Ni nwas bañ le gwéha nan i hoi

1, 2. (a) Bibañga bi Yésu i kaat Matéô 24:12 bi bi bôk ndugi bi yônôl bonjee? (b) Lelaa kaat Minson mi baôma i ñunda le libim li bikristen i hiai hi bisu li bi téñbe i unda gwéha? (Béñge titii i bibôdle.)

JAM jada Yésu a bi kal mu yimbne yé inyu “dilo di nsôk” li yé le “gwéha i ngandak bôt y’a hoi.” (Matéô 24:3, 12) Bibuk bi, bi bi yônôl ndugi Lôk Yuda i hiai hi bisu, i i bé kadba le i yé litén li Djob, ndi i nwas le gwéha yap i hoi.

² Ndi i nlélém ngéda, libim li bikristen ha ngéda i, li bé li pégi i “añal miñañ minlam le Yésu a yé Kristô,” ba undga gwéha inyu Djob, inyu bikristen bipe ni inyu bangitophémle. (Minson mi baôma 2:44-47; 5:42) To hala, banigil ba Yésu bahogi, i hiai hi bisu, ba bi nwas le gwéha yap i hoi.

3. Kii i bé le i hôyôs gwéha i bikristen bihogi?

³ Ngéda a bé pôdôs bikristen bi bi bé niñ i tison i Efésô i hiai hi bisu, Yésu a bi kal bo mbus bitugne gwé le: “Me ntogha we le u bi nwas gwéha yoñ i bibôdlene.” (Masoola 2:4) Kii i bé le i hôyôs gwéha yap? I nene le banigil ba Kristô ba bi nwas le mam ma minsôn ma nkoñ isi ma yoña bo. (Efésô 2:2, 3) Kii ikété ngandak bitison, tison i Efésô i bé nyonok ni bibéba bi mam. I bééna lingwañ ngandak, bôt ba gwéhék ba ntuk niñ, ba gwéhék ki niñ i mbomboo. I nene le i yéñ mane ma niñ i bi héya gwéha inyu bôt bape i miñem nwap. Jam lipe li yé le, homa nyensôna, ndéñg ni mam mabe ma bé bôña i mbamba.

4. (a) Lelaa gwéha yés i nla hoi munu dilo tjés? (b) Gwéha yés i nla boma manoodana ikété matode maa. Mambe?

⁴ Mbañ i Yésu i i nkal le gwéha y’a hoi, i nyon yak len ini. I len ini, gwéha i bôt inyu Djob i nhoi ndigi, hoi ni hoi. Didun di bôt di nkôm Djob mbus, di ban-ga botñem le bôt ba binam bon ba ga mélés mandutu ma nkoñ isi. Ndi, ipôla bagwélél ba Yéhôva Djob, gwéha i nkônde nañ. I yé ya maliga le jam li bi tagbe i likoda li Efésô i hiai hi bisu li ñunda le yak i len ini, bañga bikristen bi nla yila bôt ba ba ntééñga ha bé manyuu map inyu ngim jam, hala a nla ki hôyôs gwéha yap. Nano, di béñge lelaa gwéha yés i nla boma manoodana munu matode mana mo maa: (1) Gwéha inyu Yéhôva, (2) gwéha inyu maliga ma Bibel, (3) ni gwéha inyu lôk kéé yés.

GWÉHA INYU YÉHÔVA

5. Inyuki di nlama gwés Djob?

⁵ I nlélém kel Yésu a bi béhe banigil bé le ba yoñ matat le gwéha yap i hoi bañ, a bi yigye umbe ntén gwéha u nlôôha ba nseñ. Jon a bi kal le: “‘U gwéhék Nwet le Nyambe woñ ni ñem woñ wonsôna, ni nom yoñ yosôna, ni mahoñol moñ momasôna.’ Litiñ lini jon li yé likeñi ni li bisu.” (Matéô 22:37, 38) I pot maliga, i bana gwéha i umi siñ siñ inyu Djob i nhôla bés i nôgôl mambén mé, i hônba ni i oo béba. (Añ Tjémbi 97:10.) Ndi Satan ni nkoñ isi wé ba noode tômbôs gwéha yés inyu Djob.

6. Bimbe bikuu bi mpémél bet ba nimis gwéha yap inyu Djob?

⁶ Bôt ba nkoñ isi ba gwé bé loñge litehge li gwéha. Ilole ba gwés Djob, ba ‘ntôñ ndigi bomede.’ (2 Timôtéô 3:2) Satan a ñane nkoñ isi unu, u u nhôlôs “minheña mi minsôn, ni minheña mi mis, ni humbulnyu i nom ini.” (1 Yôhanes 2:16) Ñôma Paul a bi béhe bikristen le ba kolba ngôñ yap i minsôn. Jon a bi kal le: “Ngo nduña minsôn i yé nyemb . . . inyule nduña minsôn i yé ôa ni Nyambe.” (Rôma 8:6,  7.) Ibabé nkaa, i bet ba ntégbaha niñ yap i yéñ nkus, tole minheña mi ndéñg ba bi sôk ba wo nyuu, bikuu bikeñi bi bi kwél ki bo.​—1 Korintô 6:18; 1 Timôtéô 6:9, 10.

7. Bimbe biniigana bibe banigil ba Kristô ba mboma i len ini?

⁷ I ngim biloñ, bayi mam ba mpahal i mbamba le ba nhémle bé le Djob a yé, ba kalak ki le Nhek a ta bé. Ba nhôñôs biniigana bi bi nhôyôs ndik bé gwéha i bôt inyu Djob, ndi bi mboñ ki le bôt ba hémle ha bañ to le Djob a yé. Ba ntinde ngandak bôt i neebe le, ibale mut a nhémle le Djob a yé, wee a yé jôñ mut. I nlélém ngéda, bôt ba mbégés bôt ba njôôñ yi kiki mop, kayéle hala a nkena bôt haa ni Djob. (Rôma 1:25) Ibale di nlek maôô i emble nya biniigana ini, di nla ke haa ni Yéhôva, yak gwéha yés i hoi.​—Lôk Héber 3:12.

8. (a) Ngandak ikété litén li Djob i mboma mam ma mboñ le i nimis makénd map. Mambe? (b) Mambe makénd kaat Tjémbi 136 i nti bés?

⁸ Jam lipe li nla boñ le hémle yés i tomb tole gwéha yés i sune, li yé ngéda di nimis makénd més. Munu nkoñ isi u Satan, bés bobasôna di mboma mam ma ma mboñ le di nimis makénd més. (1 Yôhanes 5:19) Bebeg le hanano, biuni bi ntééñga bés, tole makon, tole mam ma moni. Bebeg ñem u nkal bés le di gwé bé nseñ wo ki wo, tole di mpam bé i yônôs ngim mam, tole mam ma niñ yés ma nke bé kiki di ngwés. Ndi di wahak bañ i nya mam ini le i tinde bés i hoñol le Yéhôva a nkôm bés mbus. Mahéñha ni hala, di nlama soñda Bibañga bi ntina makénd, bi bi nhôñlaha bés ndéñbe gwéha i Yéhôva inyu yés. Di nléba nya Bibañga i ikété kaat Tjémbi 136:23, i i nkal le: “Nyen a bigda bés mu libak jés lisôhga, inyule loñge yé ñem i nom mba ni mba.” Ibabé pééna, ndéñbe i Yéhôva i gwés bagwélél bé i mal bé. Inyu hala nyen di nlama ba nkwoog nkaa le a ñemble ‘minyemhe nwés,’ a timbhege ki bés. ​—Tjémbi 116:1; 136:24-26.

9. Kii i bi ti Paul ngui i tééda gwéha yé inyu Djob?

⁹ Ndik kiki ntôptjémbi, yak Paul a bi kôhna ngui i bigda lelaa Yéhôva a bi nit nye ibabé waa. A bi tila le: Yéhôva “nyen a yé nhôla wem, m’a kon bé me woñi. Mut binam a’ boñ ki me?” (Lôk Héber 13:6) Paul a bé nkwoog nkaa le Yéhôva a ntééda nye ni loñgeñem, hala a hôla nye i nihbe mandutu ma niñ. A bi nwas bé le mandutu ma niñ ma tômbôs nye. Maliga ma yé le ngéda Paul a bé i ndap mok, ha nyen a bi tila ngandak bikaat inyu ti bape makénd. (Efésô 4:1; Filipi 1: 7; Filémôn 1) Ñ, yak ngéda a bé ikété manoodana ma ngui, Paul a bi tééda gwéha yé inyu Djob. Ndi kii i bi ti nye ngui i boñ hala? A bi waa bé bii botñem yé yak “Nyambe nu lédésñem yosôna, nu a nlédés yaga bés miñem ikété njiiha yés yosôna.” (2 Korintô 1:3, 4) Lelaa di nla kôna ndémbél i Paul ni tééda ki gwéha i ngui inyu Yéhôva?

10. Lelaa di nla tééda gwéha i ngui inyu Yéhôva?

¹⁰ Njel i bisu inyu tééda gwéha i ngui inyu Yéhôva i yé ikété bibañga bi Paul nyemede. A bi tilna bikristen bipe le: “Ni nwas bañ i soohe.” I mbus a témb a tila le: “Ni téñbege ni masoohe.” (1 Tésalônika 5:17; Rôma 12:12) I kwélés Djob ni njel masoohe i yé hikuu hi maada malam ni nye. (Tjémbi 86:3) Ibale di nyoñ ngéda i kal Yéhôva mahoñol ma yé bés ikété kété ñem, ibabé pééna, d’a kôôge bebee ni Tata wés nu ngii, ‘nu a ñemble masoohe.’ (Tjémbi 65:3) Jam lipe li yé le, ngéda di ntehe lelaa Yéhôva a ntimbhe masoohe més, gwéha yés inyu yé i nañ. Di nkônde toi nôgda le “Yéhôva a yé bebee ni bôt bobasôna ba nsébél nye.” (Tjémbi 145:18) I ba nkwoog nkaa le Yéhôva a ntééda bés ni loñgeñem, i ga hôla bés i nihbe manoodana ma ma mbem bés i bisu.

GWÉHA INYU MALIGA MA BIBEL

11, 12. Lelaa di nla boñ inyu bana gwéha i ngui inyu maliga?

¹¹ Bés bikristen di ndiihe, di niñik ki inoñnaga ni maliga. Bañga i Djob i yé lipigil li mbôk ni li nsôk li maliga. Ngéda a bé soohe Isañ, Yésu a kal le: “Bañga yoñ i yé maliga.” (Yôhanes 17:17) Inyu hala nyen di mbôdôl gwés maliga ngéda di nyi yaga mam Bañga i Djob i niiga. (Kôlôsé 1:10) Ndi, i bana ndik yi yotama i nkola bé. Djob a bi tinde ntôp tjémbi i tila i kaat Tjémbi 119. Béñge ki lelaa hala a nhôla bés i nok kii i gwés maliga ma Bibel i nkobla. (Añ Tjémbi 119:97-100.) Baa di nyoñ ngéda i tibil tém Bitilna hiki ngéda? Gwéha yés inyu maliga ma Bibel y’a nañ ngéda di nhek pék inyu bisai di nkôhna mu kii di nha Bitilna i bisélél i niñ yés.

¹² Ntôptjémbi a nkônde ki kal le: “Kinje line bipôdôl gwoñ bi nél me, iloo wéi i nyo wem!” (Tjémbi 119:103) Nlélém jam inyu yés, di nla tibil nok line li bijek bi mbuu di nkôhna ni njel ntôñ. Di nla yak yoñ ngéda i nyambal gwo ndék ni ndék inyu tibil nôgda line li “bibañga bilam” bi maliga kayéle di gwélél gwo inyu hôla bape.​—Ñañal 12:10.

13. Kii i bi hôla Yérémia i gwés maliga ma Bitilna, ni mambe mahoñol hala a tinde nye i bana?

¹³ Mpôdôl Yérémia a bé gwés maliga ma Bitilna. Béñge lelaa Bañga i Djob i bé kônha ñem wé maséé. A kal le: “Bibañga gwoñ bi bi nene, me je gwo; bibañga gwoñ bi bé me maséé ni mahak ma ñem wem; inyule me nséblana ni jôl joñ, a Yéhôva, Nyambe nu mintôñ.” (Yérémia 15:16) Yérémia a bé yoñ ngéda i tibil nok ni soñda Bañga i Djob. Hala a bi hôla nye i bana ñem u mayéga inyu bisai a bééna i begee jôl li Djob. Baa gwéha inyu maliga ma Bibel i ntinde yak bés i neebe le hala a yé bés bisai bi tôbôtôbô i begee jôl li Djob ni i añal Ane yé munu dilo di nsôk tini?

14. Lelaa di nla kéñbaha gwéha yés inyu maliga ma Bibel?

¹⁴ Handugi i añ Bibel ni bikaat gwés, kii ipe i nla hôla bés i bana gwéha i ngui inyu maliga ma Bibel? Di nla kéñbaha gwéha yés inyu maliga ma Bibel ibale di ntôl bé makoda. Yigil i Bibel hiki sonde ni njel Nkum Ntat i yé njel i bisu di nkuhul biniigana. Inyu tibil nok biniigana bi hiki yigil i Nkum Ntat, di nlama kôôba loñge. Njel yada inyu boñ hala i yé le di añ hiki nlôñ u Bibel ba nti bés mu. I len ini, di nla yoñ Nkum Ntat i jw.org tole di gwélél JW Library inyu añ nye ikété ngandak dilémb. Ngim dilémb i gwé bisélél bi nhôla i pala léba bipes bi Bibel. Ndi to imbe sélél di ngwélél, i yoñ ngéda inyu añ minlôñ mi Bibel ni i soñda nwo, hala a ga kéñbaha gwéha yés inyu maliga ma Bibel.​—Añ Tjémbi 1:2.

GWÉHA INYU LÔK KÉÉ YÉS

15, 16. (a) Inoñnaga ni kaat Yôhanes 13:34, 35, kii i mbéda le di boñ? (b) Mambe maada ma yé ipôla gwéha yés inyu bilôk bikéé ni gwéha yés inyu Djob ni Bibel?

¹⁵ I u wé u nsôk hana isi, Yésu a kal banigil bé le: “Me nti bé litiñ li yondo, le gwéhnaga ; kikii me bi gwés bé, yak bé ki gwéhnaga. Hala nyen bôt bobasôna b’a yi le ni yé banigil bem, ibale ni ngwéhna.”​—Yôhanes 13:34, 35.

¹⁶ Gwéha inyu lôk kéé i gwé maada ni gwéha inyu Yéhôva. I pot maliga, di nla bé gwés Yéhôva ibale di ngwés bé lôk kéé yés. Ñôma Yôhanes a tila le: “Mut a ngwés bé maasañ nu a mal tehe, a nla bé gwés Nyambe nu a ma tehe bé.” (1 Yôhanes 4:20) Jam lipe li yé le gwéha yés inyu Yéhôva ni inyu lôk kéé yés i gwé maada ni gwéha yés inyu Bibel. Inyuki di nkal hala? Inyule gwéha inyu maliga ma Bibel i ntinde bés i nôgôl mbén i Bitilna ni ñem wés wonsôna, i i nkal le di gwés Djob ni lôk kéé yés.​—1 Pétrô 1:22; 1 Yôhanes 4:21.

17. Mambe manjel di nla gwélél inyu unda gwéha?

¹⁷ Añ 1 Tésalônika 4:9, 10. Mambe manjel di nla gwélél inyu unda gwéha ikété likoda jés? Bebeg di nla hôla mankéé nu munlôm tole nu muda nu a ñun i ke makoda. Bebeg ki le di nla hôla yik muda i tibil ngim gwom i mbai yé. (Yakôbô 1:27) Ndi to di yé mañge, to di yé mañ mut, bilôk bikéé bi bi nimis makénd map tole bi bi mboma manoodana mape bi gwé ngôñ le di ti bo ngéda yés, le di ti ki bo makénd ni hogbe. (Bingéngén 12:25; Kôlôsé 4:11) Di ñunda toi le di ngwés bilôk bikéé gwés ni njel bipôdôl ni bibôñôl ngéda di ntôñ toi ‘ba ba yé bés lihaa li hémle.’​—Galatia 6:10.

18. Kii i ga hôla bés i sañgal ngimanôgla ipôla bikristen?

¹⁸ Bibel i bi bôk i pot le i “dilo di nsôk” di hiai hibe hini, bôt b’a tôñ ndik bomede, ba ban-ga ki hép. (2 Timôtéô 3:1, 2) Inyu hala nyen bés bikristen di nlama boñ biliya bi ngui inyu hol ikété gwéha inyu Djob, inyu maliga ma Bibel, ni inyu bilôk bikéé gwés. I yé maliga le ngimanôgla i nla gwéé ipôla bikristen. Ndi kinje bisai inyu likoda jolisôna ngéda gwéha i ntinde bés i sañgal ngimanôgla ni loñgeñem! (Efésô 4:32; Kôlôsé 3:14) Jon di nwahak bañ le gwéha yés i hoi! Mahéñha ni hala, di ke ni bisu i bana gwéha i ngui inyu Yéhôva, Bañga yé, ni lôk kéé yés.