PES 11

Lelaa u nla ôt nseñ ni lisoñgol joñ li Bibel?

Kiki kaat i mapep

Baa u ma bana ngôñ i gwel nson nkeñi, i mbus u nôgda le w’a la bé? Inyu boñ le nson u, u yidil bañ we, u nla gwel wo ndék ni ndék. Hala a yé nlélém jam ngéda u nsômbôl bôdôl añ Bibel. U nla badba le: ‘Hee me bôdle?’ Munu yigil ini, di ga tehe ndék mam i i ga hôla we i kon maséé ngéda u ñañ ni ngéda u nigil Bibel.

1. Inyuki di nlama añ Bibel hiki kel?

I mut a ñañ Bibel, tole “mbén i Yéhôva” hiki kel, a ga ba maséé, yak mam momasôna a mboñ m’a ke loñge. (Añ Tjémbi 1:1-3.) Inyu bôdôl u nla boñ biliya i añ to ndék manut hiki kel. Kiki u mba u ñañ Bibel hiki kel, la nyen lisoñgol joñ li Bibel l’a kôhna we maséé.

2. Kii i nla hôla we i ôt nseñ ni lisoñgol joñ li Bibel?

Inyu nigil ngandak mam ngéda di ñañ Bibel, di nlama yoñ ndék ngéda inyu “tibil ôt pék mu.” (Yôsua 1:8, matila isi lipep) I ngéda u ñañ, badba mambadga kiki bo mana: ‘Kii i jam lini li niiga me inyu Yéhôva? Lelaa me nla bii jo bisélél ikété niñ yem? Lelaa me nla gwélél minlôñ mi Bibel mini inyu hôla bôt bape?’

3. Lelaa u nla léba ngéda inyu añ Bibel?

Baa, hala a nlédél we i léba ngéda inyu añ Bibel? Hala a nlédél ngandak ikété yés. Boñ biliya i ‘tibil yaga gwélél ngéda yoñ.’ (Éfésô 5:16) U nla boñ hala ibale u ntéé ngim ngéda i tôbôtôbô hiki kel inyu añ Bibel. Bôt bape ba ñañ Bibel tutu bikekela. Bape ba mpohol i añ yo njamuha i ngéda noi kosi. Bape ba ñañ yo juu ilole ba nañal. Imbe ngéda i nla ba loñge inyu yoñ?

KÔNDE TÉM

Béñge mam u nla boñ inyu boñ le lisoñgol joñ li Bibel li kônde lémél we. Tehe lelaa u nla kôôba kayéle u tibil ôt nseñ ni yigil yoñ i Bibel.

Collage: Mañge munlôm a nyoñ ngéda i nigil je ngim bijek. 1. Mañge munlôm a yé ôm nwas i bijek. 2. I ngéda a nañ, a mbôdôl je gwo ndék ni ndék. 3. Ngéda a nkônde nañ, a mbôdôl gwés bijek bi. — Nlélém kiki mut a nla nok maséé i nigil je bijek bi mondo, hala nyen a nla nok maséé i bôdôl añ Bibel

4. Nigil i gwés lisoñgol li Bibel

I bôdôl añ Bibel, i ntomb bé, ndi u nla ‘kéñbaha ngôñ’ yoñ inyu añ yo kiki mut a nla nigil i gwés bijek bi mondo. Añ 1 Pétrô 2:2, i mbus ni kwélél mbadga ini:

Ibale u mbôdôl añ Bibel hiki kel, baa u nhoñol le i ga bôdôl lémél we kayéle u bana ngôñ i añ yo hiki ngéda?

Tuk VIDÉÔ inyu tehe lelaa ngim bôt i bi bôdôl gwés lisoñgol li Bibel, i mbus ni kwélél mambadga mana.

VIDÉÔ: Boñge ba wanda ba nigil i gwés Bañga i Djob (5:33)

Mu vidéô, mambe mandutu i boñge ba wanda bana ba bi yémbél?
Kii i bi hôla bo i ke ni bisu i añ Bibel hiki kel?
Lelaa ba bi lémés lisoñgol jap li Bibel?

Mam u nla boñ ilole u mbôdôl añ Bibel:

Pohol Bibel i ba nla bôdôl ñem ni i i nôga loñge. Noode gwélél ibale i yé ni hop woñ.
Bôdôl lisoñgol ni bikaat bi bi nlôôha lémél we. Inyu tehe mam mape u nla boñ, béñge homa nunu le “Bôdôl lisoñgol joñ li Bibel.”
Tila i mam u ma añ. Gwélél i homa nunu le “U mag-ge i yom u nsoñgol” i mamélél ma kaat ini.
Gwélél JW Library. Ni njel JW Library, u nla añ Bibel to hee homa u yé, u nla ki emble lisoñgol li Bibel. U nla gwélél téléfôn yoñ tole kei ipe.
U nla gwélél Appendis i Bibel yoñ Ngobol Mbok yondo. I gwé bititii bi minkoñ, tableaux, ni ndoñi bibuk i i ga kônde lémés lisoñgol joñ li Bibel.

5. Kôôba yigil yoñ

Añ Tjémbi 119:34, i mbus ni kwélél mbadga ini:

Inyuki i yé loñge i soohe iloole u mbôdôl lisoñgol joñ li Bibel, tole u mbôdôl kôôba yigil yoñ i Bibel?

Kii u nla boñ inyu nok hiki pes u nigil munu kaat ini? Kiki u mba u nkôôba yigil ini, noode le noñ maéba mana:

Añ maben ma bisu ma yigil.
Añ bipes bi kaat ba nti, u noode yimbe maada ma yé ipôla minlôñ mi Bibel mi, ni i yom u yé nigil.
Tand mandimbhe; hala a ga hôla we ngéda u mba u nkwel ni mut we ni nye ni nigil Bibel.

Collage: Muda a yé kôôba yigil yé i Bibel. A. A ñañ lipep li bisu li yigil yé. B. A ñañ minlôñ mi Bibel ba nti. C. A ntand balôm ba bibuk tole minlôñ.

Baa u yik laa?

Mbôgi Yéhôva i bi gwélél ngandak ngobol i Bibel. Ndi ba nlôôha gwés Bibel Ngobol Mbok yondo inyule i mpot maliga, i ntomb i nok, i ngwélél jôl li Djob.—Béñge homa nunu le “Baa Mbôgi Yéhôva i gwé yap Bibel bomede?”

BÔT BAPE BA NKAL LE: “I nigil Bibel i ta bé jam li ntomb. Me gwé bé ngéda to ngui inyu yigil.”