Gwéha i tinde we i añal ñañ nlam!

1. Kii di bi nigil i likoda li nwii 2023?

I LIKODA li nwii 2023,a ba bi lona mahéñha inyu ngim biniigana di nhémle, ba legel ki bés mam malam mu nson wés u likalô. Kiki hihéga, di bi nigil le ngim bôt i ga bana pôla i nigil i yi Yéhôva yak i mbus tjiba i Babilôn Nunkeñi. Di bi nigil ki le ibôdôl i sôñ Maye sép nwii 2023, ba ga bat ha bé batéé likalô le ba ti ñañga wap u likalô wonsôna. Baa i mahéñha mana, ma ñunda le nson u likalô u gwé ha bé nseñ? To jam!

2. Kiki dilo di ntagbe, inyuki nson likalô u nlôôha ba nseñ? (Markô 13:10)

² Kiki dilo di ntagbe, hala nyen nson wés u likalô u nlôôha ba nseñ. Inyuki? Inyule ngéda i ta ha bé ngandak wee lisuk li nlo. Di wan i yom Yésu a bi kal i ngéda a bi pôdôl nson u likalô i dilo di nsôk. (Añ Markô 13:10.) Kaat Matéô i ñunda le Yésu a bi kal le ñañ nlam u nlama añlana ni nkoñ ’isi wonsôna ilole “lisuk” li nlo. (Matéô 24:14) I buk ba ngwélél hana, i nsômbôl pôdôl lisuk li béba nkoñ ’isi u Satan. Yéhôva a bi téé ‘kel ni ngeñ’ i mam ma ma ga bôña. (Matéô 24:36; 25:13; Minson mi baôma 1:7) Hiki kel i ntagbe, di nkôôge bebee ni i kel i. (Rôma 13:11) Jon, di nlama ke ni bisu i añal ñañ nlam, letee lisuk li nlo.

3. Kii i ntinde bés i añal ñañ nlam?

³ I ngéda di ñôt pék mu nson wés u likalô, i nlôôha ba nseñ le di badba ini mbadga le: Inyuki di ñañal ñañ nlam? Gwéha yon i ntinde bés i añal ñañ nlam. I yom di mboñ i nson wés u likalô i ñunda gwéha yés inyu ñañ nlam, gwéha yés inyu bôt, iloo mam momasôna gwéha yés inyu Yéhôva ni jôl jé. Di pôdôl ndugi gwéha yés inyu ñañ nlam.

DI NTÉÉ LIKALÔ INYULE DI NGWÉS ÑAÑ NLAM

4. Kii u nôgda i ngéda ba nlegel we nwin nlam?

⁴ Baa u nhoñol kii u bi nôgda i ngéda ba bi legel we nwin u nlam, bebek ligwéé li man, tole loñge bôlô u bi kôhna? Ibabé pééna, u bi nyamnda ni ngôñ i kabna i nwin u ni lihaa joñ lôñni mawanda moñ. Baa nlélém jam won u bi nôgda i ngeñ u bi nok nwin u nlôôha ba nlam, hala wee ñañ nlam u Ane?

5. Kii u bi nôgda i ngéda u bi nok ñañ nlam inyu ngélé bisu? (Béñge yak titii.)

⁵ Hoñol i yom u bi nôgda i ngéda u bi nok maliga inyu ngélé bisu. U bi nigil le Tata woñ nungingii a ngwés we, a gwé ki ngôñ le u yila ngwélél wé, u bi nigil ki le a mbôn le a ga mélés mandutu, ni ki le u nla bana botñem i tehe bôt boñ ba ba bi wo i mbok yondo, u nigil ki ngandak mam ipe. (Markô 10:29, 30; Yôhanes 5:28, 29; Rôma 8:38, 39; Masoola 21:3, 4) Maliga ma, ma bi kônha we maséé. (Lukas 24:32) U bi gwés i mam u bé nigil, jon u bééna ngôñ i añle mo bôt bape!—Hégha ni Yérémia 20:9.

6. Kii di nigil mu ndémbél i Ernest bo Rosa?

⁶ Di wan hihéga hiada. Mankéé ba nsébél le Ernestb a bééna yom kiki bo jôm li nwii i ngéda isañ a bi wo. Ernest a mbigda le: “Me bé badba le: ‘Baa a nke i ngii? Baa kiki a nwo, a ga niñ ha bé kekikel?’ Me bé njôñ ni i boñge ba ba bééna ki basañ bap.” Ernest a bé béna ke i wom u soñ, a ôm maboñ ’isi i bisu bi soñ i papa yé, a soohege le: “Soho a Nyambe, me gwé ngôñ i yi i het pua yem a yé.” I mbus 17 nwii le isañ a bi wo, Ernest a bi bôdôl nigil Bibel. A bé maséé i nigil le bawoga ba nyi bé to yom, ndik kiki mut a yé i hilo, ni le Bibel i mbôn le ba ga lo i bitugne i dilo di nlo. (Ñañal 9:5, 10; Minson mi baôma 24:15) A bi sôk a kôhna mandimbhe i mambadga ma bé tééñga nye ibôdôl behee! Maliga a bé nigil ikété Bibel ma bé lémél nye ngandak. Yak nwaa wé Rosa a bi bôdôl nigil Bibel, a gwés ki i mam a bé nigil. Ba bi sôblana i nwii 1978. Ni makénd, ba bi añle bôt bap ba lihaa, mawanda map ni bôt bape i mam malam ba bé nigil. Ernest ni nwaa wé Rosa ba bi pam i hôla iloo 70 ma bôt i kôhna sôble.

7. Kii i yé i pam i ngéda gwéha i maliga i ño minkañ ikété miñem nwés? (Lukas 6:45)

⁷ I yé maliga le i ngéda di ngwés i mam di nigil ikété Bibel, di nla bé yén nwee, di ñañle ndik mo bôt bape. (Añ Lukas 6:45.) Di nôgda kiki banigil ba Yésu ba hiai hi bisu ba ba bi kal le: “Di nla bé waa pot i mam di bi tehe, di nok ki.” (Minson mi baôma 4:20) Di nlôôha ngwés maliga, jon di gwé ngôñ i añle mo ngandak bôt.

DI NTÉÉ LIKALÔ INYULE DI NGWÉS BÔT

8. Kii i ntinde bés i añle bôt bape ñañ nlam? (Béñge minkéñék mi matila mini le “Gwés bôt—U yilha ki bo banigil.”) (Béñge yak titii.)

⁸ Kiki Yéhôva bo Yésu, di ngwés bôt. (Bingéngén 8:31; Yôhanes 3:16) Di nkon i bôt ba gwé ‘bé Nyambe’ ngoo ni i bôt ‘ba gwé bé botñem.’ (Éfésô 2:12) Ba gwé ngandak mandutu, ndi bés di gwé i yom i mbéda bo, ñañ nlam u Ane. Gwéha yés ni konangoo yés i ntinde bés i añle bo ñañ nlam. I nwin u mahee u, u nla ti bo botñem, u hôla ki bo i bana niñ ilam nano ni botñem i “bañga niñ,” hala wee, niñ ilam i boga ni boga i mbok yondo.—1 Timôtéô 6:19.

9. Kii di ñañle bôt inyu dilo di nlo, inyuki? (Ézékiel 33:7, 8)

⁹ Gwéha di ngwés bôt i ntinde bés i behe bo le lisuk li béba nkoñ ’isi ini li yé bebee. (Añ Ézékiel 33:7, 8.) Di nkônôl bôt bés ba libôk ni bôt bés ba lihaa ba ba nhémle bé Nyambe ngoo. Ngandak bôt i niñ ibabé i yi le “njiiha ikeñi y’a ba, i nya i yé ngi ba ibôdôl i bibôdle bi nkoñ ’isi letee ni nano, to, y’a ba ha bé ki.” (Matéô 24:21) Di gwé ngôñ le ba yi i yom i ga tagbe i ngéda bikééhene i: ba ga tjé kwéha base, i mbus yak i béba nkoñ ’isi ini i ga tjiba i gwét bi Armagédôn. (Masoola 16:14, 16; 17:16, 17; 19:11, 19, 20) Di nsoohe le libim li bôt li nok mabéhna ma, li pohol ki i gwélél Yéhôva lôñni bés nano. Ndi kii i ga tagbe inyu bôt bés ba libôk ni bôt bés ba lihaa ba ba ñemble bé bés?

10. Inyuki i nlôôha ba nseñ le di kee ni bisu i behe bôt?

¹⁰ Kiki di ntehe i yigil i ntagbe, sômbôl i Yéhôva i yé le a tohol bôt bobasôna ba ba ga pohol i gwélél nye i ngéda ba ga tehe tjiba i Babilôn Nunkeñi. Jon i nlôôha ba nseñ le di kee ni bisu i behe bo nano. Di hôya bañ le: I yom di nkal bo nano, yon ba ga bigda ha ngéda i. (Hégha ni Ézékiel 33:33.) Bebek i ngéda ba ga hoñol i yom di bi kal bo, hala a ga tinde bo i yila bagwélél ba Yéhôva ilole lisuk li nlo. Kiki ntat ndap mok i Filipi a bi héñha i ngéda ‘hisi hi bi kahal nyeñg,’ bebek i bôt ba ñemble bé bés nano ba ga héñha i ngéda tjiba i Babilôn Nunkeñi i ga lo kunda yada.—Minson mi baôma 16:25-34.

DI NTÉÉ LIKALÔ INYULE DI NGWÉS YÉHÔVA NI JÔL JÉ

11. Lelaa di nti Yéhôva lipém, bibégés ni lipémba? (Masoola 4:11) (Béñge yak titii.)

¹¹ Jom i bisu bisu i i ntinde bés i añal ñañ nlam i yé le di ngwés Yéhôva ni jôl jé lipubi. Di ntehe nson wés u likalô kiki ngim njel inyu bégés Djob di ngwés. (Añ Masoola 4:11.) Di yé kiñ yada le, Yéhôva Nyambe wés nyen a kôli kôhna lipém, ni bibégés ni lipémba. Di nti nye lipém ni bibégés i ngéda di ñunda bôt bape le nyen a bi “hek mam momasôna,” ni le nyen a bi hek bés. Di nti nye lipémba, hala wee ngui yés i ngéda di ngwélél ngéda yés, ngui yés, ni bigwel gwés bi moo inyu añal ñañ nlam kiki la yés. (Matéô 6:33; Lukas 13:24; Kôlôsé 3:23) I sem kwep, di ngwés kal bôt bape njee a yé i Djob di ngwés. Di yé ki maséé i añle bôt bape jôl jé ni i hôla bo i yi umbe ntén Djob a yé. Inyuki?

12. Lelaa di mpubus jôl li Yéhôva i ngéda di yé i likalô?

¹² Gwéha di gwé inyu Yéhôva i ntinde bés i pubus jôl jé. (Matéô 6:9) Di gwé ngôñ i yis bôt bape le mam momasôna Satan a bi pot inyu Yéhôva ma yé bitembee. (Bibôdle 3:1-5; Hiôb 2:4; Yôhanes 8:44) I ngéda di ñañal ñañ nlam, di gwé ngôñ ikeñi i kal bôt bobasôna njee a yé toi Yéhôva. Di gwé ngôñ le ba yi le lem yé i bisu i yé gwéha, le a ñéga mam i nya i téé sép ni le ndék ngéda, Ane yé i ga mélés mandutu momasôna di mboma, i lona ki bôt ba binam nsañ ni maséé. (Tjémbi 37:10, 11, 29; 1 Yôhanes 4:8) I ngéda di nsôñ jôl li Yéhôva i likalô, wee di mpubus jo. Di yé ki maséé inyule i ngéda di mboñ hala, di mboñ i yom hiki Mbôgi Yéhôva i nlama boñ. Inyuki di nkal hala?

13. Inyuki di yé maséé i ngéda ba nsébél bés Mbôgi Yéhôva? (Yésaya 43:10-12)

¹³ Yéhôva a bi kal le di yé “mbôgi” yé. (Añ Yésaya 43:10-12.) Hala a yé ngandak nwii nano le ikété léta yada, Juu li bakena ntôñ li bé kal le: “Hala a yé nsima nkeñi inyu hiki wada wés le ba sébél nye le Mbôgi Yéhôva.”c Inyuki hala? Di yoñ hihéga inyu nok jam li. Ibale u gwé ngôñ le mut a ba mbôgi yoñ i bikééhene, u ga pohol i mut u nyi loñge ni nu u mbôdôl ñem, nu a gwé jôl lilam kayéle ba nla hémle mbôgi yé. Mu kiki a mpohol bés i ba Mbôgi yé, Yéhôva a ñunda le a nyi bés loñge, a mbôdôl bés ñem le di ga añle bôt le a yé bañga mpom Djob. Hala a yé toi nsima nkeñi inyu yés i ba Mbôgi yé, jon di mboñ kii yosôna di nla inyu yis bôt bape jôl jé, ni inyu unda bo le i mam momasôna ba mpot inyu yé ma yé bitembee. I ngéda di mboñ hala, di ñunda le di mboñ toi i yom jôl di bééga li mbat bés: Mbôgi Yéhôva!—Tjémbi 83:18; Rôma 10:13-15.

DI GA KE NI BISU I AÑAL ÑAÑ NLAM LETEE NI LISUK

14. Mambe mam malam ma mbem bés i dilo di nlo?

¹⁴ Di nyamnda ni ngôñ i tehe mam malam ma ma mbem bés i dilo di nlo! Ni mahôla ma Yéhôva, di mbot ñem le ngandak bôt i ga neebe maliga ilole njiiha ikeñi i mbôdôl. Di yé ki maséé i yi le bebek yak i njiiha ikeñi, ngandak bôt i ga tjôô nkoñ ’isi u Satan, inyu lo i bégés Yéhôva lôñni bés!—Minson mi baôma 13:48.

15-16. Kii di ga ke ni bisu i boñ, letee ni imbe ngéda?

¹⁵ Ilole di mpam ha, di gwé bôlô ikeñi. Di gwé nsima nkeñi i yoñ ngaba i nson u u ga bôña ha bé, hala wee i añal ñañ nlam u Ane Nyambe ni nkoñ ’isi wonsôna. I nlélém ngéda, di nlama ke ni bisu i béhe bôt. Ba nlama yi le lisuk li béba nkoñ ’isi ini li gwé ni moo. I mbus, i ngéda hilo hi bikééhene y’a kola, ba ga yi le i nwin di bé añal u bé lôl toi ni Yéhôva.—Ézékiel 38:23.

¹⁶ Jon kii di nlama ke ni bisu i boñ? Gwéha inyu ñañ nlam, gwéha inyu bôt, iloo mam momasôna, gwéha inyu Yéhôva Nyambe ni inyu jôl jé i ntinde bés i ke ni bisu i añal ñañ nlam ni makénd ibabé i tiñha, letee ni i ngéda Yéhôva a ga kal le “Hala a kôli!”