1 Korint

4 Ingkon songon parhobas ni Kristus jala pangurus ni rahasia na badia* ni Debata ma nian hami idaon ni jolma. 2 Na ringkot sian sahalak pangurus, i ma ingkon haposan do ibana. 3 Nang pe diuhumi hamu ahu manang diuhumi pengadilan ni jolma, ndang parduli ahu disi. Sasintongna ahu pe, ndang huuhumi diringku. 4 Ai anggo na huboto, ndang adong na sala huulahon. Alai ndang na hudok sintong ahu. Jahowa do na manguhumi ahu. 5 Alani i, unang ma uhumi manang ise andorang so dapot dope tingkina, i ma andorang so ro Tuan i. Ai patuduonna do angka na buni na adong di na holom jala papataronna do sangkap ni roha ni jolma. Dung i, jaloon ni ganup halak ma pujian sian Debata.

6 Ale angka dongan, hupaboa pe sudena on asa parohon laba do tu hamu. Hubahen do diringku sandiri dohot si Apollos gabe sitiruon, asa marhite i boi antusanmuna aturan on, “Unang ma ulahon lobi sian na tarsurat i.” Asa unang ginjang rohamuna, jala asa unang dumenggan bahenonmuna sasahalak sian na asing. 7 Aha do na adong di hamu na mambahen hamu dumenggan sian na asing? Nda sian Debata do sude na adong di hamu? Molo Debata do na mangalehon sude na adong di hamu, boasa ginjang rohamuna gabe hira sian gogomuna i sude?

8 Nunga adong sude di hamu?* Ai nunga mamora hamu? Ai nunga mamarenta hamu gabe raja? Denggan ma i, lomo do rohangku hamu gabe raja, asa boi hami gabe raja rap dohot hamu. 9 Ninna rohangku, nunga dibahen Debata hami, i ma angka apostel gabe halak na parpudi masuk tu stadion asa diida sude halak. Ai nunga ditontuhon hami laho mate. Nunga gabe sitontonon hami di portibi on, sitontonon ni angka suru-suruan, dohot jolma. 10 Gabe na oto do hami alani Kristus i, alai anggo hamu gabe marbisuk do ala mangihuthon Kristus i. Gale do hami, alai gogo do hamu. Marlea do hami, alai sangap do hamu. 11 Male jala mauas do hami sahat tu saonari, dipungkuli, ndang godang abitnami,* ndang adong jabunami, 12 jala loja do hami mangula dohot tangannami. Tingki dileai hami, mamasu-masu do hami. Tingki dibahen na hansit tu hami, sabar do hami manaon i. 13 Tingki diparoa-roa goarnami, lambok do hualusi hami. Sahat tu saonari, songon sampah do hami di portibi on na binolongkon ni angka halak.

14 Husurathon pe on tu hamu, ndang na laho pailahon hamu. Alai na paingothon do ahu di hamu songon anakku na huhaholongi. 15 Nang pe adong 10.000 gurumuna* na mangajari hamu mangihuthon Kristus, alai otik do na gabe amamuna. Ai ahu do na gabe amangmuna di bagasan Kristus Jesus, na pasahathon barita na uli tu hamu. 16 Alani i, hujujui ma hamu asa tiru hamu ahu. 17 Alani i do husuru si Timoteus mandapothon hamu. Ibana do anakku na huhaholongi jala na marsihohot marhobas tu Tuan i. Ibana ma na paingothon hamu manang na songon dia ahu marhobas tu Kristus Jesus, songon na huajarhon di ganup huria.

18 Alai adong do deba sian hamu na gabe marginjang ni roha, ala dirimpu nasida ndang ro ahu mandapothon hamu. 19 Molo lomo do roha ni Jahowa, tibu do ahu ro mandapothon hamu. Naeng do idaonku angka siginjang roha i. Ndang na naeng mamboto pangkataion ni nasida, alai naeng do botoonku tutu manang ndang adong huaso ni Debata di nasida. 20 Ai Harajaon ni Debata ndang holan hata-hata, alai ingkon tarida do i sian parniulaon na patuduhon huaso ni Debata. 21 Antong na dia do pillitonmuna: ro ahu tu hamu mamboan sipasingot* manang ro ahu di bagasan holong dohot halambohon?