2 Timoteus
4 Dipillit do Kristus Jesus laho manguhumi na mangolu dohot na mate dung dipataridahon dirina dohot Harajaonna. Di jolo ni Debata dohot di jolona, huparentahon ma tu ho: 2 Baritahon ma hata ni Debata, marsitutu ma mangulahon i di tingki susa dohot di tingki sonang. Pinsang, pasingot jala podai ma halak na sala. Jala sabar ma ho mangulahon i songon sahalak guru na malo mangajari. 3 Ai na ro ma tingkina, ndang olo be halak manangihon ajaran na sintong. Alai ihuthonon ni nasida ma lomo ni roha ni nasida. Papunguon ni nasida ma angka guru na holan paboahon hata na tabo begeon ni nasida.* 4 Ndang olo be nasida manangihon hasintongan, alai angka cerita na so tutu nama diparrohahon nasida. 5 Alai anggo ho, jaga ma roham di sasude. Martahan ma ho manaon hasusaan. Ulahon ma ulaon ni parbarita na uli.* Jala, marhobas ma ho tu Debata sian nasa gogom.
6 Ai nunga diusehon ahu songon pelean siinumon, jala nunga jonok tingki haluaonku. 7 Nunga marsitutu ahu sian nasa gogongku, nunga marlojong ahu sahat tu ujungna, jala nunga huihuthon haporseaon i. 8 Sian saonari, nunga diparade sada mahkota* di ahu. Dilehon Tuan jala Panguhum na tigor i do mahkota sisongon i tu halak na mangulahon na sintong. Dilehon do i gabe upa di ahu di ari i. Alai ndang holan di ahu, dohot do tu sude halak na paimahon tingki dipataridahon ibana dirina.
9 Usahahon ma asa hatop ho ro mandapothon ahu. 10 Ai nunga ditadingkon si Demas ahu, ala dihaholongi ibana do portibi* on. Nunga laho ibana tu Tessalonik, si Kreskes tu Galatia, si Titus tu Dalmatia. 11 Holan si Lukas nama dison rap dohot ahu. Alap ma si Markus, dung i boan ma ibana tuson, ai boi do ibana mangurupi ahu di ulaonku marhobas tu Debata. 12 Alai, nunga husuru si Tikikus tu Epesus. 13 Molo ro ho tuson, boan ma baju panas na hutinggalhon di Troas di jabu ni si Karpus. Jala boan ma muse angka gulungan i, tarlumobi angka gulungan na sian kulit* i.
14 Godang do hasusaan dibahen si Aleksander tukang tombaga i tu ahu. Baloson ni Jahowa do i hombar tu pambahenanna. 15 Ho pe, manat ma ho maradophon ibana. Ai sogo hian do rohana tu barita na tabaritahon i.
16 Tingki hupartahanhon haporseaonku parjolo sahali di jolo ni parhuaso, ndang adong manang ise pe na mandongani ahu. Sude do nasida manadingkon ahu. Anggiat ma ndang dibaloshon Debata pambahenan ni nasida i.* 17 Alai jongjong do Tuan i di lambungku jala dipargogoi do ahu, alani i boi ma hupasahat barita na uli i sian nasa gogongku, asa sude bangso boi manangihon i. Jala dipalua do ahu sian baba ni singa. 18 Paluaon ni Tuan i do ahu sian sude hajahaton jala paluaonna do ahu asa sahat tu Harajaonna na di banua ginjang i. Hasangapon ma di ibana saleleng ni lelengna. Amen.
19 Pasahat ma tabengku tu si Priska, si Akuila dohot tu dongan sajabu ni si Onesiporus.
20 Tinggal do si Erastus di Korint jala hutadingkon do si Tropimus di Miletus ala marsahit ibana. 21 Usahahon ma asa ro ho andorang so ari ngali.*
Sahat ma tu ho tabe ni si Eubulus, si Pudes, si Linus, si Klaudia dohot tabe ni sude angka donganta sahaporseaon.
22 Anggiat ma dipasu-pasu Tuan i haburjuonmi. Sai didongani asi ni rohana na mansai balga i ma ho.