Bonjee ba yé biañgel, kii ba mboñ?

Yéhôva a nsômbôl le di yi lihaa jé, biañgel bi yé mukété lihaa li. Bibel i nsébél biañgel le “bon ba Nyambe.” (Hiôb 38:7) Kii Bibel i nkal inyu biañgel? Baa biañgel bi nla hôla bés i len ini? Baa biañgel gwobisôna bi yé ikété lihaa li Nyambe?

1. Bonjee ba yé biañgel?

Ilole a nhek ’isi, Yéhôva a bi bôk a hek ndugi biañgel. Di nla bé tehe gwo, bi niñ i ngii. (Lôk Héber 1:14) Yéhôva a bi hek didun ndi didun di biañgel, ndi hiki yada i gwé jé libak. (Masoola 5:11) ‘Ba noñ bañga [i Yéhôva], ba nôglak nye.’ (Tjémbi 103:20) I ngéda kôba, Yéhôva a bé a ep biañgel inyu legel manwin, inyu nit ni i tohol litén jé. I len ini, bi nhôla bikristen i léba i bet ba nsômbôl yi Djob.

2. Njee a yé Satan, bonjee ba yé mimbuu mimbe?

Ngim biañgel i bi ke bé ni bisu i nôgôl Yéhôva. Añgel i bisu i i bi bôk i ndogbene Yéhôva “yon ba nsébél le Nsohop ni Satan, nyen a nyumus nkoñ ’isi wonsôna.” (Masoola 12:9) Satan a bé gwés énél bôt, jon a bi tinde Adam bo Éva i ndogbene Yéhôva. I mbus, a tinde ki ngim biañgel i boñ nlélém. I biañgel bi bi ndogop gwon ba nsébél le mimbuu mimbe. Ndi Yéhôva a bi leñ gwo hana ’isi, bi mbem tjiba yap.—Añ Masoola 12:9, 12.

3. Lelaa Satan ni mimbuu nwé mimbe ba nlôk bôt?

Satan ni mimbuu nwé mimbe ba ngwélél makañ inyu tinde bôt i bana maada ni bo. Ba nla boñ hala ni njel bayi tjôdôt, bôt ba ñañ biyimbne i libai li woo, bôt ba mis ma-na, ni ba bo ngambi. Bôt bape ba nhoñol le i gwélél mam mana inyu matibla i ta bé béba, ndi ki le hala a ta bé maliga. Ngandak bôt i nhoñol le ba nla yak kwel ni bawoga. Jon Yéhôva a mbéhe bés le: “Ni ke bañ i tehe ba ba nkwel ni mimbuu mimbe, ni ke bañ to i tehe bôt ba mis ma-na.” (Lôk Lévi 19:31) Yéhôva a nti bés mabéhna mana inyu hôla bés i keñgle dipa di Satan ni di mimbuu mimbe. Satan ni mimbuu mimbe ba yé baoo ba Djob, ba ngwés le yak bés di yila kiki bo.

KÔNDE TÉM

4. Biañgel bi nhôla bôt i yi njee a yé Yéhôva

Biañgel gwomede bé gwon bi nke añle bôt miñañ minlam. Ndi, ba nhôla bagwélél ba Djob i léba i bet ba nsômbôl yi Yéhôva. Añ Masoola 14:6, 7, i mbus ni kwélél mambadga mana:

• Inyuki di gwé ngôñ ni mahôla ma biañgel inyu añal ñañ nlam?

• Baa hala a nti we makénd i yi le biañgel bi nla hôla we i léba i bet ba nsômbôl yi Yéhôva? Inyuki?

5. Tjél makañ

Satan ni mimbuu mimbe ba yé baoo ba Yéhôva, ba yé yak baoo bés. Añ Lukas 9:38-42, i mbus ni kwélél mbadga ini:

• Lelaa mimbuu mimbe mi ntééñga bôt?

Di ngwés bé bana maada ni mimbuu mimbe i niñ yés. Añ Ndiimba Mbén 18:10-12, i mbus ni kwélél mambadga mana:

• Mambe manjel mimbuu mimbe mi ngwélél inyu boñ le di bana maada ni bo? Nyoo i mbok u nlôl, mambe manjel bôt ba ngwélél inyu bana maada ni mimbuu mimbe?

• Baa u nhoñol le Yéhôva a kôli sôña makañ? Inyuki?

Tuk VIDÉÔ, i mbus ni kwélél mambadga mana.

VIDÉÔ: “Kolba Nsohop” (5:02)

• Baa u nhoñol nkôm Palesa a bi ha i woo u man wé inyu sôñ nye u bé loñge? Inyuki u nhoñol hala?

• Kii Palesa a bé lama boñ inyu boñ le mimbuu mimbe mi tééñga ha bañ nye?

Ibôdôl behee, bañga bikristen i nkolba mimbuu mimbe. Añ Minson mi baôma 19:19 ni 1 Korintô 10:21, i mbus ni kwélél mbadga ini:

• Inyuki i yé loñge i tjé i gwom gwobisôna bi gwé maada ni mimbuu mimbe?

6. Di nla yémbél Satan ni mimbuu nwé mimbe

Satan nyen a ñénél mimbuu mimbe. Ndi, Mikael nyen a ñénél biloñge bi biañgel. Mikael a yé jôl lipe li Yésu. Ipam limbe likala Mikael a gwé ngui? Añ Masoola 12:7-9, i mbus ni kwélél mambadga mana:

• Ipôla Mikael ni biañgel gwé, ni Satan ni mimbuu nwé mimbe, bonjee ba nlôôha bana ngui?

• Baa u nhoñol le banigil ba Yésu ba nlama kon Satan ni mimbuu nwé mimbe woñi?

U nla yémbél Satan ni mimbuu nwé mimbe. Añ Yakôbô 4:7, i mbus ni kwélél mbadga ini:

• Lelaa u nla kolba Satan ni mimbuu nwé mimbe?

I SEM KWEP

Biloñge biañgel bi nhôla bés. Satan ni mimbuu nwé mimbe ba yé baoo ba Yéhôva, ba ngwélél ki makañ inyu lôk bôt.

Mambadga ma mbigda

• Lelaa Yéhôva a ngwélél biañgel inyu hôla bôt i yi nye?

• Njee a yé Satan, bonjee ba yé mimbuu mimbe?

• Inyuki u nlama tjél makañ?

KÔNDE YÉÑ

Béñge i yom i nkwés bés nkaa le Yésu a yé ñane biañgel nu ba nsébél ki le Mikael.

“Njee a yé ñane biañgel le Mikael?” (Kee i jw.org)

Béñge i mam ma nkwés bés nkaa le Nsohop a ta bé béba i i yé ikété yés.

“Baa Satan a yé toi ngim hégél i i niñ?” (Kee i jw.org)

Béñge inyuki mimbuu mimbe mi bi waa tééñga muda wada.

“Elle a trouvé un but dans la vie” (La Tour Garde, 1er juillet, 1993)

Béñge lelaa Satan a ngwélél makañ inyu lôk bôt ba binam.

“Maliga ikolba makañ, ngwe’ ni liemb” (Njel i nkena i niñ boga, pes 5)