Baa U Ngi Hoñlak?

Baa ni nyoñ ngéda i añ ba Nkum Ntat ba mpam munu nwii unu? Wee ni béñge too ni nla timbhe mambadga mana:

Bimbe bisai di ga kôhna ibale di nyoñ ngéda i pôdôs, i emble, ni i tégbaha ngéda ni Yéhôva?

Di ga yoñ makidik malam, di ba biloñge bi baniiga, di bana hémle i ngui, di kônde ki gwés Yéhôva.​—w22.01 mapep 30-31.

Ibale di nigil i bôdôl Yéhôva ñem, nye ni i bôt a bi téé, lelaa hala a ga hôla bés?

Nano nyen di ñunda le di mbôdôl Yéhôva ñem i ngéda di mpééna bé biniigana ni makidik ma mimañ. I ngéda njiiha ikeñi i ga bôdôl, di ga ba nkôôbaga i nôgôl biniigana di ga kôhna, to ibale di nok bé gwo tole bi nene nkoda i mis més.​—w22.02, mapep 4-6.

Kii añgel i bé sômbôl kal i ngéda i bi pôdôs Sakaria inyu ‘nkôô lipidô i woo u [Ngomin Lôk Yuda le] Sérubabel’? (Sakaria 4:8-10)

I yiinda i, i bé sômbôl yis bagwélél ba Yéhôva le, to hala kiki témpel i bé isii, ba bé lama mal oñ yo kingéda sômbôl i Yéhôva.​—w22.03, mapep 16-17.

Lelaa di nla ba “ndémbél ilam . . . i bipôdôl”? (1 Timôtéô 4:12)

Di pot ni loñgeñem, di tinak bôt lipém i likalô; di tôp tjémbi ni ñem wés wonsôna, di bén-ga timbhe i makoda hiki ngéda, di podok maliga, di lédhak bôt bape, di nwahak hilégé.​—w22.04, mapep 6-9.

Inyuki binuga (tole biane) bina bi bi yé i kaat Daniel pes 7 bi yé ndik nuga yada i kaat Masoola 13:1, 2?

Nuga i kaat Masoola pes 13 i ta ndik bé ane yada, kiki bo Rôma. Ndi i yé biane gwobisôna bi bi ma énél bôt ba binam.​—w22.05, lipep 9.

Imbe njel i tôbôtôbô di nla gwélél inyu unda le di mbôdôl Djob ñem le a téé sép?

Ibale mut a nsol bés, a unbaha bés, tole a boñ bés béba, di nlama boñ biliya le di unbene bañ nye, to téédana nye hiun, ndi di nlama bii mam i moo ma Yéhôva. A ga mélés mandutu momasôna béba i bi lona.​—w22.06, mapep 10-11.

Kii mankéé nu a nsoohe i likoda a nlama bigda?

A nlama bigda le masoohe ma nlama bé gwéélana inyu ti lôk kéé maéba, to inyu ti minlegla. I ta bé to nseñ le i bibôdle bi likoda, a “bulus bibuk” i ngéda a nsoohe. (Matéô 6:7)​—w22.07, mapep 24-25.

Lelaa “i bôt ba bi bana lem i boñ mam mabe” ba ga ‘tuge inyu bikééhene’? (Yôhanes 5:29)

Ba ga kogse bé bo inoñnaga ni mam ba bi boñ behee. Ndi ba ga kéés bo inoñnaga ni maboñok map i mbus bitugne.​—w22.09, lipep 18.

Mambe makénd J. F. Rutherford a bi ti i likoda li ndôn i sôñ Dipos nwii 1922?

I likoda li ndôn li bé i Cedar Point, nyoo i Ohio, i loñ Amérika, a bi kal le: “Kiñe i ñane! Ni gwé nson i legel bôt bobasôna i jam li. Jon añlana, añlana, añlana inyu Kiñe ni Ane yé!”​—w22.10, mapep 3-5.

Kaat Yésaya pes 30 i mpôdôl manjel maa Djob a ngwélél inyu hôla bés i hônba, mambe ma?

I pes kaat i, i ñunda le (1) a ñemble, a ntimbhe ki masoohe més; (2) a nti bés maéba malam; (3) a nsayap bés nano ni i dilo di nlo.​—w22.11, lipep 9.

Inyuki di nkal le bibañga bi yé i kaat Tjémbi 37:10, 11, 29 bi bi bi yon i ngéda kôba, bi ga yon ki i dilo di nlo?

Bibañga bi David bi ntoñol niñ ilam i i bé i Israel, kiki bo i ngéda Salômô a bé ane. Yésu a bi pôdôl paradis i i ga lo, a sima kaat Tjémbi 37:11. (Matéô 5:5; Lukas 23:43)​—w22.12, mapep 8-10, 14.