Lelaa makoda ma Mbôgi Yéhôva ma nla hôla we?

Baa ba ma naña we i makoda ma Mbôgi Yéhôva? Ibale ngélé yoñ bisu i le u kee makoda map, bebek u nla kon woñi. U nla badba le: ‘Kii i ntagbe mu makoda ma? Inyuki ma yé nseñ? Inyuki me nlama ke makoda?’ Munu yigil ini, di ga tehe le makoda ma ga hôla we i kônde lédés liwanda joñ ni Yéhôva, m’a hôla ki we mu niñ yoñ.

1. Inyuki Mbôgi Yéhôva i nkodba?

Béñge lelaa ntila Bibel wada a mpôdôl nseñ u makoda: “M’a bégés Yéhôva ikété likoda likeñi.” (Tjémbi 26:12) Kiki bagwélél ba Djob ba ngéda kôba, i nkoñ ’isi wonsôna i len ini, Mbôgi Yéhôva i nkon maséé i kodba hiki sonde inyu bégés Djob, i tubul nye tjémbi ni i soohe nye. Hiki nwii, ba nkodba ngim mangéda inyu makoda makeñi.

2. Kii u nla nigil i makoda més?

I makoda, di nigil Bañga i Djob, “ba ntoñlak yo loñge ba pémhak biniigana mu.” (Añ Néhémia 8:8.) Ibale u nlo makoda més, u ga nigil i yi Yéhôva ni bilem gwé. Kiki w’a tehe ipam limbe likala a ngwés we, w’a kôôge bebee ni nye. W’a léba ki le Yéhôva a nla hôla we i bana niñ i maséé.​—Yésaya 48:17, 18.

3. Lelaa i bôt we ni bo ni nkodba ba nla hôla we?

Yéhôva a nkal bés le “Di tôñgna ki bés ni bés kayéle hiki wada a tinde numpe i gwéha ni minson minlam, di tjôô bañ to makoda més.” (Lôk Héber 10:24, 25) I makoda més, w’a boma bôt ba ba ntôñ toi bape. Kiki we, i bôt ba ba ngwés ba nigil Bibel. W’a kôhna makénd ngéda w’a emble mandimbhe map. (Añ Rôma 1:11, 12.) W’a bana ki pôla i yi ngandak bôt ipe i i yé maséé to ibale i mboma ngandak mandutu. Inyu hala nyen Yéhôva a ngwés le di kodba hiki ngéda.

KÔNDE TÉM

4. Makoda ma Mbôgi Yéhôva

Bikristen bi hiai hi bisu bi bé kodba hiki ngéda inyu bégés Yéhôva. (Rôma 16:3-5) Añ Kôlôsé 3:16, i mbus ni kwélél mbadga ini:

• Lelaa bikristen bi bisu bi bé bégés Yéhôva?

VIDÉÔ: Kii i ntagbe i Ndap Ane? (2:12)

• Mambe maada ma yé ipôla i vidéô ini ni Kôlôsé 3:16?

• Munu vidéô ini tole munu titii ini, baa u ntehe jam lipe li li nlémél we?

Añ 2 Korintô 9:7, i mbus ni kwélél mbadga ini:

• Inyuki Mbôgi Yéhôva i mbat bé bôt moni i makoda map?

We ni mut a niiga we Bibel, ni béñge kii i ga tagbe i likoda li noñ.

• Imbe pes likoda u ntehe le i ga bane we nseñ?

Baa u yik laa?

I jw.org, u nla léba i homa makoda ma ntagbe i nkoñ ’isi wonsôna ni ngeñ.

1. Makoda més ma gwé minkwel, bividéô, ma niiga ki bés i añal ñañ nlam ni i niiga bôt bape. Ma mbôdôl, ma malak ni hiémbi ni masoohe

2. Ngim mangéda, i mankéé a yé hikôma a naña i bôt ba yii i ti mandimbhe

3. Bôt bobasôna ba nla lo makoda més, hala wee, mahaa, bet ba ta bé mbiibaga, mimañ mi bôt yak boñge

4. I makoda més, ba mbat bé moni, Mbôgi Yéhôva i gwé bé ki to njañgi

5. I mbéda biliya inyu ke makoda

Di béñge le hihéga hi lihaa li Yésu. Hiki nwii, ba bé ba ke liké li dilo diaa i ngii dikôa, i nyodi i Nasaret ipam i Yérusalem inyu tégbaha likoda i témpel [100 km]. Añ Lukas 2:39-42, i mbus ni kwélél mambadga mana:

• Baa u nhoñol le i bé béda biliya inyu ke liké li?

• Inyuki yak we u nlama boñ biliya inyu ke makoda?

• Baa u nhoñol le i yéne we nseñ i ke makoda to ibale hala a nlet? Inyuki?

• Inyuki u nlama ke makoda hiki ngéda?

I SEM KWEP

I ke makoda i ga hôla we i nigil ngandak mam inyu Yéhôva, i lédés maada moñ ni nye ni i bégés nye ni bôt bape.

Mambadga ma mbigda

• Inyuki Yéhôva a nti bés makénd i ke makoda?

• Kii u ga nigil i makoda ma Mbôgi Yéhôva?

• Baa u nhoñol le makoda ma nla yak hôla we i niñ yoñ?

KÔNDE YÉÑ

Baa u nkon woñi i ke makoda? Béñge lelaa mut nu a bé kon woñi kiki we a bi sôk a gwés makoda.

Kekikel di ga hôya bé maleege map (4:16)

Béñge lelaa mañge wanda wada a nkon maséé i ke makoda, ni biliya a bi boñ le a tôl ha bañ makoda.

Me bi lôôha gwés makoda! (4:33)

Béñge jam bôt bape ba nhoñol inyu makoda.

“Inyuki di nlama ke i makoda i Ndap Ane?” (kee i jw.org)

Béñge lelaa ntonba wada u bi héñha ngéda a bi bôdôl ke makoda ma Mbôgi Yéhôva.

“Me bé hiôm bé ngi ngaa yem” (Nkum Ntat, 1 Njéba 2014)