Ulaon ni Apostel

4 Tingki mangkatai dope si Petrus dohot si Johannes tu natorop i, ro ma angka malim, pamimpin ni bagas joro, dohot angka halak Saduse mandapothon nasida. 2 Jut do roha ni nasida ala diajari sisean na dua i natorop i jala tangkas dipaboa nasida taringot tu haheheon ni Jesus sian na mate. 3 Ditangkup nasida ma si Petrus dohot si Johannes jala dibahen ma nasida tu penjara sahat tu marsogotna i, ai nunga botari tingki i. 4 Alai torop do sian angka na manangihon hata ni nasida i gabe porsea. Gabe adong ma hira-hira 5.000 baoa godang ni nasida.

5 Marsogotna i marpungu ma angka pamimpin ni nasida, angka pangituai dohot angka siboto surat di Jerusalem, 6 rap dohot si Hannas malim kepala, si Kayapas, si Johannes, si Aleksander dohot sude keluarga ni malim kepala i. 7 Dipajongjong ma si Petrus dohot si Johannes di tonga-tonga ni nasida jala disungkun ma, “Marhite huaso manang marhite goar ni ise do hamu mangulahon on?” 8 Dung i gok tondi parbadia ma si Petrus, ninna ma tu nasida,

“Hamu angka pamimpin dohot angka pangituai. 9 Molo naeng paresoonmuna hami sadari on alani na denggan na hubahen hami tu halak na lumpu on, jala naeng botoonmuna ise na mambahen malum ibana, 10 hupaboa hami ma tu hamu dohot tu sude halak Israel, di bagasan goar ni Jesus Kristus halak Nasaret i do malum ibana jala jongjong di tonga-tongamuna. Ibana do Jesus na niuhummuna di sada hau alai nunga dipahehe Debata ibana sian na mate. 11 Ibana do ‘batu na binolongkon ni angka tukangmuna, alai nunga gabe batu parsuhi-suhi na rumingkot* ibana’. 12 Asing ni i, holan di bagasan ibana do adong haluaon, ai ndang adong goar na asing dilehon tu jolma di toru ni langit na boi paluahon hita.”

13 Tingki diida nasida habaranion ni si Petrus dohot si Johannes, tarlumobi dung diboto na so parsingkola* nasida na dua, gabe longang ma nasida. Gabe diboto ma na rap do nasida na dua dohot Jesus najolo. 14 Ala diida nasida jongjong halak naung dipamalum i rap dohot sisean na dua i, ndang tardok ni nasida be manang aha. 15 Gabe disuru ma na tolu halak i kaluar sian inganan ni Sanhedrin* i, dung i masisungkunan ma nasida, 16 ninna ma, “Aha ma na ingkon bahenonta tu halak i? Ai tangkas do masa tanda halongangan* marhite nasida, sude do halak di Jerusalem mamboto i, jala ndang boi dohononta i ndang tutu. 17 Alani i, asa unang lam rarat barita i, taancam ma nasida jala taorai ma asa unang mangkatai be nasida tu angka halak mamangke goar i.”

18 Dung i dijou nasida ma sisean na dua i, diorai ma nasida mangkatahon manang mangajarhon manang aha pe marhite goar ni Jesus. 19 Dialusi si Petrus dohot si Johannes ma nasida, “Hamu sandiri ma na manontuhon, dia do na sintong di adopan ni Debata, manangihon hamu do manang manangihon Debata? 20 Alai ndang tarbahen hami so mangkatahon taringot tu na niida dohot na binegenami.” 21 Dung i, dipalua nasida ma si Petrus dohot si Johannes dung diancam. Ai ndang dapot ni nasida manang aha pe na mambahen sisean na dua i patut diuhum. Jala mabiar do nasida tu angka natorop i, ai sude do nasida mamuji Debata alani na masa i. 22 Nunga lobi sian 40 taon umur ni halak na dipamalum marhite tanda halongangan* i.

23 Dung dipalua, laho ma sisean na dua i mandapothon angka sisean na asing. Dipaboa nasida ma na nidok ni angka malim kepala* dohot angka pangituai tu nasida. 24 Mambege i, rap martangiang ma nasida tu Debata, ninna ma,

“Ale Tuan Natumimbul, ho do na manompa langit, tano, laut dohot sude isina, 25 jala ditogu-togu tondi parbadiam do naposom si Daud ompunami mandok, ‘Boasa gabe muruk angka bangso jala angka na so marguna dipingkirhon angka jolma? 26 Mangarade do angka raja di tano on jala marsada do angka na marhuaso* laho mangalo Jahowa dohot mangalo na pinillitna i.’* 27 Sasintongna nunga marpungu di kota on si Herodes, si Pontius Latus, angka halak sian bangso na asing rap dohot angka halak Israel laho mangalo Jesus naposom na badia i, na pinillitmi 28 laho mangulahon naung tinontuhon ni tanganmu dohot lomo ni roham. 29 On pe ale Jahowa, parrohahon ma ancaman ni nasida jala lehon ma habaranion tu angka naposom on, asa boi tongtong paboahon hatami. 30 Surdukkon ma tanganmi laho pamalumhon jala bahen ma angka tanda halongangan* marhite goar ni Jesus naposom na badia i.”

31 Dung mangelek-elek nasida tu Debata,* humutur ma inganan ni nasida marpungu. Sude ma nasida digohi tondi parbadia, dung i gabe barani ma nasida mangkatahon hata ni Debata.

32 Saroha jala sapingkiran ma sude na porsea i jala ndang adong sian nasida na mandok holan ampunana do na adong di ibana, ai rap nampunasa do nasida di saluhutna. 33 Marhite cara na denggan, tongtong ma dipaboa angka apostel i taringot tu haheheon ni Tuan Jesus jala godang situtu do pasu-pasu* ni Debata tu nasida. 34 Ndang adong sian nasida na hurangan. Ai molo adong nampuna ladang manang jabu, digadis do i jala diboan do tuhorna i, 35 laho dipasahat tu angka apostel. Dung i, dibagihon ma i tu ganup halak hombar tu na porlu di nasida. 36 Adong ma sahalak Lepi na marharoroan sian Siprus na margoar si Josep, jala digoari angka apostel do ibana si Barnabas (lapatanna, “Anak ni Pangapulion”), 37 digadis ibana ma ladangna jala dilehon do tuhorna i tu angka apostel.