Jakobus

1 Sian si Jakobus, naposo ni Debata jala naposo ni Tuan Jesus Kristus mandapothon 12 marga na marserak di godang inganan.

Horas!

2 Hamu angka donganku, las ma rohamuna* molo masa tu hamu angka pangunjunan. 3 Ai diboto hamu do, boi do hamu togu molo nunga taruji haporseaonmuna. 4 Molo tongtong hamu togu, gabe sun denggan ma hamu di saluhutna jala ndang hahurangan manang aha pe.

5 Molo adong sian hamu na hurangan bisuk, tongtong ma i dipangido tu Debata jala lehononna do i tu ibana. Ai burju do Debata mangalehon tu sude halak jala ndang pailaonna nasida. 6 Tongtong ma i dipangido ibana di bagasan haporseaon jala unang ma ganggu rohana. Ai halak na ganggu rohana, dos do i songon galumbang ni laut na niullus ni alogo. 7 Unang ma dirimpu halak sisongon i, lehonon ni Jahowa manang aha tu ibana. 8 Ai halak na mardua roha do i jala ndang boi ditontuhon i manang aha siulaonna.

9 Marlas ni roha ma hamu angka dongan na pogos, ai nunga dipatimbo Debata hamu. 10 Marlas ni roha ma hamu angka dongan na mora, ala nunga dipatutoru hamu. Ai laho salpu do halak na mora songon angka bunga na di ladang. 11 Tingki binsar mata ni ari, malos ma suan-suanan i alani mohopna. Marurus ma angka bungana jala mago ma haulionna. Songon i ma halak na mora, na laho salpu do ibana rap dohot angka usahana.

12 Marlas ni roha ma halak na marsihohot nang pe adong pangunjunan. Ai molo tahan ibana diuji, jaloonna ma mahkota hangoluan* songon janji ni Jahowa tu halak na tongtong mangkaholongi Ibana. 13 Molo masa pangunjunan tu sasahalak, unang ma didok ibana, “Debata do na mangunjuni ahu.” Ai ndang boi unjunan Debata jala ndang diunjuni Ibana manang ise pe marhite na jahat. 14 Alai na tarunjun do ganup halak, ala ditarik jala dijorat sangkap-sangkapna sandiri. 15 Molo sai dipingkiri sangkap-sangkapna i, diulahon ma dosa.* Molo dung diulahon dosa, parohon hamatean ma i.

16 Ale angka dongan na huhaholongi, unang ma lilu hamu. 17 Sude silehon-lehon* na denggan jala na sun denggan sian banua ginjang do i ro. Turun sian Sitompa hatiuron i, na so olo muba songon parhusor ni bayangan.* 18 Hombar tu sangkapna, dilehon Ibana do tu hita hangoluan marhite hatana na sintong i. Dibahen Ibana do songon i tu hita, asa hita na parjolo dipillit sian na tinompana.

19 Ale angka dongan na huhaholongi, boto hamu ma on: Ganup halak ingkon hatop manangihon, manat mangkatai, lambat tarrimas. 20 Ai halak na tarrimas ndang diulahon i na sintong di jolo ni Debata. 21 Alani i, bolongkon hamu ma sude na ramun dohot sude pangalaho na jahat. Marhite serep ni roha, jalo hamu ma hata ni Debata na sinuanna tu bagasan rohamuna na boi paluahon hamu.

22 Unang paoto-oto hamu dirimuna marhite holan na manangihon hata i, alai ingkon ulahononmuna do hata i. 23 Ai halak na holan manangihon hata i alai ndang mangulahon, dos ma i songon halak na mangida bohina di kaca. 24 Diida ibana do dirina, dung i laho ma ibana jala pintor lupa songon dia rupana. 25 Alai halak na mamareso patik na sun denggan na parohon haluaon i jala na tongtong mambahen songon i, ibana ma halak na manangihon, na mangulahon jala na so mangkalupahon hata i. Marlas ni roha ma ibana ala diulahon i.

26 Molo adong na mandok di bagasan rohana sisomba Debata ibana, alai ndang dirajai* dilana, na paoto-otohon dirina do ibana disi jala ndang adong lapatanna ibana manomba Debata. 27 On do agama na so ramun jala na ias di jolo ni Debata Ama i: Mangurus na so marama so marina dohot na mabalu tingki marsitaonon nasida, jala na manjaga dirina asa unang diramuni portibi on.