1 Tessalonik

5 Hamu angka dongan, ndang porlu be suraton tu hamu taringot tu tingki naung ditontuhon na laho masa i. 2 Ai nunga tangkas diboto hamu, songon haroro ni panangko di tingki borngin do haroro ni ari ni Jahowa i. 3 Tingki didok halak, “Dame do jala ndang adong be sihabiaran!” tompu ma diripashon nasida. Tompu do i masa dos songon pangae ni sahalak ina na laho tubu-tubuan.* Jala ndang tarpasiding ni nasida i. 4 Alai ndang di haholomon hamu angka dongan. Asa tingki ro ari i, unang tarsonggot hamu songon panangko na tardapot di tiur ni ari. 5 Ai anak ni hatiuron do hamu sude dohot anak ni arian, jala ndang anak ni borngin manang anak ni haholomon hita.

6 Alani i, unang ma tarpodom hita songon na asing, alai sai dungo ma hita jala tongtong ma jaga. 7 Ai di tingki borngin do halak modom, jala di tingki borngin do halak mabuk. 8 Anak ni arian do hita, alani i tongtong ma hita jaga. Tapangke ma haporseaon dohot holong songon baju partahanan. Jala tapangke ma pangkirimon tu haluaon songon tahuluk bosi. 9 Dipillit Debata pe hita ndang na laho diuhum, alai asa dapotta do haluaon marhite Jesus Kristus Tuanta i. 10 Mate do ibana humongkop hita asa boi hita mangolu rap dohot ibana, di na mangolu manang na mate* pe hita. 11 Alani i, masiurupan ma hamu jala patogu* ma na asing, songon naung diulahon hamu saleleng on.

12 Hupangido hami ma tu hamu ale angka dongan, parsangapi hamu ma angka na so marnaloja mangaradoti huria, na manguluhon hamu di ulaon ni Tuan i jala na paingothon hamu. 13 Mansai sangap ma bahen hamu tu nasida, jala haholongi hamu ma nasida alani ulaon ni nasida. Jala mardame ma hamu sama hamu. 14 Hujujui hami ma muse hamu angka dongan, pasingot* hamu ma angka na mangalo, apuli hamu ma na marsak,* urupi hamu ma angka na gale, jala sabar ma hamu tu sude halak. 15 Manat ma hamu, asa unang adong sian hamu na mambahen na jahat balos ni jahat tu manang ise pe. Alai tongtong ma bahen hamu na denggan tu dongan sahaporseaon dohot tu sude halak.

16 Tongtong ma hamu marlas ni roha. 17 Sai martangiang ma hamu. 18 Mandok mauliate ma hamu di saluhut. Ai i do na dihalomohon Debata sian hamu na marsada dohot Kristus Jesus i. 19 Unang ma ambati tondi parbadia karejo* di dirimuna. 20 Unang ma leas rohamuna tu angka surirang. 21 Uji hamu ma sasude, pastihon hamu ma dia na sintong jala tongtong ma ulahon na denggan. 22 Unang ma ulahon angka na jahat.

23 Anggiat ma Debata Silehon dame i mambahen hamu badia situtu. Anggiat ma denggan pangalahomuna, hangoluanmuna, dohot pamatangmuna, jala tongtong ma hamu badia sahat tu* haroro ni Tuan Jesus Kristus. 24 Ai haposan do Debata na manjou hamu jala pasautonna do i.

25 Ale angka dongan, sai tangiangkon hamu ma hami.

26 Denggan ma jalo hamu angka donganta sahaporseaon.

27 Di bagasan goar ni Tuan i, hupangido ma tu hamu, jahahon hamu ma surat on tu sude angka donganta.

28 Sai didongani asi ni roha ni Tuanta Jesus Kristus na mansai balga i ma hamu.