Inyuki béba ni mandutu bi nai?

I ngéda bikuu bi nkwo, mbadga bôt ba mbéna badba i yé le: “Inyuki hala a mbôña?” Kinje maséé di gwé i yi le Bibel i ntibil yaga timbhe i mbadga i!

1. Kii Satan a bi boñ ndi béba i jôp i nkoñ ’isi?

Satan Nsohop a bi kolba Nyambe. Kiki sômbôl yé i bé le a énél bôt ba binam, jon a bi tinde Adam bo Éva i ndogbene Djob. A bi lôk Éva inyu yônôs njômbi yé. (Bibôdle 3:1-5) A bi tinde Éva i nhoñol le Yéhôva a gwé yom i i yé loñge inyu bôt, ndi a ntop bé ti bo yo. Satan a bé sômbôl kal le ibale bôt ba binam ba ntjél nôgôl Nyambe, ha nyen ba ga kônde ba maséé. Satan a bi bot tembee i bisu i ngéda a bi kal Éva le a ga wo bé. Jon Bibel i nsébél Satan le “mut bitembee, ni isañ bitembee.”—Yôhanes 8:44.

2. Mambe makidik Adam bo Éva ba bi yoñ?

Yéhôva nyen a bi ti Adam bo Éva i mam momasôna ba bééna. Yéhôva a bi ti bo kunde i je matam ma bie gwobisôna i wom Éden, u héya matam ma e yada. (Bibôdle 2:15-17) Ndi to hala, ba bi pohol i je matam ma e i. Éva a bi “yoñ litam li e, a je jo.” I mbus yak Adam “a je.” (Bibôdle 3:6) Boba ba bi ndogbene Nyambe. Lakii Adam bo Éva ba bé peles, hala a bé bo jam li ntomb i boñ loñge. Ndi to hala, ba bi pohol i ndogbene Nyambe, hala nyen ba bi éba le ba nsômbôl bé le a énél bo. Makidik map ma bi lona bo ngandak mandutu.—Bibôdle 3:16-19.

3. Bimbe bikuu makidik ma Adam ni Éva ma bi lona?

I ngéda Adam bo Éva ba bi ndogbene Nyambe, ba bi yila bikwéha bi bôt, i mbus ba lôôs bon bap libak jap li kwéha. Inyu pôdôl béba i Adam, Bibel i nkal le: “Béba i bi jôp i nkoñ ’isi ni njel mut wada , yak béba i lona nyemb, hala nyen nyemb i bi tjama ni bôt bobasôna.”—Rôma 5:12.

Di nok ndutu inyu ngandak manjom. Ngim mangéda, makidik mabe di nyoñ mon ma nlona bés mandutu. Mangéda mape, makidik mabe bôt bape ba nyoñ mon ma nôgha bés ndutu. I yé i pam ki le di nok ndutu inyule di yé i béba homa i béba ngéda.—Añ Ñañal 9:11.

KÔNDE TÉM

4. I nwet a mboñ le di nok ndutu

Ngandak bôt i nhoñol le Djob nyen a ñénél i nkoñ ’isi. Baa maliga ma? Tuk VIDÉÔ.

VIDÉÔ: Njee a ñénél nkoñ ’isi? (1:24)

Añ Yakôbô 1:13 ni 1 Yôhanes 5:19, i mbus, ni kwélél mbadga ini:

• Baa Djob nyen a mboñ le di nok ndutu?

5. Béñge bikuu énél i Satan i bi lona

VIDÉÔ: Inyuki Djob a nwas mandutu?—Dinyo malép (3:07)

Añ Bibôdle 3:1-6, i mbus, ni kwélél mambadga mana:

• Imbe tembee Satan a bi kal Éva?—Béñge minlôñ 4 ni 5.

• Kii a bi kal inyu tinde Éva i hoñol le Yéhôva a gwé ngim yom i i yé loñge inyu bôt ba binam, ndi le a ngwés bé ti bo yo?

• Inyu Satan, baa bôt ba binam ba nla ba maséé i ngéda Yéhôva nyen a ñénél bo?

Añ Ñañal 8:9, i mbus ni kwélél mbadga ini:

• Ibôdôl nu bôt ba binam ba bi tjél le Yéhôva a énél bo, niñ i yé lelaa?

1. Adam bo Éva ba bé peles ba niñik i Paradis. Ndi, ba bi emble Satan, ba ndogbene Yéhôva

3. Ndék ngéda, Yéhôva a ga mélés béba, ndutu ni nyemb. Bôt ba binam ba ga tiimba ba peles, ba niñ ki i Paradis

6. Yéhôva a ntôñ bés i ngéda di nok ndutu

Baa Djob a ntôñ bés i ngeñ di nok ndutu? Béñge jam Kiñe David bo ñôma Pétrô ba bi tila. Añ Tjémbi 31:7 ni 1 Pétrô 5:7, i mbus ni kwélél mbadga ini:

• Kii u nôgda i ngéda u nyi le Yéhôva a ntehe mandutu més, ni le a ntôñ bés?

I SEM KWEP

Satan ni bôt ba binam ba bisu bon ba bi boñ le béba i jôp i nkoñ ’isi. Yéhôva a ntôñ bés i ngéda di mboma mandutu. Ndék ngéda, a ga mélés mandutu momasôna.

Mambadga ma mbigda

• Imbe tembee Nsohop Satan a bi kal Éva?

• Bimbe bikuu ndok Adam bo Éva i bi lona bésbobasôna?

• Kii i nyis bés le Yéhôva a ntôñ toi bés i ngéda di mboma mandutu?

KÔNDE YÉÑ

Béñge lelaa Bibel i ntoñol kii i yé béba.

“Kii i yé béba?” (Kee i jw.org)

Kônde añ inyu yi i mam ma bi bôña i ngéda Nsohop Satan a bi tembee i wom Éden.

“Pourquoi Dieu permet-il les souffrances?” (La Tour de Garde, 1er janvier, 2014)

Béñge mandimbhe malam Bibel i nti mu mbadga i.

“I Gwét bi Ntôla bi nyônôs biba, inyuki ba bé sômbôl tjé bon ba Lôk Yuda bobasôna, ndi inyuki Djob a bi nwas le i jam li li bôña?” (Kee i jw.org)

Bimbe biniigana mut wada a bi ôt mu kiki a bé tehe bôt bape ba nok ndutu ipañ yé.

Me niñ ha bé inyu yem memede (5:09)