Lelaa ñañ nlam u ñañlana?

Ndék ngéda Yéhôva a ga mélés mandutu més momasôna ni njel Ane yé. I nwin u, u nlôôha ba nlam kayéle di nla bé tééda wo inyu yés bésbotama. Yésu a nsômbôl le banigil bé ba añle bôt bobasôna i ñañ unu! (Matéô 28:19, 20) Lelaa Mbôgi Yéhôva i ñéba le i nôgôl i oda i Yésu ini?

1. Lelaa Matéô 24:14 a nyon i len ini?

Yésu a bi kal le: “Unu ñañ nlam u Ane w’a añlana ni nkoñ ’isi wonsôna.” (Matéô 24:14) Mbôgi Yéhôva i yé maséé i yoñ ngaba mu nson mahee unu. Di ñañal ñañ nlam i nkoñ ’isi wonsôna ikété iloo 1 000 dilémb! Inyu boñ le bôlô ini i séla, i mbéda biliya bi ngui ni loñge ntjega. I nla bé séla ibale Yéhôva a nhôla bé bés.

2. Bimbe biliya di mboñ inyu añle bôt ñañ nlam?

Di ñañal ñañ nlam to numbe homa bôt ba yé. Nlélém kiki bikristen bi hiai hi bisu, di ñañal ñañ nlam “i mandap ni mandap.” (Minson mi baôma 5:42) Ni njel i, di mpam i boma didun di bôt hiki nwii. Ndi kiki bôt ba mbéna bé ba mandap, di ntéé yak likalô li mbamba. Hiki ngéda, di nyéñ manjel inyu toñle bôt njee a yé Yéhôva ni mam a nsômbôl boñ inyu bôt ba binam.

3. Njee a nlama añal ñañ nlam?

Bañga bikristen yosôna i nlama añal ñañ nlam. I nson u, u yé mahee ngandak, jon di mboñ biliya gwobisôna inyu gwel wo. Hiki mut a ñañal ñañ nlam kiki la yé, inyule di nyi le likalô jés li nla sôñ biniñ bi bôt. (Añ 1 Timôtéô 4:16.) Ba nsaa bé bés inyu gwel nson unu, inyule Bibel i nkal le: “Ni bi kôs yañga, tina yañga.” (Matéô 10:7, 8) Bôt bobasôna ba ñemble bé bés, di nke ni bisu i gwel nson u, inyule likalô li yé njel yada di ngwélél inyu bégés Yéhôva, ni inyu kônha nye maséé.

KÔNDE TÉM

4. Di mboñ biliya i tééne bôt bobasôna likalô

VIDÉÔ: I téé likalô “letee ni masuk ma hisi” (7:33)

• Kii i ntihba we ngéda u ntehe biliya Mbôgi Yéhôva i mboñ inyu añal ñañ nlam?

Añ Matéô 22:39 ni Rôma 10:13-15, i mbus ni kwélél mambagda mana:

• Ngéda di ñañle bôt bés ba libôk ñañ nlam, lelaa hala a ñéba le di ngwés bo?

• Lelaa Yéhôva a ntehe i bôt ba ñañal ñañ nlam? (Béñge Rôma 10:15.)

5. Di ngwel nson lôñ yada ni Djob

Ngandak miñañ i ñéba le Yéhôva nyen a ñéga bôlô yés. Kiki ’héga, i Ziland Yondo, Paul a bi boma muda wada i likalô li mandap ni mandap i mbus kosi. I kekela i, i muda nu a bi soohe, a gwéélak jôl li Djob le Yéhôva. A bi bat Djob le mut a loo a yuuga nye. Mankéé Paul a nkal le: “Ngeñ aa i mbus masoohe mé, me kôôde likôga jé.”

Añ 1 Korintô 3:9, i mbus ni kwélél mbadga ini:

• Lelaa miñañ kiki u u bi tagbe i Ziland Yondo, u ñéba le Yéhôva a ñéga likalô?

Añ Minson mi baôma 1:8, i mbus ni kwélél mbadga ini:

• Inyuki di gwé ngôñ ni mahôla ma Yéhôva inyu añal ñañ nlam?

Baa u yik laa?

I likoda jés li ñem sonde, ba niiga bés i téé likalô. Ibale u ma lo mu makoda ma, kii u nhoñol inyu suklu i?

6. Di nôgôl Djob ngéda di ñañal ñañ nlam

I hiai hi bisu, baoo ba bi noode sôña banigil ba Yésu i añal ñañ nlam. Bikristen bi hiai hi bisu bi bi “nsôñ ñañ nlam i bisu bi bangomin inyu bana kunde i tjam wo.” (Filipi 1:7) Mbôgi Yéhôva i mboñ nlélém i len ini.a

VIDÉÔ: Ba nsôñ ñañ nlam i bisu bi bikééhene (2:28)

Añ Minson mi baôma 5:27-42, i mbus ni kwélél mbadga ini:

• Inyuki di ta bé le di waa añal ñañ nlam?—Béñge minlôñ 29, 38, ni 39.

I SEM KWEP

Yésu a bi ti banigil bé oda le ba añal ñañ nlam i biloñ gwobisôna. Yéhôva a nhôla bagwélél bé i gwel nson u.

Mambadga ma mbigda

• Lelaa Mbôgi Yéhôva i ñañal ñañ nlam i nkoñ ’isi wonsôna?

• Lelaa nson u ñañ nlam u ñéba toi le di ngwés bôt bés ba libôk?

• Baa u nhoñol le nson u ñañ nlam u ntina maséé? Inyuki?

KÔNDE YÉÑ

Béñge lelaa Mbôgi Yéhôva i ñañal ñañ nlam i bitison bikeñi.

Likalô li tôbôtôbô ni bikak bi bikaat i tison Paris (5:11)

Lelaa Mbôgi Yéhôva i nhôla i bet ba nke loñ yap ngwéé?

I mélés nyus i ba ke gwét ngwéé i pes mbuu (5:59)

Béñge maséé sita yada i bi kôhna inyule i bi pohol i añal ñañ nlam niñ yé yosôna.

Me yé maséé le i bôlô i yon me bi pohol (6:29)

Béñge lelaa minkaa lôk kéé i bi net i bisu bi bikééhene, mi bi hôla bo i ke ni bisu i añal ñañ nlam

“Les prédicateurs se défendent devant les tribunaux” (Le Royaume de Dieu en action!, chapitre 13)