Rom

11 Husungkun ma hamu muse, na so dijalo Debata be naposona? Ndang songon i! Ai ahu pe, halak Israel do ahu, pinompar ni si Abraham sian marga Benjamin. 2 Ndang na so dijalo Debata naposona, i ma naposona na parjolo sahali na pinillitna. Na so diboto hamu do ayat na mandok taringot tu si Elia na mangalu-alu tu Debata taringot tu halak Israel? 3 Ai didok si Elia do, “Ale Jahowa, nunga dibunu nasida angka panurirangmi, jala nunga dirumpakhon angka langgatanmi. Holan ahu nama na mangolu. Jala saonari, marsitutu do nasida naeng mambunu ahu.” 4 Alai aha ma didok Debata tu si Elia? “Adong dope di tonga-tonga ni bangsongki 7.000 halak nai na so olo marsomba tu Baal.” 5 Dos songon i ma, saonari pe adong dope halak Israel na tading, na pinillit ni Debata alani asi ni rohana na mansai balga i. 6 Alani i, dipillit do nasida alani asi ni roha ni Debata na mansai balga i, ndang alani parniulaon ni nasida. Molo alani parniulaon do nasida dipillit, ndang i be asi ni roha ni Debata na mansai balga i.

7 Antong songon dia ma dohononta? Ndang dapot ni halak Israel be na niluluan ni nasida. Alai gabe halak na tarpillit i do na mandapot i. Na deba nai dipajogal nasida do rohana. 8 Songon na nidok ni na tarsurat i, “Dibahen Debata do nasida modom renges.* Dilehon Debata do tu nasida mata na so boi marnida dohot pinggol na so boi marbinege sahat tu saonari.” 9 Didok si Daud do muse, “Sai gabe jorat ma pesta ni nasida i, gabe tartuktuk ma nasida bahenon ni i, jala gabe panguhuman ma i di nasida. 10 Bahen ma golap mata ni nasida asa unang boi nasida marnida. Jala bahen ma bungkuk tanggurung ni nasida.”*

11 Alani i, husungkun ma hamu muse, na tartuktuk do nasida? Manang na madabu do nasida jala ndang boi hehe? Ndang songon i! Alai na mardosa do nasida. Ujungna, boi ma bangso na asing malua, jala on ma na mambahen nasida mangiburu. 12 Saonari molo parohon pasu-pasu do dosa ni nasida tu portibi on, jala molo parohon pasu-pasu do tu bangso na asing ala lam moru nasida, tontu gumodang do pasu-pasu molo parsidohot nasida sude!

13 Saonari, mangkatai ma ahu tu hamu angka na ro sian bangso na asing. Ai disuru do ahu gabe apostel tu angka bangso na asing, jala arga do di ahu ulaonku marhobas tu Debata. 14 Marsitutu do ahu mambahen dongan sabangsongku mangiburu asa deba sian nasida boi malua. 15 Ai molo boi do angka halak na di portibi on gabe mardame dohot Debata ala nunga dibolongkon nasida, songon dia ma molo dijalo Debata nasida? Tontu gabe songon halak na mate na mulak mangolu ma i. 16 Molo badia do deba adonan na laho dipelehon songon hasil panen na parjolo, tontu badia ma sude adonan i. Ai molo badia do urat ni sada hau, badia do nang dangkana.

17 Alai molo diponggol do deba dangka ni hau jetun i, jala hamu, na songon dangka ni hau jetun tombak na dicangkok tu hau jetun i, gabe dohot ma hamu mandapot laba sian urat ni jetun i. 18 Unang ma ginjang rohamuna tu dangka i. Molo ginjang rohamuna, ingot ma, ndang hamu na mangalehon mangan urat i. Alai uratna i do na mangalehon hamu mangan. 19 Dohononmuna ma, “Diponggol do dangka ni hau i asa adong ingananku.” 20 Tutu do i! Diponggol do nasida ala ndang porsea. Alai hamu tongtong do adong ala porsea hamu. Alani i, unang ma ginjang rohamuna alai manat ma hamu. 21 Ndang alang roha ni Debata mamonggolhon dangka ni hau jetun i. Lam hamu ma, ponggolhononna do hamu molo dos pangalahomuna songon nasida. 22 Saonari, parrohahon ma songon dia burju ni Debata dohot panguhumanna. Diuhumi Ibana do angka dangka na madabu i, alai burju do Ibana tu hamu, molo tongtong hamu di bagasan haburjuonna i. Molo ndang, ponggolonna ma hamu. 23 Nasida pe, molo porsea do nasida, paulakon ni Debata do nasida muse tu ingananna hian. Ai boi do Debata mangulahon i. 24 Diponggolhon do hamu sian hau jetun tombak jala dicangkok tu hau jetun na di ladang, sasintongna ndang somal songon i diulahon. Alai molo boi do dibahen Debata songon i, tontu boi do paulakon ni Debata dangka ni hau jetun i tu hauna hian!

25 Ale angka dongan, asa unang didok rohamuna naung marbisuk hamu, lomo do rohangku naeng botoonmu rahasia na badia on: Deba sian halak Israel, jogal do rohana sahat tu na pungu sude bilangan ni angka halak na sian bangso na asing. 26 Jala marhite i do sude halak Israel boi malua. Songon na nidok ni na tarsurat i, “Ro do Sipalua sian Sion jala bahenonna ma pinompar ni si Jakkob muba sian hajahaton ni nasida. 27 Jala on ma parjanjianku tu nasida dung husesa dosa ni nasida.” 28 Tutu, gabe musu ni Debata do nasida ala ndang dijalo nasida barita na uli. Jala parohon laba do i tu hamu. Alai, alani janji ni Debata tu angka ompu ni nasida, dipillit do nasida gabe halak na hinaholonganna. 29 Alai ndang muba roha ni Debata tu silehon-lehon dohot panjouonna i. 30 Najolo, ndang dioloi hamu Debata. Alai saonari, ala mangalo do halak Jahudi i gabe dipatuduhon Debata ma tu hamu asi ni rohana. 31 Alani i, dipatuduhon Debata ma asi ni rohana tu hamu ala mangalo do nasida. Laos marhite i, boi ma dipatuduhon Debata asi ni rohana tu nasida. 32 Ai nunga dihurung Debata sude jolma di bagasan roha na so mangoloi, asa boi patuduhononna asi ni rohana tu sude jolma.

33 Tung godang situtu do pasu-pasu, bisuk, dohot parbinotoan ni Debata! Jala ndang adong na boi mangantusi panguhuman dohot angka ulaonna! 34 Songon na nidok ni na tarsurat i, “Ise ma na mamboto pingkiran ni Jahowa? Manang, ise ma na boi mangalehon poda tu Ibana?” 35 Manang, “Ise ma na hea mangalehon manang aha tu Ibana asa ingkon gantionna?” 36 Sian Ibana do saluhutna, marhite Ibana jala laho di Ibana. Hasangapon ma di Ibana saleleng ni lelengna. Amen.