Lukas

7 Dung sae dihatahon Jesus sude hatana tu angka jolma, laho ma ibana tu Kapernaum. 2 Disi adong sahalak perwira na marsahit hatobanna jala nunga naeng mate. Mansai holong do roha ni perwira i tu hatobanna i. 3 Tingki dibege perwira i taringot tu Jesus, disuru ibana ma deba sian angka pangituai ni halak Jahudi mandapothon Jesus laho mangido asa ro jala pamalumhon hatobanna i. 4 Dung i ro ma nasida mandapothon Jesus, sai dielek-elek nasida ma ibana, ninna ma, “Urupi ma ibana, 5 ai holong do rohana tu bangsonta jala ibana do na pajongjongkon sinagoganami.”* 6 Borhat ma Jesus rap dohot nasida. Alai ndang dao sian jabu i, disuru perwira i ma angka donganna mandok tu ibana, “Tuan, unang pola loja ho, ai ndang tama ahu manjalo ho di jabungku. 7 Alani i ma ndang tama huhilala ro ahu mandapothon ho. Holan dok pe hatam, malum do i naposongki. 8 Ai ahu pe adong do na mamarenta ahu, jala adong do tentara na huparenta. Molo hudok tu tentara i, ‘Laho ho!’ laho do ibana, jala molo hudok tu na asing, ‘Tuson ho!’ ro do ibana, jala ia hudok tu hatobanku, ‘Ulahon on!’ ulahononna do i.” 9 Mambege i, longang ma roha ni Jesus jala didok ma tu angka natorop na mangihuthon ibana, “Situtu do na hudok on tu hamu, gari di Israel ndang jumpang ahu dope halak na songon on balga ni haporseaonna.” 10 Dung mulak angka na sinuruna i tu jabu, nunga malum be hatoban i jumpang ni nasida.

11 Ndang leleng dungkon i, laho ma Jesus tu sada kota na margoar Nain. Angka siseanna dohot angka natorop i pe laho do rap dohot ibana. 12 Dung jonok ibana tu harbangan ni kota i, adong ma halak na mate diusung tu luar, i ma anak sasada ni ina na mabalu. Godang do sian kota i na mandongani ina na mabalu i. 13 Tingki diida Tuan i ibana, asi ma rohana, ninna ma, “Unang be tumatangis.” 14 Dung i, didapothon jala dijama Jesus ma tandu i. So ma na mamboan tandu i jala didok Jesus ma, “O doli-doli, hudok ma tu ho, hehe ma!” 15 Mulak mangolu ma muse na mate i, hundul jala mangkatai. Dung i, dipasahat Jesus ma ibana tu inana. 16 Mabiar ma nasida sude jala dipuji nasida ma Debata, ninna ma, “Nunga hehe sahalak panurirang na gogo di tonga-tonganta,” jala, “Nunga diparrohahon Debata bangsona.” 17 Gabe sar ma barita taringot tu ibana tu saluhut Judea dohot tu sude luat di humaliangna.

18 Dipaboa angka sisean ni si Johannes ma sude na masa i tu si Johannes. 19 Dijou ibana ma dua halak siseanna, jala disuru ma nasida mandapothon Tuan i laho manungkun, “Ho do na laho ro i, manang paimaonnami dope na asing?” 20 Dung jumpang nasida Jesus, didok nasida ma, “Disuru si Johannes Pandidi do hami manungkun tu ho, ‘Ho do na laho ro i, manang paimaonnami dope na asing?’” 21 Tingki i godang do halak na marsahit dipamalum ibana, na marsahit na posi dohot na sinonggopan ni suru-suruan na jahat. Dibahen ibana do muse halak na mapitung gabe marnida. 22 Dialusi Jesus ma nasida, “Laho ma hamu jala paboa ma naung niidamuna dohot naung binegemuna i tu si Johannes. Na mapitung boi marnida, na pangpang boi mardalan, na hona kusta dipamalum, na nengel marbinege, na mate dipangolu jala barita na uli dibaritahon tu halak na pogos. 23 Marlas ni roha ma halak na so ganggu rohana tu ahu.”*

24 Dung laho angka na sinuru ni si Johannes i, didok Jesus ma tu natorop i taringot tu si Johannes, “Aha na niidamuna di padang pasir? Mangida batang ni tolong na niullus ni alogo do? 25 Molo ndang, aha na niidamuna disi? Sahalak baoa na marpangkean na arga do? Tading di istana do halak na marpangkean na arga jala na sonang ngoluna. 26 Sasintongna, aha na niidamuna disi? Mangida panurirang do? Tutu do i, alai hudok ma tu hamu, umbalga do ibana sian sahalak panurirang. 27 Ibana do na nidok ni na tarsurat i, ‘Suruonku ma manjoloani ho suruanku, na laho paradehon dalan di jolom.’ 28 Hudok ma tu hamu, ndang adong na tinubuhon ni borua na umbalga sian si Johannes, alai na ummetmet di Harajaon ni Debata, umbalga do sian ibana.” 29 (Tingki sude halak mambege hata i dohot ma i angka sijalo pajak,* didok nasida ma na tigor Debata, ai nunga tardidi nasida marhite pandidion ni si Johannes. 30 Alai ndang diulahon halak Parise dohot angka siboto patik tudu-tudu* ni Debata, ai ndang dididi si Johannes nasida.)

31 “Antong tu ise ma patudosonku halak na sian sundut* on, jala songon ise do nasida? 32 Tudos do nasida songon dakdanak na hundul di onan na masijouan, mandok, ‘Dipalu hami do suling,* alai ndang manortor hamu; dibahen hami do andung-andung, alai ndang tangis hamu.’ 33 Songon i ma, ro si Johannes ndang mangan roti jala ndang minum anggur, alai didok hamu do, ‘Na sinonggopan ni suru-suruan na jahat do ibana.’ 34 Ia ro Anak ni jolma i mangan jala minum, didok hamu do, ‘Ida ma, simongkus jala sisobur anggur do ibana, dongan ni sijalo pajak* dohot angka pardosa!’ 35 Nang pe songon i, tarida do bisuk sian parniulaonna.”*

36 Adong sahalak Parise na sai mangido tu Jesus asa rap mangan dohot ibana. Alani i, ro ma Jesus tu jabu ni halak Parise i jala hundul ma ibana laho mangan. 37 Adong ma sahalak borua naung ditanda di kota i sahalak pardosa. Diboto ibana do na mangan Jesus di jabu ni halak Parise i jala diboan do botol pualam na marisi miak na angur. 38 Dung i marsinggang ma ibana di pat ni Jesus, tumatangis ma ibana gabe tonu ma pat ni Jesus dibahen iluna, jala diapusi do i mamangke obukna. Dung i, diumma ibana ma pat ni Jesus jala diusehon ma miak na angur i tu patna. 39 Diida halak Parise na manjou Jesus i ma na masa i. Didok ma di bagasan rohana, “Molo na tutu ibana sahalak panurirang, botoonna do ise borua i jala borua na songon dia na manjama ibana i, ai sahalak pardosa do borua i.” 40 Alai dialusi Jesus ma ibana, “Simon, adong naeng hudok tu ho.” Didok si Simon ma, “Hatahon ma Guru!”

41 Adong ma dua halak na marutang tu sasahalak na papinjamhon hepeng. Na sada marutang 500 dinar* jala na asing 50 dinar. 42 Ala ndang adong bahenon ni nasida laho manggarar, dipalua ma nasida na dua. Alani i, na dia ma sian nasida na humolong rohana tu parutanganna i? 43 Dialusi si Simon ma, “Huhilala halak na gumodang i ma utangna.” Didok Jesus ma, “Sintong do alusmi.” 44 Dung i diida ibana ma dompak borua i jala ninna ma tu si Simon, “Diida ho do borua on? Ro ahu tu jabum, ndang dilehon ho aek manunsi* pathu. Alai borua on, ditonui do pathu dohot iluna jala diapusi dohot obukna. 45 Ndang diumma ho ahu laho manjalo* ahu, alai borua on sai diumma do pathu sian mulai masuk tu jabu on. 46 Ndang dimiahi ho ulungku, alai borua on dimiahi do pathu dohot miak na angur. 47 Dibahen i hudok ma tu ho, nunga disesa be dosana na godang* i, alani i ma mansai balga holongna. Ai manang ise na otik dosana disesa, otik do holongna.” 48 Dung i didok Jesus ma tu borua i, “Nunga disesa be angka dosam.” 49 Masipandohan ma angka halak na hundul rap mangan dohot ibana, “Ise do ibana umbahen na boi manesa dosa?” 50 Alai ninna Jesus ma tu borua i, “Haporseaonmi do paluahon ho. Mulak ma ho di bagasan dame.”