1 Johannes

3 Ida hamu ma balga ni holong ni Ama i tu hita, digoari do hita anak ni Debata! Ai angka anak ni Debata do hita tutu. Alani i do ndang ditanda portibi on hita, ai ndang ditanda portibi on Ibana. 2 Hamu angka dongan na hinaholongan, anak ni Debata do hita saonari. Alai, ndang tangkas dope taboto manang na songon dia hita sogot. Na taboto, tingki dipataridahon Debata dirina, gabe songon Ibana ma hita. Ai idaonta ma manang na songon dia Ibana sasintongna. 3 Manang ise na mangkirim songon i tu ibana, dipabadia ma dirina, ai badia do ibana.

4 Manang ise na mangulahon dosa, na mangalanggar patik do i, ai mangalanggar patik do dosa i. 5 Diboto hamu do, na laho manesa dosanta do umbahen na ro* ibana. Ai ndang adong dosa di ibana. 6 Manang ise na tongtong marsada dohot ibana, ndang diulahon i dosa. Manang ise na mangulahon dosa ndang boi idaonna jala tandaonna ibana. 7 Hamu angka anakkonku, unang ma loas manang ise mangaliluhon hamu. Manang ise na mangulahon na sintong, na mangulahon lomo ni roha ni Debata do i, songon Jesus na mangulahon lomo ni roha ni Debata. 8 Manang ise na mangulahon dosa, sian Sibolis do ibana. Ai diulahon Sibolis do dosa sian mulana. Alani i do umbahen na ro Anak ni Debata, asa diripashon* do angka ulaon ni Sibolis.

9 Sude anak ni Debata ndang diulahon i dosa, ai di bagasan ni nasida do tondi parbadia.* Ndang diulahon nasida dosa, ai anak ni Debata do nasida. 10 Tarida do anak ni Debata dohot anak ni Sibolis sian on: Manang ise na so mangulahon na sintong manang na so mangkaholongi donganna, ndang sian Debata ibana. 11 Alani i, ingkon masihaholongan do hita, ai on do parenta na binegemuna sian mulana. 12 Unang ma songon si Kain hita na sian Sibolis* jala na mambunu anggina. Boasa dibunu ibana anggina? Ala na jahat do parniulaonna, alai sintong do parniulaon ni anggina.

13 Unang ma longang rohamuna angka dongan molo dihasogohon portibi on hamu. 14 Taboto do nunga mate hian hita, alai mangolu do muse hita saonari ala tahaholongi do donganta. Manang ise na so mangkaholongi angka donganna tongtong ma ibana di hamatean. 15 Manang ise na marsogo ni roha tu donganna pambunu do i. Jala diboto hamu do, ndang adong pambunu na mandapot hangoluan na saleleng ni lelengna. 16 Sian on do taboto holong i, ai dilehon Jesus Kristus do ngoluna humongkop hita. Alani i, ingkon talehon do ngolunta humongkop angka donganta. 17 Manang ise na adong di ibana, jala diida ibana adong donganna na hurangan, alai ndang olo ibana patuduhon asi ni rohana, songon dia ma boi dohononna na dihaholongi ibana Debata? 18 Hamu angka anakkonku, unang ma holan hata holong ni rohanta manang holan di pamangan, alai ingkon tarida do i sian pambahenan dohot sian roha na ias.

19 Marhite i, taboto ma na sian hasintongan i do hita jala pos ma rohanta na dihaholongi Debata do hita. 20 Nang pe diuhumi rohanta hita, taingot ma umbalga do Debata sian rohanta jala diboto ibana do saluhutna. 21 Hamu angka dongan na hinaholongan, molo ndang diuhumi rohanta hita, ndang mabiar be hita mangkatai tu Debata. 22 Jaloonta do manang aha na tapangido sian Ibana, ai taoloi do sude parentana jala taulahon do lomo ni rohana. 23 Sasintongna on do parentana: ingkon porsea do hita tu goar ni Anakna Jesus Kristus i, jala masihaholongan songon parentana tu hita. 24 Asing ni i, manang ise na mangoloi parentana, tongtong ma ibana marsada dohot Debata, jala Debata marsada dohot ibana. Marhite tondi parbadia na nilehonna tu hita, taboto ma na tongtong do Debata marsada dohot hita.