PES 22

Lelaa u nla añal ñañ nlam?

Kiki kaat i mapep

Mu kiki u yé nigil Bibel, bebek u nla hoñol le u nlama kal bôt i mam u yé nigil. Maliga ma yé le, ‘hiki mut a nlama yi i yom Bibel i niiga!’ Ndi, u nla kon woñi i añle bôt bape i mam u nigil. Di béñge lelaa u nla yémbél i woñi u kayéle u bôdôl añle bôt ñañ nlam ni makénd.

1. Lelaa u nla añle i bôt u nyi i mam u nigil ikété Bibel?

Banigil ba Yésu ba bi kal le: “Di nla bé waa pot i mam di bi tehe, di nok ki.” (Minson mi baôma 4:20) Ba bé diihe maliga kayéle ba bé gwés añle mo bôt bobasôna. Baa hala nyen yak we u nsômbôl boñ? Ni suhulnyuu yosôna, yéñ manjel inyu añle lihaa joñ ni mawanda moñ i mam u nigil.—Añ Kôlôsé 4:6.

Makeñge inyu bôdôl nkwel

I ngéda u nsômbôl añle bôt boñ ba lihaa i mam u nigil, u nla bôdôl le: “Me nigil loñge jam i sonde ini.”
U nla éñél liwanda joñ pes kaat ibale a nkon, tole ibale a gwé nduña.
Ibale mut we ni nye ni nsal a mbat we kii u mboñ i mamélél ma sonde, u nla añle nye i mam u nigil i likoda, tole i yigil yoñ i Bibel.
U nla éba mawanda moñ site yés jw.org
U nla naña bôt bape i yigil yoñ i Bibel, tole éba bo lelaa ba bat yigil i Bibel i jw.org

2. Inyuki i téé likalô ni lôk kéé i likoda i yé nseñ ngandak?

Banigil ba Yésu ba bé lama ndik bé añle i bôt ba bé yi ñañ nlam. Yésu ‘a bi ep bo, iba iba, a bugus bo ikété hiki tison’ inyu téé likalô. (Lukas 10:1) I tjek likalô i nya i, i bé ti ngandak bôt pôla i nok ñañ nlam. I téé likalô ntôñ i bé lona yak banigil ngandak maséé. (Lukas 10:17) Baa u nla gwés téé likalô ni lôk kéé i likoda?

KÔNDE TÉM

Béñge lelaa u nla añle bôt bape ñañ nlam ibabé i kon woñi, ni i maséé hala a nla lona we.

Collage: Muda wada nu a nigil Bibel a yé tééne muda numpe nu a yiine nye ipañ likalô. 1. I muda a nigil Bibel a yé soohe. 2. A ñéba muda nu nlôñ Bibel wada.

3. Yéhôva a ga hôla we

Ngandak bôt i nkon woñi i téé likalô, inyule i nyi bé lelaa bôt ba ga tehe bo, ni lelaa ba ga leege bo.

Baa yak we u nkon woñi i añle bôt bape i mam u nigil? Inyuki?

Tuk VIDÉÔ, i mbus ni kwélél mbadga ini:

VIDÉÔ: Me bi soohe Yéhôva le a ti me makénd (4:05)

Kii i bi hôla i boñge ba wanda bana i bana makénd i kal le ba yé Mbôgi Yéhôva?

Añ Yésaya 41:10, i mbus ni kwélél mbadga ini:

I ngéda u nkon woñi i añle bôt bape ñañ nlam, inyuki u nlama soohe?

Baa u yik laa?

Ngandak Mbôgi Yéhôva i bééna bé makénd i añle bôt ñañ nlam. Kiki ’héga, Sergey a bé kon woñi i pôdôs bôt bape. A nkal le: “To hala kiki me bé kon woñi, me bi bôdôl añle bôt i mam me bé nigil ikété Bibel. Hélha jam i yé le, kiki me bé ke ni bisu i añle bôt i mam me bé nigil, hala nyen me bé kôhna makénd, hala ki nyen me bé kônde lédés hémle yem.”

4. Ti bôt bape lipém

Ilole u ñañle mut ñañ nlam, u hoñol ndik bañ i jam u nlama pot, ndi hoñol yak lelaa u nlama kal nye jo. Añ 2 Timôtéô 2:24 ni 1 Pétrô 3:15, i mbus ni kwélél mambadga mana:

Lelaa u yé le u éba le u nôgõl maéba ma yé munu minlôñ mi Bibel mini?
Ibale bôt boñ ba lihaa tole mawanda moñ ba ta bé maséé inyule u nigil Bibel, kii u ga boñ? Ndi kii u nlama bé boñ?
Inyuki i yé loñge i bat mut mambadga inyu hôla nye i ôt pék, ilole u kal nye i jam a nlama boñ?

Nnigil Bibel a yé tééne mut wé lihaa likalô.

5. I añal ñañ nlam i nlona maséé

Nson Yéhôva a bi ti Yésu u bé le a añal ñañ nlam. Lelaa Yésu a bé tehe nson u? Añ Yôhanes 4:34, i mbus ni kwélél mambadga mana:

Biloñge bi bijek bi mboñ le di niñ loñge, bi nkônha ki bés maséé. Inyuki Yésu a bi hégha sômbôl i Djob ni bijek?
U nhoñol le i añal ñañ nlam i nla lona we mambe maséé?

Makeñge

I likoda li ñem sonde, béñge dihéga u nla gwélél inyu bôdôl nkwel.
Bat i nwet a niiga we Bibel kii u nla boñ, inyu bôdôl tégbaha minkwel i likoda li ñem sonde. Kiki u mba u nke ni bisu i tégbaha minkwel, hala a ga kôôba we i añle bôt i mam u nigil.
Gwélél homa nunu le “Bôt bape ba nkal le” tole homa nunu le “Bôt bape ba nla bat le” inyu tehe lelaa u nla timbhe mut nu a mbat we mbadga bôt ba mbéna gwélél inyu kolba likalô.

BÔT BAPE BA NLA BAT LE: “A mut, i nke laa?”