Lelaa Yésu a bé tehe jôl li Yéhôva?

1-2. (a) Kii Yésu a bi boñ ilole a nwo? (b) Mambe mambadga di ga timbhe munu yigil ini?

BIKÔKÔA bi ngwa mbok, hilo 14 hi sôñ Nisan i nwii 33 N.Y., ilole Yuda a nliibana nye, ba kéés nye, ba kép nye mbai, ba nol nye, Yésu a bi jéla i tuñ ngii ni baôma ba ba bi téñbe ni nye. I ngéda ba bi mal je, ilole a ntjôla bo, a bi ti bo makénd. Ndék ngéda ilole ba bé nyodi mu tuñ ngii, Yésu a bi yoñ ndék ngéda inyu kwel ni Yéhôva. Ñôma Yôhanes a bi tila i masoohe ma ikété kaat Yôhanes pes 17.

² I ngéda di ñemble masoohe ma Yésu, di nhoñol le kii i bé i ntééñga nye ha ngéda i? Lelaa masoohe mé ma nhôla bés i tehe kii i bé toi nseñ inyu yé i ngéda a bé gwel nson wé hana ’isi? Di timbhe i mambadga ma.

“ME BI BOÑ LE BA YI JÔL JOÑ”

3. Yésu a bi kal le a mboñ le banigil bé ba yi jôl jé, hala a nkobla le kii? (Yôhanes 17:​6, 26)

³ Mu masoohe mé, Yésu a bi kal le: “Me bi boñ le ba yi jôl joñ.” A bi kal hala letee ni ngélé iba le a nyis banigil bé jôl li Yéhôva. (Añ Yôhanes 17:​6, 26.) Kii a bé sômbôl kal? Baa a bi kal bo le jôl li Djob le Yéhôva? Ngo ba bé bon ba Lôk Yuda, ba bé yi le jôl li Djob le Yéhôva. I jôl li, li yé ikété Bitilna ni hop Lôk Héber, bebee le 7 000 di ngélé. Jon Yésu a bi kal bé banigil bé le jôl li Djob le Yéhôva. Ndi a bi toñle bo kii i jôl li, li nkobla. Yésu a bi boñ le banigil bé ba kônde yi Yéhôva, sômbôl yé, minson nwé, bilem gwé, i nya i yé le mut numpe a bé bé le a boñ.

4-5. (a) Ti hihéga hi hi ñunda lelaa di yé le di kônde yi mut? (b) Inyuki di nla kal le Yésu a bi niiga banigil bé jôl li Yéhôva?

⁴ Di yoñ le hihéga, hégda le mañ wada mu likoda joñ jôl jé le David, a yé dokta, u nyi nye ibôdôl behee. Nano kel yada, kon unu u nai we, u nke ngwéé ni ngwéé i dokta i het a nsal, a tibil we, lelaa u mbôdôl tehe i mankéé nu? U nkônde gwés nye! U ntehe ndik bé David kiki mañ u likoda joñ, ndi u ntehe yak nye kiki dokta nu a bi tibil we, a tohol we.

⁵ Hala yak nyen banigil ba Yésu ba bé yi jôl li Yéhôva. Ndi i ngéda Yésu a bé gwel nson wé hana ’isi, a bi hôla bo i kônde yi Yéhôva. Inyuki di nkal hala? Inyule Yésu a mpôna Isañ, a bé pot kiki nye, a boñok mam kiki nye. Inyu hala nyen i ngéda banigil ba Yésu ba bi tehe lelaa a niiga, ba tehge lelaa a niñ ni bôt, ba bi kônde “yi” Yéhôva.​—Yôhanes 14:9; 17:3.

“JÔL JOÑ LI U BI TI ME”

6. Inyuki Yésu a bi kal le Yéhôva a bi ti nye jôl jé? (Yôhanes 17:​11, 12)

⁶ Yésu a bi soohe inyu banigil bé, a kal le: “Tééda bo inyu jôl joñ li u bi ti me.” (Añ Yôhanes 17:​11, 12.) Baa hala a nkobla le Yésu a bi bôdôl séblana le Yéhôva? Heni. I ngéda Yésu a bé soohe Yéhôva, a bi kal le “jôl joñ.” Jon, Yésu a bi yoñ bé jôl li Yéhôva. Ndi kii Yésu a bé sômbôl ni kal i ngéda a bi pot le Nyambe a nti nye jôl jé? Jam li bisu li yé le Yésu a bi lo hana ’isi i jôl li Yéhôva, a bé pot ki i jôl jé. I jôl jé ki nyen a bé bôñôl bihélha bi mam. (Yôhanes 5:43; 10:25) Jam lipe li yé le jôl li Yésu li nkobla le “Yéhôva a yé tohi.” Ñ, jôl li Yésu li nkiha toi ni jôl li Yéhôva.

7. Ti hihéga hi hi ñunda inyuki Yésu a bé pot i jôl li Yéhôva?

⁷ Di yoñ le hihéga, i ngéda ñane loñ a ñep mut homa, i mut nu a nke i pot i jôl jé. I ngéda i mut nu a mpot, a yé wengoñle ñane loñ nyemede nyen a yé i pot. Hala yak nyen Yésu a bé pot i jôl li Yéhôva.​—Matéô 21:9; Lukas 13:35.

8. Ilole Yésu a nlo hana ’isi, inyuki Yéhôva a bi kal le a bééga jôl jé? (Manyodi 23:​20, 21)

⁸ Yésu a yé Bañga, inyu hala nyen Yéhôva a bi gwélél nye inyu kal biañgel ni bôt ba binam ngim mam. (Yôhanes 1:​1-3) Bebek, Yésu nyen a bé añgel Yéhôva a bi ep inyu tééda bon ba Israel i ngéda ba bé i ñoñ. Yéhôva a bi kal bon ba Israel le ba nôgôl i añgel i. A kal ki bo inyuki ba nlama nôgôl nye. Nye bo le: “Inyule a bééga jôl jem.”a (Añ Manyodi 23:​20, 21.) Yéhôva a bi kal hala inyule Yésu a mpot i jôl jé, nyen a yé ki mut bisu i pubus jôl li Yéhôva.

“A TA, TI JÔL JOÑ LIPÉM”

9. Lelaa Yésu a bé tehe jôl li Yéhôva? Toñol.

⁹ Kiki di ntip tehe, ilole Yésu a nlo hana ’isi, a bé jôha bé ni jôl li Yéhôva, li bé nseñ iloo ’héga inyu yé. I ngéda nson wé u bé bebee ni mal, a bi kal Yéhôva le: “A Ta, ti jôl joñ lipém.” Isañ a bi timbhe nye ni kiñ ikeñi nyoo ngii le: “Me bi ti jo lipém, m’a kônde ki ti jo lipém.”​—Yôhanes 12:28.

10-11. (a) Lelaa Yésu a bi ti jôl li Yéhôva lipém? (Béñge yak titii.) (b) Inyuki i mbéda le di pubus jôl li Yéhôva, di unda ki le Satan a yé mut bitembee?

¹⁰ Yésu nyemede a bi ti jôl li Isañ lipém. Lelaa? A bi toñle bôt lelaa Yéhôva a yé, ni maboñok mé. Handugi i ti jôl li Yéhôva lipém, i bé béda le a pubus yak jo, a unda ki le Satan a yé mut bitembee. A bi unda le i jam li, li nlôôha toi ba nseñ i ngéda a bi niiga banigil bé i soohe le: “A Tata wés nu a yé i ngii, jôl joñ li tééba lipubi.”​—Matéô 6:9.

¹¹ Inyuki i bé béda le Yésu a pubus jôl li Yéhôva, a unda ki le Satan a yé mut bitembee? Inyule Satan a bi hoo jôl li Yéhôva Nyambe mahindi i wom Éden. Satan a bi kal le Yéhôva a yé mut bitembee ni le a nsôô Adam bo Éva jam lilam. (Bibôdle 3:​1-5) Satan a bi kal yak le Yéhôva a ñéga bé bôt loñge. I ngéda a bi pot hala, a bi ôbôs jôl li Yéhôva. I mbus ngéda, i dilo di Hiôb, Satan a bi kal le bôt ba ngwélél Yéhôva ndik inyule a nkôp bo bisai. I mut nsohi nu, a bi kal ki le mut nye ki nye a nla bé gwélél Yéhôva ibale ndutu i nai. (Hiôb 1:​9-11; 2:4) I bé béda le ngéda i tagbe inyu boñ le bôt ba yi njee a mpot maliga, ni njee a mpot bitembee.

“ME NTI NIÑ YEM”

12. Gwéha Yésu a ngwés Yéhôva i bi tinde nye i boñ kii?

¹² Gwéha Yésu a ngwés Yéhôva i bi tinde nye i boñ kii yosôna a bé la inyu pubus jôl jé ni i unda le Satan a yé mut bitembee. Yésu a bi kal le: “Me nti niñ yem.” (Yôhanes 10:​17, 18) Ñ, a bé bebee i wo inyu jôl li Yéhôva.b Adam bo Éva ba bé peles, ndi ba bi kôm Yéhôva mbus, ba noñ Satan. Yésu nye a bi neebe i lo hana ’isi, a unda ki le a ngwés toi Yéhôva. A bé nôgôl Yéhôva hiki ngéda, hala a bé nene i bipôdôl gwé ni i maboñok mé. (Lôk Héber 4:15; 5:​7-10) A bi téñbe ni Yéhôva i ngéda a bé hana ’isi letee ni i nyemb yé i kék njiiha. (Lôk Héber 12:2.) Ndéñbe yé i bi unda le a ngwés toi Yéhôva, a gwéhék jôl jé.

13. Inyuki Yésu a bé a kôli toi unda le Satan a yé mut bitembee? (Béñge yak titii.)

¹³ Niñ i Yésu i bi unda le Satan nyen a mpot bitembee, he Yéhôva bé! (Yôhanes 8:44) Yésu a nyi Yéhôva iloo bôt bobasôna. Ibale mam Satan a mpot ma bak maliga to ndék, ki Yésu a nyi hala. Ndi di ntehe le Yésu a bi kit le a mpubus ndik jôl li Yéhôva. Yak i ngéda i bé nene wengoñle Yéhôva a nkôm nye mbus, Yésu a bé bebee i wo iloole a ndogbene Isañ.​—Matéô 27:46.c

“ME MÉLÉS NSON . . . U BI TI ME LE ME BOÑ”

14. Lelaa Yéhôva a bi sayap Yésu?

¹⁴ Mu masoohe mé ma nsôk ilole a nwo, Yésu a bi kal Yéhôva le: “Me mélés . . . nson u bi ti me le me boñ.” A bé yi le to kii i leñek, Yéhôva a’ sayap ndik nye. (Yôhanes 17:​4, 5) Yésu a bé a kôli toi bôdôl Yéhôva ñem. Yéhôva a bi yôi bé nye ikété soñ. (Minson mi baôma 2:​23, 24) A bi tugul nye, a ti nye tel ikeñi nyoo i ngii. (Filipi 2:​8, 9) I mbus ngéda, Yésu a bi bôdôl énél nyoo i ngii. I Ane i, i ga boñ kii? Jam li yôhne iba Yésu a bi niiga mu masoohe mé li yé le: “Ane yoñ i loo. Sômbôl yoñ [i Yéhôva] i bôña hana ’isi, kiki i ngii.”​—Matéô 6:10.

15. Kii ipe Yésu a ga boñ?

¹⁵ Ndék ngéda, Yésu a ga jôs baoo ba Yéhôva gwét, a tjé bibéba bi bôt i Armagédôn. (Masoola 16:​14, 16; 19:​11-16) I mbus, a ga leñ Satan i mok, i “soñkum.” (Masoola 20:​1-3) I Ane hikôô nwii, Yésu a ga lona bañga nsañ, a boñ ki le bôt ba binam ba yila peles. A ga tugul bawoga. A yilha hisi hiosôna paradis. Sômbôl i Yéhôva i ga yon!​—Masoola 21:​1-4.

16. Kii i ga bôña i lisuk li Ane hikôô nwii?

¹⁶ Niñ y’a ba lelaa i lisuk li Ane hikôô nwii? Béba yo ki yo i mba ha bé. Bôt ba binam ba ga bana ha bé ngôñ ni nwéhél i bibéba, ba ga bana ha bé ki to ngôñ ni Yésu, to ni minhook inyu kôôge Yéhôva bebee. Yak “ñoo nu sôk le nyemb, [i di bi kôdôl ni njel Adam] a’ tjiba.” Bisoñ bi ga yégle hôlô. Bawoga ba ga tuglana. Bôt bobasôna hana ’isi ba ga ba peles.​—1 Korintô 15:​25, 26.

17-18. (a) Kii i ga bôña i lisuk li Ane hikôô nwii? (b) Kii Yésu a ga boñ i lisuk li Ane hikôô nwii? (1 Korintô 15:​24, 28) (Béñge yak titii.)

¹⁷ Kii ipe i ga bôña i lisuk li Ane hikôô nwii? Loñge jam i ga bôña ha ngéda i. Bôt bobasôna ba ga yi le Yéhôva nyen a kôli énél. Inyuki? I wom Éden, Satan a bi kal le Yéhôva a ntembee ni le a ñéga bé bôt ba binam loñge. Jon i lisuk li Ane hikôô nwii, bôt bobasôna ba ga yi le Satan a yé mut bitembee, ni le Yéhôva a yé toi Tata wés nu a ngwés bés ngandak.

¹⁸ Bôt bobasôna ba ga yi le bitembee gwon Satan a bé pot. Kii Yésu a ga boñ i lisuk li énél yé? Baa a ga boñ kiki Satan nu a nkolba Yéhôva? To! (Añ 1 Korintô 15:​24, 28.) Ñ, Yésu a ga timbhe Isañ Ane. A ga suhus nyemede isi énél i Yéhôva. Maselna ni Satan, Yésu a yé bebee i nimis mam momasôna inyule a ngwés Yéhôva.

19. Lelaa Yésu a ntehe jôl li Yéhôva?

¹⁹ Di nok inyuki Yéhôva a bi ti Yésu jôl jé! Yésu a bi hôla toi bôt i yi njee a yé Yéhôva. Lelaa ni Yésu a ntehe jôl li Yéhôva? Li yéne nye nseñ iloo mam momasôna. A bi wo inyu jôl li Yéhôva, a’ timbhe ki Yéhôva mam momasôna i lisuk li Ane hikôô nwii. Lelaa di yé le di noñ ndémbél i Yésu? Di ga timbhe i mbadga i mu yigil i noñ ha.