñi. Ndi, ngandak bibase i niiga le bawoga ba niñ ngim homa, ni le di nla hôla bo ibale di nti bipada moni tole bet ba nkadba le ba yé bôt ba Djob. Ndi, ngéda di nyi maliga inyu nyemb, bitembee bi bi nla ha bé yumus bés.

16. Imbe tembee ngandak bibase i niiga inyu bawoga?

¹⁶ Satan a ngwélél base i bitembee inyu lôk bés, ni boñ le di hoñol le bawoga ba ngi yii i niñ. Kiki héga, ngim bibase i niiga le ngéda di nwo, yom ikété yés i mpam inyu ke niñ homa numpe. Baa jam li jon base yoñ i niiga? Tole i niiga we maliga ma Bibel inyu nyemb? Satan a ngwélél bitembee inyu tinde bôt i kôm Yéhôva mbus.

17. Inyuki bini biniigana le bôt ba nlék i bee hié bi ñôbôs jôl li Yéhôva?

¹⁷ Mam ngandak bibase i niiga ma nkônha woñi. Kiki héga, bibase bipe bi niiga le bibéba bi bôt bi nke lék ikété bee hié i boga ni boga. Hala a yé bitembee bi ñôbôs Yéhôva jôl. Kekikel, Djob a ga neebe bé le bôt ba binam ba son nya njonok i! (Añ 1 Yôhanes 4:8.) Hégda le mut, inyu kogse man wé, a nha moo ma man ikété hié. Lelaa w’a tehe nya mut i? Baa hala a ga hénd bé we ñem? W’a bana bé to ngôñ i ba liwanda ni ntén mut u. Ndi, hala nyen Satan a ngwés le di tehe Yéhôva!

18. Inyuki di nlama bé kon bawoga woñi?

¹⁸ Bibase bihôgi bi niiga le ngéda bôt ba nwo, ba nyila mimbuu. Bibase bi, bi niiga le bôt ba nlama ti mimbuu mi lipém, ni le ba nlama kon nwo woñi inyule mi nla yila mawanda map makeñi tole baoo bap. Ngandak bôt i nhémle bitembee bi. Ba nkon bawoga woñi, jon ba mbégés bo iloole ba bégés Yéhôva. U hôiga bañ le bawoga ba nyi ha bé to jam, jon di nlama bé kon bo woñi. Yéhôva a yé Nheg wés. Nyen a yé bañga Djob. Nyetama ndik nyen di nlama bégés.​—Masoola 4:11.

19. Lelaa maliga inyu nyemb ma nhôla bés?

¹⁹ Ngéda di nyi maliga inyu nyemb, di ta ha bé ki minkol mi bitembee bibase bi niiga. Maliga ma, ma nhôla bés i nok mimbônga minlam Yéhôva a nti inyu niñ yés ni inyu dilo di nlo.

20. Kii di ga nigil mu pes i noñ?

²⁰ Hala a yé ntandaa ngéda i len ini, le ngwélél Djob wada ba nsébél le Hiôb a bat le: “Ibale mut binam a nwo, baa a’ kônde ki niñ?” (Hiôb 14:14) Baa mut nu a nwo a nla toi témb i niñ? I ndimbhe Djob a nti bés ikété Bibel i nlona bés ngandak maséé. Pes i noñ, i ga kal bés inyuki.