Ulaon ni Apostel
11 Dibege angka apostel dohot angka dongan sahaporseaon na di Judea ma naung dohot angka halak sian bangso na asing manjalo hata ni Debata. 2 Tingki ro si Petrus tu Jerusalem, muruk ma angka halak na mangihuthon patik taringot tu sunat. 3 Ninna ma tu si Petrus, “Masuk do ho antong tu jabu ni na so marsunat jala mangan do ho rap dohot nasida.” 4 Alani i, dipatorang si Petrus ma sude na masa i tu nasida ninna ma,
5 “Tingki martangiang ahu di Joppe, ro ma tu ahu sada parnidaan. Huida ma adong na songon abit linen na bidang na herbang jala turun ma i sian langit tu jolongku. 6 Tingki hupareso manang aha isina, huida ma angka binatang siopat pat, binatang liar, binatang na manginsir dohot angka pidong na martonga-tonga langit. 7 Dung i hubege ma muse soara na mandok tu ahu, ‘Hehe ma ho Petrus, seat jala pangan ma i!’ 8 Alai ningku ma, ‘Ndang olo ahu Tuan! Ai ndang hea dope huallang sipanganon na ramun dohot na so diloas allangon mangihuthon patik.’ 9 Alai tarbege ma muse soara i mandok, ‘Unang be dok ramun naung ias di Debata.’ 10 Tolu hali ma masa songon i, dung i tarhindat ma muse abit i tu langit. 11 Laos di tingki i, nunga sahat tolu halak baoa tu jabu inganannami tading. Disuru do nasida sian Kaesarea mandapothon ahu. 12 Dung i dipaboa ma tu ahu marhite tondi parbadia asa unang pola ganggu rohangku laho rap dohot nasida. Rap borhat do ahu dohot dongan sahaporseaon na onom on jala masuk tu jabu ni baoa i.
13 “Dipaboa baoa i ma tu hami, diida ibana jongjong suru-suruan di jabuna jala didok ma tu ibana, ‘Suru ma halak tu Joppe mangalapi si Simon na laos digoari si Petrus. 14 Paboaonna ma tu ho songon dia asa malua ho dohot sude keluargam.’ 15 Alai tingki mulai dope ahu mangkatai tu nasida, songgop ma tondi parbadia tu nasida, songon na masa tu hita di mulana i. 16 Gabe huingot ma hata ni Tuan na mandok, ‘Aek do dididihon si Johannes tu hamu, alai didihononku ma tu hamu tondi parbadia.’ 17 Alani i, tung margogo ma ahu mangambati Debata? Ai nunga dilehon Ibana silehon-lehon songon naung nilehonna tu hita angka na porsea tu Tuan Jesus Kristus.”
18 Dung dibege nasida i, gabe hohom ma nasida. Dipuji ma Debata, ninna ma, “Dilehon Debata do hape tingki tu angka bangso na asing asa muba jala asa mangolu nasida.”
19 Dung hona bunu si Stepanus, masa ma hasusaan tu angka sisean. Gabe marserak ma nasida tu Penisia, tu Siprus, dohot tu Antiokia. Alai holan tu halak Jahudi do nasida marbarita. 20 Jala adong ma deba sisean na sian Siprus dohot Kirene na ro tu Antiokia. Dibaritahon nasida ma barita na uli taringot tu Tuan Jesus tu halak na marbahasa Junani. 21 Diurupi Jahowa do nasida, gabe lam godang ma na porsea jala diihuthon nasida ma Tuan i.
22 Sahat ma barita taringot tu nasida tu huria na di Jerusalem. Gabe disuru nasida ma si Barnabas tu Antiokia. 23 Dung sahat ibana disi, diida ibana ma asi ni roha ni Debata na mansai balga i tu angka dongan na disi. Gabe las ma rohana jala dipatogu ma roha ni nasida sude, asa marsihohot nasida tu Tuan i sian nasa roha. 24 Sahalak na burju do si Barnabas, togu do haporseaonna jala gok tondi parbadia. Ujungna, lam torop ma na tamba gabe sisean ni Tuan i. 25 Dung i borhat ma si Barnabas tu Tarsus jala dilului ibana ma si Saulus di sude inganan. 26 Dung jumpangna si Saulus, diboan ma ibana tu Antiokia. Saleleng sataon ma nasida rap dohot huria na disi, jala torop do halak diajari nasida. Marhite tudu-tudu ni Debata, di Antiokia ma parjolo sahali angka sisean i digoari Kristen.
27 Di tingki i, ro ma angka panurirang sian Jerusalem tu Antiokia. 28 Adong ma sian nasida na margoar si Agabus. Marhite panogu-noguon ni tondi parbadia, disurirangkon ibana ma na laho masa haraparon di liat portibi on. Jala tutu do i masa di tingki pamarentaon ni si Klaudius. 29 Dung i, sapandapot ma angka sisean i papunguhon silehon-lehon mangurupi angka dongan na di Judea, hombar tu na tarbahen ni nasida be. 30 Dung dipapungu nasida i, dilehon ma i tu angka sintua marhite si Barnabas dohot si Saulus.