1 Timoteus

2 Parjolo sahali, hujujui ma hamu asa mambahen pangidoan, tangiang, dohot hamauliateon humongkop saluhut halak, 2 humongkop angka raja dohot angka na marhuaso. Asa dame ngolunta jala asa boi hita marsitutu mangulahon lomo ni roha ni Debata di saluhut parngoluonta. 3 Denggan do i jala hombar tu lomo ni roha ni Debata Sipalua hita. 4 Ai lomo do rohana asa malua saluhut jolma jala boi mandapot parbinotoan na bagas taringot tu hasintongan i. 5 Sada do Debata jala sada do parhitean ni Debata dohot jolma, i ma Kristus Jesus. Tingki jolma ibana, 6 dilehon do dirina gabe tobusan tu saluhut jolma. Taringot tusi ma na laho dipaboa di tingki naung ditontuhon. 7 Alani i do ahu dipillit gabe parbarita dohot apostel, laho mangajari angka bangso asa marhaporseaon nasida jala mamboto hasintongan. Sintong do na hudok on, ndang margabus ahu.

8 Alani i dipangido rohangku do tu angka baoa di ganup inganan, asa tongtong nasida badia jala diangkat tanganna tingki martangiang, ndang mardongan muruk dohot parbadaan. 9 Songon i ma nang angka borua, dipangke ma pangkean na tama mardongan toruk ni roha dohot bisuk. Unang ma dipabagak-bagak dirina marhite mandandani obuk, mamangke mas, mutiara, manang pangkean na mansai arga. 10 Alai dipatuduhon ma i marhite parniulaon na denggan, ai i do na tama tu angka borua na manomba Debata.

11 Hohom ma angka borua mardongan unduk ni roha tingki marsiajar di huria. 12 Ndang huloas borua mangajari manang mangarajai baoa. Alani i tongtong ma ibana hohom. 13 Ai parjolo do si Adam ditompa,* dung i pe asa si Hawa. 14 Jala ndang si Adam na dioto-otoi,* alai borua i do na dioto-otoi jala gabe mardosa. 15 Alai molo marianakkon sahalak borua, ndang ulahononna be na jahat molo tongtong ibana di bagasan haporseaon, holong, bisuk, dohot habadiaon.