Mateus

10 Dung i, dijou Jesus ma 12 siseanna. Jala dilehon ma tu nasida huaso laho palaohon suru-suruan na jahat, pamalumhon nasa sahit dohot nasa hagaleon.

2 On ma goar ni na 12 apostel i: Na parjolo si Simon na laos dijou si Petrus dohot si Andreas donganna saama, si Jakobus dohot si Johannes angka anak ni si Sebedeus, 3 si Pilippus dohot si Bartolomeus, si Tomas, si Mateus sijalo pajak,* si Jakobus anak ni si Alpeus, si Tadeus, 4 si Simon halak Kana* dohot si Judas Iskariot na manjehehon Jesus di pudian ni ari.

5 Disuru Jesus ma laho apostel na 12 i jala dilehon ma tu nasida tudu-tudu, “Unang ma laho hamu tu angka bangso na asing jala unang ma masuk tu kota ni halak Samaria. 6 Alai, holan tu halak Israel na songon biru-biru na lilu i ma hamu laho. 7 Laho ma hamu jala baritahon ma, ‘Nunga jonok Harajaon banua ginjang i.’ 8 Pamalum ma na marsahit, pahehe ma halak na mate, pamalum ma na marsahit kusta, palao ma suru-suruan na jahat. Ndang margarar i dijalo hamu, alani i lehon ma ndang margarar. 9 Unang ma boan mas manang perak manang tombaga di hajutmuna, 10 manang dua baju,* manang sipatu, manang tungkot manang inganan ni sipanganonmu di pardalanan, ai tama do parkarejo mandapot sipanganonna.

11 “Tu kota manang tu huta na dia pe hamu laho, lului ma na olo manjalo baritamuna jala tading ma hamu disi sahat tu na laho hamu. 12 Tingki masuk hamu tu sada jabu, pangkulingi ma parjabu i. 13 Molo dijalo parjabu i do baritamuna, mian ma hadameonmuna di nasida. Alai molo ndang olo nasida manjalo, mulak tu hamu ma damemuna i. 14 Molo adong na so manjalo manang na so manangihon hamu, laho ma hamu sian jabu manang sian kota i jala paspashon ma orbuk sian patmuna i. 15 Situtu do na hudok on tu hamu, umborat do panguhuman tu kota i sian tu Sodom dohot Gumora di Ari Paruhuman.

16 “Parrohahon ma on! Husuru do hamu songon biru-biru tu tonga-tonga ni serigala. Alani i, manat ma hamu songon ulok jala ias ma rohamuna songon darapati. 17 Manat ma hamu tu angka jolma, ai boanon ni nasida do hamu tu angka pengadilan jala linsinganna do hamu di angka sinagoga* ni nasida. 18 Boanonna ma hamu tu jolo ni angka gubernur dohot angka raja alani ahu, jala paboaonmuna ma taringot tu ahu di jolo ni angka bangso. 19 Alai tingki diboan hamu, unang ma holsohon hamu taringot tu sidohononmuna. Ai laos di tingki i do paboaonna hata sidohononmuna. 20 Ai ndang sian dirimuna hata sidohononmuna, alai urupan ni tondi parbadia do hamu. 21 Asing ni i, pasahaton ni na marhaha maranggi ma haha anggina tu hamatean, jala songon i ma nang ama tu anakna. Aloon ni ianakhon ma natua-tuana jala pasahatonna tu hamatean. 22 Jala dihasogohon sude jolma ma hamu alani goarhu, alai paluaonna do na manahan ro di ujungna. 23 Molo dibahen na hansit tu hamu di sada kota, lari ma hamu tu kota na asing. Situtu do na hudok on tu hamu, ndang na tardalani hamu sude kota di Israel sahat tu na ro Anak ni jolma i.

24 “Ndang tumimbo sisean sian guruna, manang tumimbo hatoban sian tuanna. 25 Sae ma molo sisean dos songon guruna, jala hatoban dos songon tuanna. Molo didok halak do Beelsebul* nampuna jabu i, tarlumobi ma tu donganna sajabu? 26 Alani i, unang ma mabiar tu nasida, ndang adong na hungkup na so bungkaon jala ndang adong na buni na so papataron. 27 Na hupaboa tu hamu di na holom, hatahon ma di na tiur. Jala aha na huhusiphon na binegemuna, baritahon ma i sian atap ni jabu. 28 Unang ma habiari hamu halak na boi mambunu daging alai ndang boi mangago hangoluan.* Alai, habiari ma Ibana na boi mangaripashon hangoluan dohot daging di Gehena.* 29 Nda salimper* do digadis dua amporik? Alai, ndang adong nanggo sada pe sian i na madabu tu tano na so pamotoan ni Amamuna. 30 Gari obuk na di ulumuna pe nunga dibilangi sude. 31 Alani i unang ma mabiar, ummarga do hamu sian godang amporik.

32 “Ganup halak na mandok mananda ahu di jolo ni jolma, ahu pe dohononku do na hutanda ibana di jolo ni Damang na di banua ginjang i. 33 Alai manang ise na mansoadahon ahu di jolo ni jolma, soadahononku ma ibana di jolo ni Damang na di banua ginjang i. 34 Unang dirimpu hamu na mamboan dame ahu ro tu tano on. Ndang na mamboan dame ahu ro, alai mamboan podang do. 35 Mambahen parbadaan do ahu ro, sahalak baoa mangalo amana, sahalak borua mangalo inana, jala parumaen mangalo simatuana boru. 36 Sasintongna, musu ni sasahalak i ma donganna sajabu. 37 Manang ise na humolong rohana tu ama manang tu inana sian tu ahu, ndang tama ibana siseanku. Jala manang ise na humolong rohana tu anak manang tu boruna sian tu ahu, ndang tama ibana siseanku. 38 Jala manang ise na so manuhuk hau partinaonanna* jala ndang mangihuthon ahu, ndang tama ibana siseanku. 39 Manang ise na marsitutu paluahon ngoluna, agoan ngoluna do. Jala manang ise na agoan ngoluna alani ahu, dapotna do i muse.

40 “Manang ise na manjalo hamu, na manjalo ahu do i. Jala manang ise na manjalo ahu, na manjalo Ibana na marsuru ahu do i. 41 Manang ise na manjalo sahalak panurirang ala panurirang ibana, dapotna do upa ni panurirang. Jala manang ise na manjalo halak na mangulahon na sintong ala mangulahon na sintong ibana, dapotna do upa ni halak na mangulahon na sintong. 42 Situtu do na hudok on tu hamu, manang ise na mangalehon sasangkir aek siinumon tu sahalak sian na metmet on ala siseanku ibana, ndang mago upana.”