Mambadga Ma Basoñgol

Lelaa Mbôgi Yéhôva i ntehe site internet i het bôt ba nyéñ mabii?

Maliga ma yé le, Yéhôva a nsômbôl le bôt iba ba ba mbiiba ba ba maséé, ni le ba ba mawanda i boga ni boga. (Matéô 19:4-6) Ibale u nsômbôl biiba, lelaa u nla léba loñge sobiina? Kiki Yéhôva a yé Nhek wés, a nyi kii i ga hôla bés i bana loñge libii. Jon, ibale u noñ matiñ mé, u ga ba toi maséé. Di wan ndék matiñ mu.

Li bisu li yé le, wemede u nlama neebe i jam lini le: “Ñem u yé malôga iloo mam momasôna u yé ñôbak nya i nlôôha.” (Yérémia 17:9) I ngéda bôt iba ba ba nsômbôl biiba ba mbomna, ba bôdôl béñgna inyu yi too ba ga biiba, i nla pam le gwéha yap i mbôdôl nañ bihôô bihôô. Ibale ba nyoñ makidik i biiba ndik inyule ba ngwéhna ngandak, i nla pam le mam ma sôk bé kiki ba hoñlak. (Bingéngén 28:26) Jon i ta bé loñge le i bôt ba nsômbôl biiba ba pala pahal i jam ba nôgda ilole ba ntibil yina.

Bingéngén 22:3 a nkal le: “Mut yihe a ntehe jam libe, a nsolop; ndi ditégéé di bôt di ntagbe, di nkôs nôgôs.” Himbe hiandi hi sôli mu i site internet i het ba nyéñ mabii? Ngoo le, ngim bôt i mboma bakén ba bôt mu bisite bi, bo ngi yina, ba yegna libii, i mbus ngéda, ba léba le i bôt ba, ba tuguk ni bo. Yak bôt ba malôga ba yé mu, ba nsôô libak jap, jôl jap, hilo hiap hi ligwéé, i het ba bi néñél, i het ba yiine, i bôlô ba nsal, suklu ba bi ke, inyu lôk bôt bape ni nibil bo. Ngim mangéda, i bôt ba ba nkadba le ba yé Mbôgi Yéhôva.

Di béñge hiandi hipe. I bôt ba bi bot bisite bi, ba ngwélél ordinater inyu ôt minsoñgi, mi mi ga unda bo, too sém a nla biiba ni kaa. Ndi maliga ma yé le, hala a nla bé bôña. Baa mut a nlama bôdôl minsoñgi mi ordinater ñem inyu léba sobiina? Kekikel, di bôdlak bañ minsoñgi mi ñem, kiki di mboñ inyu matiñ ma Bibel.​—Bingéngén 1:7; 3:5-7.

Litiñ di nléba i kaat Bingéngén 14:15, li nkal le: “Hitégéé hi mut hi nhémle bipôdôl gwobisôna, ndi mut yihe a ntibil béñge homa a nkil.” Ilole u mpohol mut kiki sobiina woñ, u nlama tibil yi nye. Ndi hala a nlet ibale ni mbomna ndigi i internet. To ibale ni ñômlana bifôtô, ni tilnaga hiki ngéda, baa ni nla toi kal le ni nyina? I bôt ba bé hoñlak le ba nléba mut ba ngwés toi, nyuu i bi kôp bo disuhuu, i ngéda ba bi sôk ba bomna.

Ntôp Tjémbi a kal le: “Me nkiha bé ni bôt ba malôga, me nkeñgle ki ba ba nsôô i yom ba yé toi.” (Tjémbi 26:4, MN.) Ngandak bôt i nhoñol le hala nyen bôt bobasôna ba mboñ, ba nsôô libak jap inyu nene loñge. Hala a yé jam li ntomb i ngéda ni nkwel i internet. To ibale ngim bôt i nkal le i yé Mbôgi Yéhôva, baa i bi sôblana? Baa i yé toi minhôôlak mi bikristen? Baa i gwé maada ma bas bas ni Yéhôva? Baa bôt ba likoda jap ba mbôdôl bo ñem? Tole baa ba gwé bihiumul bibe, baa ba yé “bilôñ bibe”? (1 Korintô 15:33; 2 Timôtéô 2:20, 21) Baa ba nla toi biiba inoñnaga ni matiñ ma Bibel? U nlama yi i mam ma, ndi hala a ntomb bé ibale u nyéñ bé mahôla ma Mbôgi Yéhôva ipe i i nyi nye loñge loñge. (Bingéngén 15:22) I yé maliga le, bañga ngwélél Yéhôva a nlama bé to hoñol i “adba” ni ngitophémle.​—2 Korintô 6:14; 1 Korintô 7:39.

Kiki tjandi di yé mu bisite bi internet i het bôt ba nyéñ mabii, baa manjel malam ma ta bé inyu yéñ sobiina, ni tibil yi i nwet a ga ba sobiina woñ? Ñ. Hee u nla boma loñge sobiina? Mbôgi Yéhôva i nla tibil yina i ngéda ba mbomna i makoda, i makoda makeñi ni mangéda mape.

To i ngéda di nla bé bomna, kiki munu mangéda ma COVID-19 mana, di ngwélél bisélél bi internet inyu ba i makoda més, i het di nla tibil yina ni Mbôgi Yéhôva ipe i i ta bé mbiibaga. Di nla tehe kiki ba nyoñ ngaba i makoda ni kiki ba mpahal hémle yap. (1 Timôtéô 6:11, 12) Di nla yak kwel i ngéda likoda li mal. Yak i ngeñ di mbomna ni njel internet inyu tégbaha ngéda ni Mbôgi Yéhôva ipe, di nla tibil tehe lelaa i mut di ngwés a nyoñ bana bape, umbe ntén mut a yé, ni bilem gwé. (1 Pétrô 3:4) Ndék ni ndék, i ngéda n’a tibil yina, ha nyen u nla yi too minlélém mi mam nwon ni nsômbôl yônôs i niñ nan, ni ibale bé boba ni nla toi biiba.

I ngeñ mut a nyéñ sobiina inoñnaga ni matiñ ma Bibel, a nla nôgda maliga ma bibañga bi mpémél munu kaat Bingéngén 18:22, i i nkal le: “Mut a ntehe [loñge] nwaa, a ntehe bañga jam, a nkôs ki konangoo yak Yéhôva.”