Ngéda Djob nyen a bé énél, bôt ba binam ba bé niñ ikété nsañ ni nwee

Inyuki di gwé ngôñ ni Ane Djob?

I bibôdle, Yéhôva nyetama nyen a bé Ñane. A bé énél loñge. A bi bôñgôl wom Éden inyu boñ le bôt ba binam ba yééne mu. A bi ti bo ngandak bijek. U héya hala, a bi ti bôt ba binam bôlô i i bé kônha bo maséé. (Bibôdle 1:28, 29; 2:8, 15) Ibale bôt ba binam ba neebe le Djob a kee ni bisu i énél bo, ki ba bi niñ ikété nsañ.

Adam a gwé litam li e Éva a nti nye i woo. — Adam bo Éva ba bi neebe bé le Djob a ba ñane wap

Bibel i nkal bés le i béba añgel ba nsébél le Satan Nsohop, nyen a bi kolba kunde Djob a gwé i énél bôt ba binam. A bé sômbôl kal le bôt ba binam ba nla niñ loñge ibabé le Djob a énél bo. Kinje ngoo le Adam bo Éva ba bi noñ njel yé, ba kolba Djob.—Bibôdle 3:1-6; Masoola 12:9.

Adam bo Éva ba bi nimis Paradis ni botñem i niñ boga inyule ba bi tjél le Djob a ba ñane wap (Bibôdle 3:17-19) Makidik map ma bé lama tihba yak mbôda yap. Bibel i nkal le inyu hihôha i Adam nyen ‘béba i bi jôp i nkoñ ’isi, yak nyemb i jôp ni njel béba.’ (Rôma 5:12) Béba i bi lona kuu ipe le: “Mut wada a ntét numpe i boñ nye béba.” (Ñañal 8:9) Hala wee, ngéda mut binam a ñénél bape, a ntét ndigi bo.

BÔT BA BINAM BA MBÔDÔL ÉNÉL

Nimrôd a téé ni ngôk i bisu bi bôt. I mbus yé, bôt ba ñoñ nkum ndap. — Nimrôd a bi kolba Yéhôva

Bibel i nkal bés le mut binam nu bisu i énél bape, a bé Nimrôd. A bi kolba énél i Yéhôva. Ibôdôl dilo di Nimrôd, i bôt ba gwé kunde i ngii bape ba mbéna tét bo. Hala a yé yom kiki bo 3 000 di nwii le Kiñe Salômô a bi tila le: “Ndi nun-ki, gwiiha bi ba ba bi tééñgana, to mut a nhôgbaha bo a bé bé! Ngui i bé ngam batééñga bap.”—Ñañal 4:1.

Mam ma yé nlélém i len ini. I nwii 2009, lipep li manwin jada li ONU li bi kal le “énél i mbanda yon i mboñ le mam ma mbep ndigi, bep ni bep ikété nkoñ ’isi.”

NGÉDA I DJOB I NKOLA!

Nkoñ ’isi u gwé ngôñ ni loñge ñane ni énél ilam. I mam ma mon Nhek wés a mbôn bés!

Bititii: Bikuu bi énél i mut binam. 1. Muda Asia a yii i nloñ u u yé mahindi a bak a bééga ngond yé i i ñee i moo. 2. Mañ mut u u nkon u niñi i dokta. 3. Bisônda bi njo gwét ni mangaa. 4. Bakolba ane ba mbégél. 5. Muda bo ngond yé ba yé i mbédgé, ba nyimbe le ba mbol léman i nwemel wap. 6. Tison i yé mahindi i banga béba mbebi ni minkôô mi maléktrik. — Énél i mut binam to yada i nla bé mélés mandutu ma bôt ba binam

Nyambe a bi téé Ane i i ga yiha énél i bôt ba binam, i mbus, “yomede i ga tééba mba ni mba.” (Daniel 2:44) Inyu Ane i nyen ngandak bôt i nsoohe. (Matéô 6:9, 10) Ndi Djob nyemede bé nyen a ga ba Kiñe i Ane i. Ndi inyu téé Kiñe, a bi pohol mut nu a bi niñ kiki mut binam. Njee a bi tep?