Nyiña inyu kaat i likoda li niñ yés ni nson wés
© 2024 Watch Tower Bible and Tract Society of Pennsylvania
4-10 MAYE SÉP
MASÔÔ MA NKUS MA BIBEL | TJÉMBI 105
“A mbigda malômbla mé i boga ni boga”
Lelaa di nla kônde ba nkwoog nkaa le mbônga u Yéhôva i mbok yondo u ga yon?
11 Di tehe ngim mam Yéhôva a bi bôn bagwélél bé ba ngéda kôba, ma bôt ba binam ba bé hoñlak le i nla bé yon. A bi kal Abraham bo Sara le ba bana man biuni gwap. (Bibôdle 17:15-17) A kal ki Abraham le a ga ti mbôda yé hisi hi Kanaan. Mu ntandaa ngéda u wonsôna, bon ba Abraham le Lôk Israel i bé minkôm Égiptô, a bé ndigi wengoñle mbônga u Yéhôva u ga yon bé kekikel. Ndi u bi sôk u nyon. I mbus ngéda, Yéhôva a bi legel le i mañ muda unu le Élisabet w’a bana man. A kal yak Maria nu a bé ngi yi bôlôm le a gwal Man Nyambe nu Yéhôva a bi bôn le a’ loo, dikôô di nwii i bisu bi ngéda i wom Éden, yak i mbônga u u bi yon!—Bibôdle 3:15.
12 I ngéda di ntehe mimbônga nwominsôna Yéhôva a bi yônôs i ngéda kôba, hala a nkwés bés nkaa le a gwé ngui, ni le a ga yônôs yak mbônga u mbok yondo. (Añ Yôsua 23:14; Yésaya 55:10, 11.) Hala a nhôla yak bés i yi kii di kal inyu hôla bôt bape i nok le mbônga u mbok yondo u ta bé eem, to digaana. Yéhôva nyemede a nkal inyu mbônga wé i nlona ngii yondo ni hisi yondo le: “Bibañga bini bi yé maliga, bi yé ki ntiik.”—Masoola 21:1, 5.
it-2 493 § 9
Bañga
Bihégél bi bi niñ ni bi bi nyiñha bé, bi yé isi énél i Bañga Djob. A nla gwélél gwo inyu yônôs bitééne gwé. (Tjémbi 103:20; 148:8) Bañga yé i yé ntiik. I ngéda Djob a mbôn jam, a nyônôs jo. (Ndiimba Mbén 9:5; Tjémbi 105:42-45) Kiki nyemede a nkal, bañga i Yéhôva i “nom i boga ni boga”; kekikel i ga témb bé i nyeni ibabé le i yônôs ndugi i jam Djob a gwé ngoñ.—Yésaya 40:8; 55:10, 11; 1 Pétrô 1:25.
Tik ngok i mbuu
w86 1/11 19 § 15
Kii boñge ba wanda ba nlama boñ inyu boñ le lihaa li ba maséé?
15 “Ba bi ha nye [Yôsep] makôô ikété dikéñ, ba ha nye nsañ u bikei i joo; letee ni i ngéda bañga i Nyambe i bi yon, lipôdôl li Yéhôva jon li bé pubus nye.” (Tjémbi 105:17-19) Yôsep a bi son njonok, a bak nkol 13 nwii, nwaa le Yéhôva a nyônôs mbônga wé. I jam li, li bi lédés nye, li hôla ki nye i kônde hol i pes mbuu. To hala kiki Yéhôva bé nyen a bé boñ le a nok ndutu, a bééna manjom malam i neebe le i mam ma, ma pémél Yôsep. Baa, Yôsep a bé lama ke ni bisu i bôdôl “bañga i Yéhôva” ñem to hala kiki a bééna mandutu makeñi? Baa a bé lama ke ni bisu i hôlôs bilem bilam gwé kiki bo hônba, ni suhulnyuu? Baa a bé lama bana ngui ni mban inyu gwel nson u? Di nla kal le Yôsep a bi yémbél i ndutu i. A bé kiki gôl i i mpémél ikété juu. A bé tik i mis ma Djob nu a bi gwélél nye i nya i yé hélha i mbus ngéda.—Bibôdle 41:14, 38-41, 46; 42:6, 9.
11-17 MAYE SÉP
MASÔÔ MA NKUS MA BIBEL | TJÉMBI 106
“Ba bi hôya Nyambe, Ntohol wap”
‘Njee a yé i pes i Yéhôva?’
13 Bon ba Israel ba bi kon woñi ngandak i bisu bi hinda hiida, ni mana mam mape ma hélha ma bé unda le Djob nyemede a bé ha. Jon Môsi a neebe i kwel ni Yéhôva Hikôa Sinai inyu yap, ngéda ba bat nye mahôla mu jam li. (Manyodi 20:18-21) Môsi a bi nom ntandaa ngéda ngii hikôa. Baa hala a bé wengoñle bon ba Israel ba bé nhelek i ñoñ ngi ñéga wap? I nene le hémle i bôt ba litén i bééna ndik ngui ngéda Môsi a bé ha. Jon hala a bi tééñga bo kayéle ba kal Arôn le: “Telep, uñghene bés banyambe b’a bôk bés bisu; inyule Môsi nunu, mut a bi nyodna bés loñ Égiptô, di nyi bé jam li mboñ nye.”—Manyodi 32:1, 2.
Tik ngok i mbuu
w06 15/7 13 § 9
Balôm ba matode ba kaat yônôs aa ni i yônôs ina i kaat Tjémbi
106:36, 37. Minlôñ mini mi mboñ maada ipôla i bégés bisat ni i ti mimbuu mimbe bisesema. Hala a ñéba le i mut a ngwélél bisat, a nla ba isi bémbe i mimbuu mimbe. Bibel i nti bés mana maéba le: “Yoña yihe ni bisat.”—1 Yôhanes 5:21.
18-24 MAYE SÉP
MASÔÔ MA NKUS MA BIBEL TJÉMBI 107-108
“Tina Yéhôva mayéga inyule a yé loñge”
w07 15/4 20 § 2
Likoda jolisôna li bégés Yéhôva
2 Likoda li ta ndik bé ngim homa i het bôt ba mbomna inyu tégbaha loñge ngéda, li ta bé ntôñ u bôt ba ba nlôl i nlélém homa, ba gwéhék minlélém mi mam. Njômbi i bisu i likoda i yé le di bégés Yéhôva. Ibôdôl behee, kaat Tjémbi i nit i jam li. Di ñañ i kaat Tjémbi 35:18 le: “M’a ti we mayéga ikété likoda likeñi; m’a bégés we ikété limut li bôt.” Nlélém yak Tjémbi 107:31, 32 a nti bés mana makénd: “Bôt ba béghak Yéhôva inyu loñge yé ñem ni inyu minson mi hélha a mbôñôl bon ba bôt. Bôt ba ti nye lipém i homa litén li nkodba.”
w15 15/1 9 § 4
Ti Yéhôva mayéga, u kôhna bisai
4 Inyu bana lem i ti mayéga, di nlama yimbe i mam malam Yéhôva a mbôñôl bés. Di nlama yimbe bisai a nti bés, di ti ki mayéga inyu mam ma. I mbus, di ôt pék mu i mam Yéhôva a mbôñôl bés ni loñgeñem .—Añ Tjémbi 40:5; 107:43.
Tik ngok i mbuu
it-2 303 § 5
Môab
Ngandak nwii i mbus, i ngéda David a bi yila kiñe, gwét bi bi tiimba bôô ipôla bon ba Israel ni bon ba Môab. Ba bi yémbél bon ba Môab, ba ba nyégsaga i saa David tas. I nene le i mamélél ma gwét, David a bi nol môga ima ma bôt ikété môga maa, a nwas lini jôga lipe i niñ. I nene ki le David a bi niñ bo isi, nlôñ, a hek nlôñ wap ni nkôô inyu yi limbe libim li bôt a bé lama nol. Ni limbe libim a yék i niñ. (2 Samuel 8:2, 11, 12; 1 Miñañ 18:2, 11) Bebek mu i gwét bi nyen, Bénaya man Yéhôyada “a bi nol bon bôlôm bo iba ba Ariel nu Môab.” (2 Samuel 23:20; 1 Miñañ 11:22) Kiki David a bi yémbél bon ba Môab, hala a bi yônôs bibañga Balaam a bi pot 400 nwii i bisu bi ngéda le: “Hiôdôt hi ga pémél yak Yakôb, ntoñgo kei w’a telep, u lôlak i Israel. A ga bôk mbom i Môab, yak ni kégéé ño i bajogwét ba ba yé lôs.” (Ñañga bôt 24:17) Bebek ntôp tjémbi a bi bigda i yémbél i, i ngéda a bi kal le ‘Môab a yé pan i jogop i Nyambe’.—Tjémbi 60:8; 108:9.
25 MAYE SÉP – 1 LIBUY LI NYÉÉ
MASÔÔ MA NKUS MA BIBEL | TJÉMBI 109-112
Nit Kiñe Yésu!
w06 1/9 13 § 6
Balôm ba matode ba kaat i yônôs itan i kaat Tjémbi
110:1, 2—Kii ‘[Nwet David’] hala wee Yésu a bé boñ i ngéda a bé a yii i woo walôm u Djob? I mbus bitugne gwé, Yésu a bi bet i ngii, a bem a bak a yii i woo walôm u Isañ letee ni nwii 1914. I nwii u won a bi kôhna kunde i Ane. Mu i ngéda a bé bem, a bé éga banigil bé ba ba yé minhoog. A tinak bo biniigana inyu gwel nson wap u likalô. A kôôbaga ki bo i gwel nson wap u bikiñe ikété Ane yé.—Matéô 24:14; 28:18-20; Lukas 22:28-30.
w00 1/4 18 § 3
I bet ba njôs Djob ba ga yémbél bé!
3 Litén li Yéhôva li bi bôdôl bana ngolba i bibôdle bi hiai 20. Ikété ngandak biloñ, bôt ba ba bééna mahoñol mabe, ba bi yéñ le ba kéñ bagwélél ba Yéhôva i téé likalô. Tole njômbi yap i bé le ba téé nson u ñañ nlam. Ñoo wés nu bisu le Satan nyen a bé tinde bo i bana i nya mahoñol i, Satan “a nhiôm kiki mbondo njéé i i nkônd, a yéñék le a je mut.” (1 Pétrô 5:8) I mbus le “ntéak ngéda u biloñ” u bi mal i nwii 1914, Yéhôva a bi téé man wé Kiñe i Ane Djob. A ti ki nye oda le: “Kee ipôla baoo boñ, u énél bo.” (Lukas 21:24; Tjémbi 110:2) Kristô a bi gwélél kunde yé, a buñge Satan nyoo i ngii. Yésu a bi leñ Satan hana ’isi. Kiki a nyi le a gwé ha bé ngéda, Satan a ñunbene minhoog, ni i bet ba nit bo. (Masoola 12:9, 17) I hiun hi, hi bi lona kii?
be 76 § 2
Njômbi yoñ i ba le u hol
I ti makébla i yé njel yada i i ñéba le di nlama yoñ ngim makidik. Baa u nyoñ makidik i ke i téé likalô ni bilôk bikéé bipe? Baa u nyéñ manjel inyu hôla bilôk bikéé bi bi ntip jôp i likoda? I hôla i bet ba yé njohok, tole i bet ba yé bibôk? Baa u nyoñ ngéda i ke pubus ndap Ane tole i ti mahôla i makoda makeñi? Baa u nla yoñ nson nsañal inyu pes ngéda? Baa u nla ba nsañal i likoda i het ngôñ i batéé likalô i yé? Ibale u yé mankéé nu munlôm, baa u noode yônôs matode inyu yila nhôla nson tole mañ? Ibale u yé bebee i ti mahôla tole i gwel ngim minson, u ñéba le u yé i hol i pes mbuu.—Tjémbi 110:3.
Tik ngok i mbuu
it-1 80 § 4
Malômbla
Malômbla inyu ba Prisi i libak li Melkisédek. Malômbla ma, ma yé ikété kaat Tjémbi 110:4, i mut a bi tila bibañga bi yé i kaat Lôk Héber 7:1-3, 15-17, a ñéba le bibuk bi, bi nyônôl Yésu Kristô. Yéhôva a bi boñ malômbla ma, ndik ni Yésu Kristô nyetama. I nene le Yésu a bi pôdôl malômbla ma, i ngéda a bé boñ malômbla inyu Ane ni banigil bé. (Lukas 22:29) Yéhôva a bi kumb soñ le Yésu Kristô a bé lama yila Prisi i libak li Melkisédek. Melkisédek a bé kiñe a bak ki prisi i Nyambe hana hisi. Yésu nye a ga ba Prisi ni Kiñe ha i hisi bé, ndi nyoo i ngii. A bi kôhna i tel i, i mbus le a bi bet i ngii (Lôk Héber 6:20; 7:26, 28; 8:1) Malômbla ma, ma ga mal bé kekikel inyule Yésu a nke ni bisu i ba Prisi ni Kiñe isi énél i Yéhôva.—Lôk Héber 7:3.
2-8 LIBUY LI NYÉÉ
MASÔÔ MA NKUS MA BIBEL | TJÉMBI 113-118
Lelaa di nla éba Yéhôva le di nti nye mayéga?
w01 1/1 11 § 13
Di hôlôs gwéha
13 Bibañga bi Yésu bi ñéba ntiik le di nlama ndugi gwés Yéhôva. Ndi i ngéda di ngwéé, di ngwééna bé gwéha inyu Yéhôva. I yé ngim lem i di nlama hôlôs. Ngélé bisu ba bi añle bés njee a yé Yéhôva, i jam di bi nok jon li bi boñ le di kôôge nye bebee. Ndék ni ndék, di bi nigil lelaa a bi bôñgôl hisi inyu bôt ba binam. (Bibôdle 2:5-23) Di bi tehe yak lelaa a bi boñ ni bôt ba binam i ngéda ba bi boñ béba. Ni bimbe bitelbene a bi yoñ inyu saa binoñ. (Bibôdle 3:1-5, 15) A bi éba loñgeñem ipañ i bet ba bé téñbe ni nye, sôk i nsôk, a bi ti man wé kiki binoñ inyu nwéhél bibéba gwés. (Yôhanes 3:16, 36) Kiki di bé ke ni bisu i yi nye, hala nyen di bi ke ni bisu i ti nye mayéga. (Yésaya 25:1) Kiñe David a bi kal le a bé gwés Yéhôva inyule Yéhôva a bé yoñ ndun ni nye. (Tjémbi 116:1-9) Yak i len ini, Yéhôva a nyoñ ndun ni bés, a ñéga bés, a nlédés bés, a nti ki bés makénd. Kiki di nke ni bisu i yi nye, hala nyen gwéha yés ipañ yé i nke ni bisu i keñep.—Tjémbi 31:23; Sôfônia 3:17; Rôma 8:28.
w09 15/7 29 § 4-5
Di yi ti mayéga, di tinak ni ñem wés wonsôna.
Ntôp tjémbi a bi bat le: “Kii me yé le me timbhe Yéhôva inyu loñge yosôna a bi bôñôl me?” (Tjémbi 116:12) Mambe mam malam ntôp tjémbi a bi kôs? Yéhôva a bi nit nye i ngéda a bé boma “mandutu ni bikuu.” U héya hala, “a bi sôñ nye le a wo bañ.” Jon ntôp tjémbi a bééna ngôñ i ti Yéhôva ngim yom. Ndi kii a bé le a ti nye? A bi kal le: “M’a yônôs makak me bi kégél Yéhôva.” (Tjémbi 116:3, 4, 8, 10-14) Ntôp tjémbi a bé bebee i boñ kii yosôna a bé la inyu yônôs makak a bi kégél Yéhôva.
Yak we u nla boñ nlélém. Lelaa? I ngéda u noñ matiñ mé mu niñ yoñ. Ni ki le di nlama ba nkwoog nkaa le bibégés di nti Yéhôva i niñ yés gwon bi yé jam li bisu. Di nlama ki nwas le mbuu mpubi won u éga bés. (Ñañal 12:13; Galatia 5:16-18) I pot maliga, di nla bé hégha i mam Yéhôva a mbôñôl bés ni i mam bés di nla ti nye. Ndi to hala, di nla kôhna Yéhôva maséé i ngéda di nsélél nye ni ñem wés wonsôna. (Bingéngén 27:11) Baa nsima umpe u nloo unu le di kôhna Yéhôva maséé!
Biniigana di nla ôt mu kaat Lôk Lévi
9 Mam ma nyônôs ima: Di ngwélél Yéhôva inyule di yé maséé ni mam a mbôñôl bés. Inyu yigye i jam li, di pôdôl bisesema inyu nsañ, jam lipe li li bé nseñ mu bibégés bon ba nlômbi Israel ba bé ti Yéhôva. I kaat i Lôk Lévi, di ntehe le man Lôk Israel a bé le a ti sesema inyu nsañ “inyu ti mayéga.” (Lôk Lévi 7:11-13, 16-18) A bé boñ bé hala inyule ba bé kal nye, ndi inyule a bé gwés boñ hala. A bé ti likébla li ni ñem wé wonsôna inyule a bé gwés Yéhôva. Mut a bé ti likébla, lihaa jé, ni biprisi ba bé lama je i nuga i. Ndi ngim gwom bi kété ni bipes bipe bi bé ndigi inyu Yéhôva. Bimbe bi?
10 Mam ma nyônôs maa: Gwéha yon i ntinde bés i ti Yéhôva i ni i i nlôôha ilam di gwé. Inyu Yéhôva mahoñ ma bé malam iloo bini bipes bi nuga bipe. A bé diihe yak gwom bi kété bipe kiki bo ditam. (Añ Lôk Lévi 3:6, 12, 14-16.) Jon Yéhôva a bé maséé ngandak ngéda man Lôk Israel a bé ti i gwom bi kété bini ni mahoñ ni ñem wé wonsôna. I man Lôk Israel a bé ti i nya makébla i a bé unda le a bééna toi ngôñ i ti Yéhôva i ni i i nlôôha ilam a gwé. Nlélém, Yésu a bi ti Yéhôva jam li nloo mam momasôna a bé a gwé, mu kii a bi gwélél Nye ni ñem wé wonsôna, inyule a bé gwés Nye. (Yôhanes 14:31) Yésu a bé maséé i boñ sômbôl i Djob; a bé lôôha gwés mbén i Djob (Tjémbi 40:9) Kinje maséé Yéhôva a bé lama nôgda i tehe Yésu a ngwélél nye ni ñem wé wonsôna!
11 Kiki bisesema inyu nsañ, di nsélél Yéhôva inyu unda nye le di ngwés nye. Di mbôñôl nye kii yosôna di nla inyule di ngwés nye ni ñem wés wonsôna. Kinje maséé Yéhôva a nlama nôgda ngéda a ntehe didun di bôt di ngwélél nye ni ñem wap wonsôna inyule ba ngwés nye! Hala a nlédés bés i yi le Yéhôva a ntehe nson wés a kônlak bés maséé inyu mam di mboñ, yak ni mahoñol malam di gwé. Kiki hihéga, ibale biuni bi nkéñ we i sélél Yéhôva kiki u ngwés, ba nkwoog nkaa le Yéhôva a nok we. U yé le u hoñol le u mboñ bé bañga jam, ndi Yéhôva a ntehe njôôñ gwéha u gwééne nye i i ntinde we i boñ kii yosôna u nla. A yé maséé i leege kii yosôna u nla ti nye.
Tik ngok i mbuu
w12 15/5 22 § 1-2
Mambadga ma basoñgol
Ntôp tjémbi a bi tôp le: “Nyemb i bagwélél ba Yéhôva i yé tik jam i mis mé.” (Tjémbi 116:15) Yéhôva a ndiihe niñ i bagwélél bé. Ndi nlôñ Bibel unu, u mpôdôl bé inyu ngwélél wé tôbôtôbô.
I ngéda ba yé ti nkwel u maéya, nti nkwel a nlama bé gwélél kaat Tjémbi 116:15 to ibale i mut a nwo a bak a tiñi ni Yéhôva. Inyuki? Inyule ntôp tjémbi a mpôdôl ndik bé ngwélél Yéhôva wada. A nsômbôl kal le nyemb i bagwélél ba Yéhôva bobasôna yon i yé tik jam i mis mé, hala wee a gwé bé ngôñ le ba wo.—Béñge Tjémbi 72:14; 116:8.
9-15 LIBUY LI NYÉÉ
MASÔÔ MA NKUS MA BIBEL | TJÉMBI 119:1-56
“Lelaa mañge wanda a ga tééda njel yé mapubi?”
w87 1/11 18 § 10
Baa u yé mapubi ikété niñ yoñ yosôna?
10 I kaat Éfésô 5:5 Paul a nti bés mabéhna mana le: “Inyule ni nyi hala, bébomede ni neebege ki hala, le mut malal ma nyega, to mut nyega, to mut huluk ñem, hala wee mut a mbégés bisat, a gwé bé ngababum ikété Ane i Kristô ni i Nyambe.” Ndi hiki nwii, ba nkodol bikristen inyule ba nkwo ikété hiañdi hi malal ma nyega. ‘Ba mboñ nyuu yap béba.’ (1 Korintô 6:18) Libim li ngéda, bahogi ba nkwo mu hiandi hi, inyule ba ‘nyoñ bé yihe, ba mboñ ha bé i mam bañga i [Djob] i nkal.’ (Tjémbi 119:9) Kiki hihéga, i ngéda bape ba nke i noi, ba nke ha bé i makoda, ba mbot mawanda ni bôt ba ba ngwélél bé Yéhôva. Kiki inyu yap, i bôt ba ba gwé bihiumul bilam, ba mbôdôl kiha ni bo, bape ba bi yila liwanda ni solôñ yap i bôlô. Mañ wada u bi yila liwanda ni muda bo nye ba bé sal, sôk i nsôk, a tjôô lihaa jé, a ke i niñ ni i muda nu. Ba bi pémés nye i ntôñ. Bibañga bini bi yé toi maliga: “Bilôñ bibe bi ñôbôs bilem bilam.”—1 Korintô 15:33.
w06 15/6 25 § 1
“Me nlôôha gwés mabéhna moñ”
YÉHÔVA a nti bagwélél bé maéba inyu hôla bo i nihbe mandutu ma niñ. Di nkôhna mabéhna mahogi i ngéda di ñañ Bibel, di nkôhna mabéhna mape i ngéda di yé i makoda. I pot maliga, libim li mam di nigil li tane bé bés nkén. Di nyi i mam ma, ndi kiki di gwé lem i hôya, di gwé ngôñ i bigda bitééne bi Yéhôva, mambén mé ni maéba mé. Di nlama kon maséé ni mabéhna ma Nyambe. Ma nhôla bés i bigda manjom ma ma bi tinde bés i sélél Yéhôva. I jam li, jon li bi tinde ntôp tjémbi i kal le: “Me nlôôha gwés mabéhna moñ.”—Tjémbi 119:24.
w10 15/4 20 § 2
U béñge bañ i mam ma ta bé nseñ!
2 I mam di mbéñge ma nla lona bés bikuu. Maada ma yé ipôla i mam di ntehe ni boña wés. Hala a nla boñ le i mam mis més ma ntehe ma boñ le ngim ngôñ i gwé ikété ñem wés. Kiki Satan nyen a ñane nkoñ ’isi, u u yé ñôbak, di gwé ngandak manwin ni bititii bi bi nla boñ le di yôm to ibale di nleñ ndik jis ndék manut mu mam mabe ma. (1 Yôhanes 5:19) Di nok inyuki ntôp tjémbi a bi soohe Nyambe le: “Hôla me le me nun bañ mam ma ta bé nseñ; tééda me i niñ mu njel yoñ.”—Tjémbi 119:37.
Tik ngok i mbuu
w05 15/4 10 § 2
Bôdôl bañga i Yéhôva ñem
2 Kaat Tjémbi 119 i mpôdôl nseñ u Bañga i Djob. Inyu boñ le hala a ba jam li ntomb i tééda i hiémbi hi, ntôp tjémbi a bi tila i 176 minlôñ mi hiémbi hi, inoñnaga ni bibañga bi alphabe ni hop Lôk Héber. Hiki 22 maben ma gwé minlôñ 8. I hiémbi hi, hi mpôdôl Bañga i Djob, mbén, mabéhna, njel, bioda, mambén ma Djob, matiñ ma Djob, ni bitelbene gwé. Munu yigil ini, ni i i noñ, di ga toñol kaat Tjémbi numba 119. Di ga gwélél ngobol i Bibel i i ntibil pémés mahoñol ma ma yé ikété minhôôg mi bikaat ni hop Lôk Héber. D’a pôdôl ndék mam i i bi pémél bagwélél ba Yéhôva ba ngéda kôba, ni ba ngéda yés, hala a ga hôla bés i tibil nok i hiémbi hi. Di kônde ki gwés Lipôdôl li Djob le Bibel.
16-22 LIBUY LI NYÉÉ
MASÔÔ MA NKUS MA BIBEL | TJÉMBI 119:57-120
Lelaa di nla hônba mandutu?
w06 15/6 20 § 2
“Me ngwés Mbén yoñ kiyaga!”
2 Di nla badba le, “Lelaa Mbén i Djob i bé le i hôgbaha ntôp tjémbi?” A bé nkwoog nkaa le Yéhôva a bé tôñ nye ni le a bé nit nye. Bitelbene bi gwéha bi bi bé mu ikété mbén i, bi bé kôhna nye maséé to hala kiki baoo bé ba bé tééñga nye. A bé yi le Yéhôva a bi unda nye loñgeñem. Jam lipe li yé le mambén ma Yéhôva ma bi hôla nye i bana pék iloo baoo bé, ma péyés ki nye. Kiki a bé nôgôl Mbén i Yéhôva, a bé niñ ikété nsañ, a ban-ga kiññem i i yé nwee.—Tjémbi 119:1, 9, 65, 93, 98, 165.
w00 1/12 14 § 3
Baa ni nlôôha gwés mabéhna ma Yéhôva?
3 Ntôp tjémbi a bé diihe mabéhna ma Djob, a bi tôp le: “Me nhoo nôgôl mambén moñ; ñ, me tiñha bé nôgôl mo. Minkôô mi bibéba bi bôt mi nkéña me,ndi me nhôya bé mbén yoñ.” (Tjémbi 119:60, 61) Mabéhna ma Yéhôva ma nhôla bés i hônba ngolba, ni i bigda le Yéhôva a nla ti bés ngui i hônba ngolba, a hôyôs ki mam kayéle i loñge ngéda, di kee ni bisu i añal ñañ nlam.—Markô 13:10.
w06 1/9 14 § 4
Balôm ba matode ba kaat i yônôs itan i kaat Tjémbi
119:71—Inyuki hala a nla ba loñge jam i nok ndutu? Mandutu ma nhôla bés i kônde bôdôl Yéhôva ñem, i kônde soohe nye, i kônde nigil Bibel ni i bii i mam di nigil i bisélél. Mandutu ma nla ki hôla bés i tehe bilem bibe di nlama kodol. Ndutu i ga boñ bé le di nimis maséé més ibale di nwas le Yéhôva a maa bés.
“Eea lôñni bôt ba ñee”
3 Ibabé pééna, lingen li bisu li hogbe li yé Isañ nu konangoo nu a yé ngii, le Yéhôva. (Añ 2 Korintô 1:3, 4.) Yéhôva, ndémbél i mbôk ni nsôk i mut nu a nôgda ndutu di nkôhna, a nkal litén jé ni maliga le: “Memede yaga nyen me yé nu a nhughe bé nyuu.”—Yésaya 51:12; Tjémbi 119:50, 52, 76..
5 Di nla bana bôdôl i i nset bé le Yéhôva a ga nit bés. Jon, di nlama bé kon woñi i yiblene nye miñem nwés ikété masoohe, ni añle nye njôghe yés. Kinje hogbe i yi le Yéhôva a nok njôghe yés, ni le a nti ki bés hogbe di nlôôha bana ngôñ! Ndi lelaa a mboñ hala?
Tik ngok i mbuu
w06 1/9 14 § 5
Balôm ba matode ba kaat i yônôs itan i kaat Tjémbi
119:96—‘Nwaa u gwom gwobisôna bi bi yé peles’ kii bibañga bini bi nkobla? Ntôp tjémbi a bé pôdôl libak li peles inoñnaga ni litehge li mut binam. A bé hoñol le litehge li bôt ba binam li kôli bé. Maselna ni hala, Mbén i Djob i gwé bé minwaa. Mambén ma Djob ma ntihba makas ma niñ yés momasôna. La Bible du semeur a nkobol i homa nu le: “Me bi yimbe le i mam momasôna ma yé peles ma gwé minwaa,” “ndi Mbén yoñ i gwé bé nwaa.”
23-29 LIBUY LI NYÉÉ
MASÔÔ MA NKUS MA BIBEL | TJÉMBI 119:121-176
Lelaa di nla keñgle nduña?
Nwas le mambén ni matiñ ma Djob ma mma kiññem yoñ
5 Inyu boñ le mambén ma Djob ma bane bés nseñ, di nlama ndik bé añ mo ni meina ni mo. Di nlama ki ke ni bisu i gwés mo ni i diihe mo. Bañga i Djob i nkal le: “Oa béba, ni gwés ki loñge.” (Amôs 5:15) Ndi lelaa di nla pam i boñ hala? Nlôm jam a yé le, di tehe mam kiki Yéhôva a ntehe mo. Kiki hihéga: Hégda le, i yé ba we ndutu i ke ’ilo ni juu. Ndi dokta joñ li tilna we ngim bijek u nlama je, tole bi u nlama keñgle, a kal ki we le u nlama hiañda minsôn, ni le u nlama héñha bilem bihogi u gwé. Mbus u noode noñ maéba mé, u nôgda le mam ma nkahal ke loñge! Ibabé pééna, u ga ti dokta joñ mayéga ngandak inyu mahôla mé, ma ma nlémés niñ yoñ.
6 Nlélém ni bés, Nhek wés a bi ti bés mambén ma ma nla hôla bés i keñgle bikuu béba i nla lona, kayéle niñ yés i lama. Ni bigda nseñ di gwé i noñ matiñ ma Bibel ma ma mbéñge bitembee, yumba, wip, malal ma nyega, njôô, ni makañ. (Añ Bingéngén 6:16-19; Masoola. 21:8) Ngéda di ntehe bisai di nkôs ngeñ di mboñ mam kiki Yéhôva a ngwés, ñem u yé ba bés nyonok ni gwéha lôñni mayéga inyu mambén mé, ni inyu Yéhôva nyemede.
w93 15/4 17 § 12
A boñge ba wanda, kii ni nsômbôl boñ i niñ nan?
12 Di nlama nigil i oo béba. (Tjémbi 97:10) Lelaa di nla oo ngim yom i i nene ilam? I ngéda di nhoñol bikuu bi nla kwél bés ibale di mboñ béba! “Ni yôm bañ, ba ntugbene bé Nyambe. Inyule i yom mut a nsal, yo ki yon a’ bumbul; inyule nu a nsal inyu minsôn a’ bumbul tjiba mu minsôn nwé.” (Galatia 6:7, 8) Ibale di nsômbôl boñ ngim yom i i yé béba, di hoñol bikuu bi nla kwés bés, ni njôghe di nla nôgha Yéhôva. (Hégha ni Tjémbi 78:41.) Ni hoñol ki le ni nla nembee, tole ni nla bana kon kiki bo Sida. Ni hégda ki i njôghe maboñok manan ma nla nôgha bé. Ni mbana ha bé ét nyuu, bikuu bi, bi nla nom ntandaa ngéda. Muda wada a nkal le: “Me ni nlô wem di bi bana niñ i nyega nwaa le di mbomna. To hala kiki di yé bikristen i len ini, i niñ di bi bana i nlona bés mindañ ikété libii jés. Jam lipe li yé ni nla nimis minson minan, tole ba nla héya bé i ntôñ! (1 Korintô 5:9-13) Baa ni ntehe bé le hala a yé ngandak bikuu di nla kôhna ndigi inyule di mbana ngôñ i nok mane ma ndék ngéda?
Tik ngok i mbuu
Ba nkwoog nkaa le ‘Bañga i Djob i yé maliga’
2 Bagwélél ba Yéhôva ba yé nkwoog nkaa le a yé “Nyambe nu maliga” ni le a ntôñ toi bés. (Tjémbi 31:5; Yésaya 48:17) Di nyi le di nla nhémle mam momasôna ma yé ikété Bibel ni le “Bañga yé yosôna i yé maliga.” (Añ Tjémbi 119:160.) I yom nyimam wada a kal i yé maliga le: “Tembee yo ki yo i ta bé ikété Bañga i Djob. Di kôli hémle i yom Bibel i nkal inyule di bôdôl Nyambe ñem.”
30 LIBUY LI NYÉÉ – 5 KONDOÑ
MASÔÔ MA NKUS MA BIBEL | TJÉMBI 120-126
Ba bi bel mbôô ni gwiiha i mis, ba bumbul ni maséé
w04 1/6 16 § 10
Nyambe a nsayap i bet ba nti nye lipém
10 I ngéda di neebe kop nson u Yésu, di njôs Satan. Yakôbô 4:7 a nkal le: “Kolbana Nsohop, ha nyen a’ ke bé ngwéé.” Hala a nsômbôl bé kal le i jam li, li ntomb. I gwélél Djob i mbat biliya. (Lukas 13:24) Ndi Bibel i mbôn bés i kaat Tjémbi 126:5 le: “Ba ba mbel mbôô ni gwiiha i mis ba ga bumbul ni maséé.” Di nsélél bé Djob li li nyi bé ti mayéga. Bibel i nkal le Yéhôva a yé “nu a mbom i bôt ba nyéñ toi nye,” a nsayap ki i bet ba nti nye lipém.—Lôk Héber 11:6.
Lelaa u yé le u lédés hémle yoñ?
17 Baa mut u gwéhék ngandak a nwo? Añ Bibel, u ôt pék mu miñañ mi bôt ba bi tuge. Baa u gwé nduña inyule ba mpémés mut woñ lihaa i ntôñ? Nigil inyu kwo nkaa le Yéhôva a nkodol ndik bés inyu loñge yés. To imbe ndutu u mboma, gwélél yo inyu lédés hémle yoñ. Yible Yéhôva ñem woñ. U yén bañ wetema, tégbaha ngéda ni lôk kéé i bôda ni i bôlôm. (Bingéngén 18:1) To ibale i mpam we i héya bitamb, boñ mam ma nla hôla we i hônba ndutu yoñ. (Tjémbi 126:5, 6) U waa bañ añ Bibel, u kenek likalô ni makoda. Hoñol mam malam momasôna Yéhôva a mbôn we. Kiki u ntehe Yéhôva a nhôla we, hala nyen hémle yoñ i nkônde let.
w01 15/7 18-19 § 13-14
Di téñbe mu nson u libumbul!
13 Bibañga bi bi yé i kaat Tjémbi 126:5, 6 bi nhôgbaha i bet ba ngwel nson u libumbul téntén i ngéda ba mboma ngolba. Nlôñ Bibel u, u nkal le: “Ba ba mbel mbôô ni gwiiha i mis ba ga bumbul ni maséé. I mut a mpam, to ibale a nke a ñee, a bak a bééga bot yé i mbôô inyu sal; ibabé pééna, a ga témb, a séék, a bak a bééga libumbul jé.” I yom ntôp tjémbi a nkal inyu libumbul i nkiha ni i yom Yéhôva a bi boñ inyu Lôk Israel i i bi nyodi i minkôm i Babilôn. To hala kiki ba bé maséé i pam i minkôm, bebek i bon ba Lôk Yuda ba, ba bé ee i ngéda ba bé sal hisi hi hi bi yégle 70 ma nwii ibabé le mut a sal hio, ndi i bet ba bi gwel nson u, ni nson u maoñ, ba bi kon maséé i ngéda bôlô yap i bi num matam malam.
14 I nla pam le di ee i ngéda di mboma mandutu tole i nla pam le bés ni lôk kéé di ee inyule di mboma ngolba inyu telepsép. (1 Pétrô 3:14) Bibôdle bi libumbul jés bi nla ba ndutu téntén i ngéda di nôgda kiki bo le likalô jés li num bé matam malam. Ndi ibale di nke ni bisu i bel ni i kôp malép, Djob a ga boñ le mbôô i too iloo kiki di nhégha. (1 Korintô 3:6) Di ntibil tehe i jam li mu kiki di nti bôt mimbamble.
Tik ngok i mbuu
cl 73 § 15
Ngui Djob a gwé inyu sôñ bés
15 Yéhôva a nsôñ bés i pes minsôn. A nsôñ litén jé jolisôna. Ha la bé, ki Satan a ma nyagat bés. Baa “ñane nkoñ ’isi” a gwé bé ngôñ i mélés bibégés bipubi? (Yôhanes 12:31; Masoola 12:17) Ngandak bangomin i bi sôña likalô jés, i noode yak tjé bés, ndi, di bi téñbe, di ke ni bisu i téé likalô ibabé i somol. Inyuki biloñ bi, bi nla bé tjé ndék bikristen i i nene wengoñle i gwé bé to mut nu a nsôñ bo? I yé ndik inyule Yéhôva a nsôñ bés!—Tjémbi 17:7, 8.