Lelaa di nla yén haa ni nkoñ isi

1. I u u nsôk ilole Yésu a nwo, limbe jam li bé tééñga nye?

HALA a bé i u u nsôk ilole Yésu a nwo. A bé yi le, ngeñ i nkola i yék banigil bé, jon a bé tôñ inyu bilôl gwap. A bi kal bo le: “Ni ta bé ba nkoñ ’isi.” (Yôhanes 15:19) Mbus hala, a bi soohe Isañ inyu yap, a kal le: “Ba ta bé ba nkoñ ’isi, kiki to me me ta bé me nu nkoñ ’isi.” (Yôhanes 17:15, 16) Kii Yésu a bé sômbôl kal?

2. “Nkoñ isi” Yésu a bi pôdôl u nkobla le kii?

² I buk ini le “nkoñ isi” Yésu a bi gwélél hana, i bé pôdôl bôt ba binam ba ba yé haa ni Nyambe, ni ba ba yé i si énél i Satan. (Yôhanes 14:30; Efésô 2:2; Yakôbô 4:4; 1 Yôhanes 5:19) Ndi lelaa di nla ba ‘haa ni nkoñ isi’? Munu pes ini, di ga tehe ngandak manjel i het di nla boñ hala: Ngéda di ntéñbe i nit Ane Nyambe ni ngéda di nyoñ bé ngaba ni mam ma m’bô. Ngéda di nkolba mbuu nkoñ isi. Ngéda di haba mambot, di eñgbak ki i nya i kôli, ni ngéda di gwé litehge li kôli inyu moni. Ngéda di ñeñgep bijôl bi gwét bi mbuu gwobisôna Nyambe a nti bés.​—Béñge Ndoñi 16, i mamélél ma kaat.

DI TÉÑBE I NIT ANE NYAMBE

3. Lelaa Yésu a bé tehe mam ma m’bô?

³ Ngéda Yésu a bé hana isi, a bi tehe le bôt ba bééna ngandak mandutu, ni le niñ i bé lédél bo. A bi unda le a bé tôñ toi bo, ni le a bé sômbôl hôla bo. Ndi baa a bi neebe i yila ñéga wap i mam ma m’bô? Heni. A bé yi le yom y’a bane toi bo nseñ i yé Ane Nyambe. Yésu nyen a bé lama ba Kiñe i Ane i, ni le Ane i yon i bé ño nkwel u likalô jé. (Daniel 7:13, 14; Lukas 4:43; 17:20, 21) Yésu a bi yoñ bé ngaba ni mam ma m’bô, a bi yén toi haa ni mam ma nkoñ isi mu ntandaa ngéda wonsôna a bi tégbaha hana isi. Ngéda Yésu a bé bisu bi ngomin i Lôk Rôma le Pôntiô Pilatô, a kal le: “Ane yem i ta bé i nkoñ ’isi unu.” (Yôhanes 18:36) Yak banigil bé ba bi yoñ bé ngaba ni mam ma nkoñ isi. Kaat yada le Sur le chemin de la civilisation (ni hop Ngisi) i bé kal inyu bikristen bi hiai bisu le: “Ba bé neebe bé bitel bi m’bô.” Yak i len ini, bañga bikristen i mboñ nlélém. Di ntéñbe i nit Ane Nyambe, di yénék ki haa ni mam ma m’bô ma nkoñ isi.​—Matéô 24:14.

4. Lelaa bañga bikristen i nit Ane Nyambe?

⁴ Bakenwin ba nsélél ngomin yap nyoo loñ i het ba ñep bo, jon ba nyoñ bé ngaba ni mam ma m’bô ma loñ i het ba nsélél. Nlélém jam u mbôña ni minhook mi mi gwé botñem i ane ni Kristô i ngii. Paul a tilna minhook mi bikristen le: “Di yé bakenwin inyu Kristô.” (2 Korintô 5:20) Minhook mi nsal inyu Ane Nyambe. Ba nyoñ bé ngaba ni mam ma m’bô, ba nsal bé ki to inyu biane bi nkoñ isi unu. (Filipi 3:20) Maselna ni hala, minhook mi ma hôla didun di bôt i yi kii i yé Ane Nyambe. “Mintômba mimpe” mi mi gwé botñem i niñ boga hana isi, mi nsal inyu nit minhook. Yak nwo mi nyén haa ni mam ma nkoñ isi. (Yôhanes 10:16; Matéô 25:31-40) Ñ, bañga kristen yo ki yo i ga yoñ bé ngaba ni mam ma m’bô ma nkoñ isi.​—Añ Yésaya 2:2-4.

5. Inyuki bikristen bi nyoñ bé ngaba ni gwét?

⁵ Bañga bikristen i ntehe bini bilôk bikéé bipe gwobisôna kiki bôt bap ba lihaa, ba édi ki ni bo ibabé i béñge loñ yap, to binéñél gwap. (1 Korintô 1:10) Jon ibale di nyoñ ngaba ni gwét, di nla jôs bôt bés ba lihaa, bilôk bikéé gwés bi mbuu, bet Yésu a ti bés oda le di gwés. (Yôhanes 13:34, 35; 1 Yôhanes 3:10-12) Iloo hala, Yésu a bi kal banigil bé le ba gwés yak baoo bap.​—Matéô 5:44; 26:52.

6. Lelaa i ti wemede nkikip yak Yéhôva i ntihba maada moñ ni Kaisa?

⁶ Tolakii bés bikristen di nyén haa ni mam ma nkoñ isi, di nsal ni ngui inyu ba biloñge bi bôt ba loñ. Kiki hihéga, di nti ngomin lipém ngéda di nôgôl mambén mé, di saak ki tas. Ndi di mbéna yoñ yihe i ti “Nyambe ki gwom bi Nyambe.” (Markô 12:17; Rôma 13:1-7; 1 Korintô 6:19, 20) Ikété “gwom bi Nyambe,” di nla sima gwéha yés inyu yé, manôgla més, ni bibégés di nti nye. Di yé bebee i nimis niñ yés inyu nôgôl Yéhôva iloole di ndogbene nye.​—Lukas 4:8; 10:27; Añ Minson mi baôma 5:29; Rôma 14:8.

DI KOLBA “MBUU U NKOÑ ISI”

7, 8. Kii i yé “mbuu u nkoñ isi,” ni lelaa u nsal ikété bôt?

⁷ I yén haa ni nkoñ isi i nkobla le, di kolba “mbuu u nkoñ isi.” Mbuu u, u yé ngui i ntinde bôt i bana mahoñol ni maboñok ma nlôl ni Satan. Mbuu u, u ñénél bôt ba ngwélél bé Yéhôva. Ndi bikristen bi njôs ngui i. Paul a kal le: “Ndi ha mbuu u nkoñ ’isi bé won bés di bi kôs, ndik mbuu u nlôl yak Nyambe.”​—1 Korintô 2:12; Efésô 2:2, 3; Béñge Ndoñi 17, i mamélél ma kaat.

⁸ Mbuu u nkoñ isi won u ntinde bôt i bana bilem kiki bo wim, lipamal, ni ndok. Won u mboñ ki le ba hoñol le i ta bé nseñ i nôgôl Nyambe. Satan a ngwés le bôt ba boñ ndigi yom i nlémél bo ibabé béñge bikuu bi nla kwél bo. A gwé ngôñ le bôt ba hoñol le, i niñ inoñnaga ni “minheña mi minsôn ni minheña mi mis” i yé jam li nlôôha ba nseñ. (1 Yôhanes 2:16; 1 Timôtéô 6:9, 10) Nsohop a nyéñ yumus bagwélél ba Yéhôva tôbôtôbô, a ntinde ki bo i hoñol kiki nye.​—Yôhanes 8:44; Minson mi baôma 13:10; 1 Yôhanes 3:8.

9. Lelaa mbuu u nkoñ isi u nla yumus bés?

⁹ Mbuu u nkoñ isi u nkéña bés kiki mbebi i di nhép. Ibale di nsal bé ni ngui inyu jôs wo, u ga yumus bés. (Añ Bingéngén 4:23.) Hala a nla bôdôl kiki minjôha, di nla bôdôl hoñol ndék ni ndék kiki bôt ba ba ngwélél bé Yéhôva, tole di bôdôl boñ mam kiki bo. (Bingéngén 13:20; 1 Korintô 15:33) I nla ki pam le di yila minkol mi bititii bi malal, minkol mi biniigana bi bôt ba nkolba ntôñ wés, tole minkol mi pémsan i mintuk.​—Béñge Ndoñi 18, i mamélél ma kaat.

10. Lelaa di nla kolba mbuu u nkoñ isi?

¹⁰ Kii di nla ni boñ inyu kolba mbuu u nkoñ isi? Di nlama kôôge Yéhôva bebee, di was ki le pék yé yon i éga bés. Di nlama soohe hiki ngéda inyu kôs mbuu wé mpubi, ni tééda lem i pagap ni minson mi mbuu. Yéhôva nyen a yé mpémba iloo bôt bobasôna ikété ngiinda yosôna. Di yé nkwoog nkaa le a nla hôla bés i kolba mbuu u nkoñ isi.​—1 Yôhanes 4:4.

DI HABA MAMBOT MA MA NTI NYAMBE LIPÉM

11. Lelaa mbuu u nkoñ isi u nhéñha mahabga ma bôt?

¹¹ Mambot di nhaba ni nyañga di mboñ, bi ñunda le di ta bé ba nkoñ isi. Ngandak bôt i nkoñ isi i nhaba mambot inyu nene, inyu tôdôl ngôñ malal yak bôt bape, inyu unda le i nôgla bé ni bana bôt bape, tole inyu unda le i nlôôha ngwañ. Bôt bape ba nyoñ bé ngéda ni haba wap. Ba nla pohol i leñba mabot tolaa tolaa, tole i yén mahindi. Di nlama bé was le maboñok ma, ma yoña bés.

12, 13. Mambe matiñ ma nla hôla bés i yi lelaa di ga haba?

¹² Kiki di yé bagwélél ba Yéhôva, di nlama bana lem i haba mambot ma mpôp, ma ma yé nsiiga, ma ma nene loñge, ma bak ma kôli ni homa di nke. Haba wés u nlama unda libak li ‘mamoma ni li hôtnyuu,’ inyu unda le di yé bôt “ba nsiñge Nyambe miñem.”​—1 Timôtéô 2:9, 10; Yuda 21.

¹³ Haba wés u nla boñ le bôt bape ba tehe Yéhôva ni bagwélél bé ni mis malam tole ni mis mabe. Jon di gwé ngôñ i boñ “mam momasôna le Nyambe a kôs lipém.” (1 Korintô 10:31) I buk ini le “mamoma” i nkobla le di nlama diihe mahoñol ma bôt bape, ni i yom ba nôgda. Jon ngéda di mpohol mambot més, tole ngéda di mpohol bieñg gwés, di mbigda le makidik més ma nla tééñga bôt bape.​—1 Korintô 4:9; 2 Korintô 6:3, 4; 7:1.

14. Kii di nlama bigda ngéda di mpohol mambot mu kii di nyoñ ngaba i minson mi mbuu?

¹⁴ Lelaa di nhaba ngéda di nke i makoda ni i likalô? Baa di nhaba i nya i yé le bôt ba hélél i béñge bés? Baa mambot més ma nene mabe i mis ma bôt bape? Baa di nhoñol le, mut a gwé bé kunde i kal bés lelaa di nlama haba? (Filipi 4:5; 1 Pétrô 5:6) I yé maliga le di gwé ngôñ i nene loñge, ndi bilem gwés bi mbuu gwon bi ga boñ le di lémél bôt. Bilem bi gwon, Yéhôva a ntehe ngéda a mbéñge bés. Bi ñunda ki njee di yé i kété kété, hala wee “mut a sôli nu ñem . . . , [nu a gwé] ndamba keñi i mis ma Nyambe.”​—1 Pétrô 3:3, 4.

15. Inyuki Yéhôva a nkal bé bés le di haba ngim mambot ma tôbôtôbô, tole di bana ngim bieñg bi tôbôtôbô?

¹⁵ Yéhôva a nti bé bés nsoñgi mambén inyu mambot di nlama haba, tole di nlama bé haba. Maselna ni hala, a bi ti bés matiñ ma Bibel, ma ma nla hôla bés i yoñ makidik malam mu jam li. (Lôk Héber 5:14) A gwé ngôñ le gwéha di gwé inyu yé ni inyu bôt bape yon i ba hikuu hi makidik més. (Añ Markô 12:30, 31.) Ikété nkoñ isi wonsôna, bagwélél ba Yéhôva ba nhaba mambot ma nene mintén mintén inoñnaga ni homa ba niñ, ni yom i nlémél bo. Mintén mi mahabga mi, mi yé minlam kiyaga, mi tinak ki bés maséé.

LITEHGE LI KÔLI INYU MONI

16. (a) Lelaa litehge li nkoñ isi inyu moni li yé mahéñha ni litehge li Yésu? (b) Mambe mambadga di nlama badba?

¹⁶ Satan a ntinde bôt i hoñol le moni ni nkus gwon bi ga ti bo bañga maséé, ndi bagwélél ba Yéhôva ba nyi le maliga bé ma. Di mbôdôl bini bibuk bi Yésu ñem, ngéda a nkal le: “Inyule nom mut i tane bé inyu ngandak gwom a gwé.” (Lukas 12:15) Moni mi nla bé toi ti bés maséé. Mi nla bé to ti bés bañga mawanda, to bañga ñem nwee, to niñ boga. I yé mbale le, di gwé ngôñ ni ndék bigwel moo, ni le yak bés di gwé ngôñ i nok line li niñ. Ndi Yésu a niiga bés le, di nla toi ba maséé ibale di gwé maada malam ni Nyambe, ni ibale bibégés di nti nye gwon bi mbôk i niñ yés. (Matéô 5:3; 6:22) Badba le: ‘Baa litehge li nkoñ isi inyu moni, li nkahal héñha litehge jem li mam inyu moni? Baa minkwel nwem ni mahoñol mem bi nkiiña ndigi i mam ma moni?’​—Lukas 6:45; 21:34-36; 2 Yôhanes 6.

17. Lelaa niñ yoñ y’a kônde lama ibale u ntjél litehge li nkoñ isi inyu moni?

¹⁷ Ibale di mbok mahoñol més i nson u Yéhôva, ndi di tjélék litehge li nkoñ isi inyu moni, niñ yés i ga bana mahee. (Matéô 11:29, 30) Di ga ba ki maséé ni ndék yom di gwé, kayéle di pam i bana nsañ ni ñem nwee. (Matéô 6:31, 32; Rôma 15:13) Hala a’ boñ le di bana bañ ngandak nduña inyu bigwel moo. (Añ 1 Timôtéô 6:9, 10.) Di ga nôgda ki maséé ma yé i ti. (Minson mi baôma 20:35) Ni ki le niñ i, i ga ti bés pôla i tégbaha ngandak ngéda ni bôt di ngwés. Sôk i nsôk di ga ke ’ilo loñge.​—Ñañal 5:12.

DI HABA “BIJÔL BI GWÉT BI MBUU GWOBISÔNA”

18. Kii Satan a nyéñ boñ bés?

¹⁸ Satan a noode ôbôs maada més malam ni Yéhôva, jon di nlama boñ biliya gwés gwobisôna inyu sôñ maada ma. Di nlama jôs “mimbuu mimbe.” (Efésô 6:12) Satan ni mimbuu nwé mimbe ba ngwés bé le di ba maséé, ba ngwés bé to le di niñ i boga ni boga. (1 Pétrô 5:8) Tolakii mimbuu mimbe mini mi njôs bés, di nla yémbél nwo ni mahôla ma Yéhôva!

19. Lelaa kaat Efésô 6:14-18 i ntoñol “bijôl bi gwét bi mbuu” bi bikristen?

¹⁹ Ngéda kôba, bisônda bi bé eñgep bijôl bi gwét inyu sôñ niñ yap i gwét. Yak bés i len ini, di nlama haba “bijôl bi gwét bi mbuu” bi, Yéhôva a nti bés. (Efésô 6:13) Bi ga sôñ toi bés. Di ñañ i kaat Efésô 6:14-18 inyu bijôl bi gwét bi le: “Telbana ni, banidbaga ni maliga bôbôk, baeñgbaga ni ben tôl le telepsép, makôô ki manyagbaga ni bitamb le miñañ minlam mi nsañ. Ndi ngii mam mana momasôna, badnana ben le hémle, yon n’a la limil makoñ ma hié ma mut mbe momasôna. Leegana ki mbéla le tohi, yak ni pansoñ i mbuu le bañga Nyambe. Ni soohege Nyambe ngéda yosôna i mbuu ni masoohe momasôna ni minyemhe.”

20. Kii di nlama boñ inyu ôt nseñ ni “bijôl [gwés] bi gwét”

²⁰ Ibale sônda i nhôya jôl yé gwét yada, kayéle i yék pes yé nyuu yada ngi hô yo, ha homa nu nyen ñoo wé a’ jôs nye. Ibale di gwé ngôñ le “bijôl [gwés] bi gwét” bi sôñ bés, di nla bé hôya to yada mu. Di nlama haba gwo hiki ngéda, di tééda ki gwo loñge. Gwét bi bi ga ke ni bisu letee nkoñ isi unu u tjiba, ni letee ba héya Satan ni mimbuu nwé mimbe hana isi. (Masoola 12:17; 20:1-3) Jon ibale di njo inyu tjôô mahoñol mabe tole ngim bibomb, di nlama bé tomb!​—1 Korintô 9:27.

21. Lelaa di nla yémbél sañ yés?

²¹ Ibale di nigbene ndigi i ngui yés, di nla bé jôs Nsohop. Ndi ni mahôla ma Yéhôva, di nla yémbél nye! Jon inyu tééda ndéñbe yés, di nlama soohe Yéhôva, di nigil Bañga yé, di kenek ki i makoda. (Lôk Héber 10:24, 25) Mam ma, ma ga hôla bés i tééda ndéñbe yés i gwés Nyambe, ni i ba bebee i sôñ hémle yés i bisu bi bôt bape.

DI BA BEBEE I SÔÑ HÉMLE YÉS

22, 23. (a) Lelaa di nla ba nkôôbaga ngéda yosôna inyu sôñ hémle yés? (b) Kii di ga nigil i pes i noñ ha?

²² Di nlama ba bebee i sôñ hémle yés hiki ngéda. (Yôhanes 15:19) I yé i pam le Mbôgi Yéhôva i boñ mam maselna ni libim li bôt bape. Badba le: ‘Baa me nyi toi inyuki di mbéna boñ maselna ma? Baa me yé nkwoog nkaa le yom Bibel, ni nkol u maliga ni u pék u nkal i téé sép? Baa me yé maséé i ba Mbôgi Yéhôva? (Tjémbi 34:2; Matéô 10:32, 33) Baa me nla toñle bôt bape yom me nhémle?’​—Matéô 24:45; Yôhanes 17:17; Añ 1 Pétrô 3:15.

²³ I yé maliga le, di ga yi lelaa di nlama boñ inyu yén haa ni nkoñ isi ikété ngandak mam. Ndi inyu mam mape, hala a ga ba bé jam li ntomb. Satan a ngwélél dipa, inyu noode bés ikété ngandak manjel. Hipa hiada a ngwélél hi yé mintuk. Lelaa di nla tibil pohol mintuk nwés? Jam li jon di ga tehe i pes i noñ ha.