1 Johannes
5 Manang ise na porsea Jesus i do Kristus, anak ni Debata do ibana. Manang ise na mangkaholongi Debata, haholonganna do nang angka anak ni Debata. 2 Sian on do taboto na tahaholongi angka anak ni Debata, i ma molo tahaholongi Debata jala taoloi parentana. 3 Ai on do holong ni roha tu Debata, i ma molo taoloi angka parentana jala ndang maol mangulahon angka parentana i. 4 Ai sude anak ni Debata boi do manaluhon portibi on. Haporseaonta i do na manaluhon portibi on.
5 Ise do na manaluhon portibi on, ia so ibana na porsea Jesus i Anak ni Debata? 6 Jesus Kristus do na ro marhite aek dohot mudar, ndang holan marhite aek, alai marhite aek dohot mudar do. Tondi parbadia do na paboahon i, ai hasintongan do na pinaboa ni tondi parbadia. 7 Adong tolu na paboahon: 8 tondi parbadia, aek, dohot mudar. Dos do na pinaboa ni na tolu i.
9 Tahaporseai do na pinaboa ni jolma alai umbalga do na pinaboa ni Debata. Ai on do na pinaboa ni Debata, dipaboa Ibana do taringot tu Anakna. 10 Manang ise na porsea tu Anak ni Debata, adong do di bagasan rohana na pinaboa ni Debata. Alai manang ise na so porsea tu Debata, dibahen ibana do Debata pargabus. Ai ndang porsea ibana tu na pinaboa ni Debata taringot tu Anakna. 11 On do na pinaboa ni Debata: Dilehon Ibana do hangoluan na saleleng ni lelengna tu hita jala marhite Anakna i do tajalo hangoluan i. 12 Manang ise na manjalo Anak i dapotna do hangoluan. Alai manang ise na so manjalo Anak ni Debata ndang dapotna hangoluan.
13 Husurat do on tu hamu angka na porsea tu goar ni Anak ni Debata, asa diboto hamu naung dapotmuna do hangoluan na saleleng ni lelengna. 14 On do pos ni rohanta* tu Debata: Manang aha na tapangido hombar tu lomo ni rohana, tangihononna do hita. 15 Molo taboto do na tangihononna manang aha na tapangido tu Ibana, taboto ma dapotta do i. Ai nunga tapangido i tu Ibana.
16 Molo diida sasahalak diulahon donganna dosa na so parohon hamatean, ingkon tangiangkononna do donganna i. Lehonon ni Debata ma tu ibana hangoluan. Ai lehonon ni Debata do hangoluan tu halak na mangulahon dosa na so parohon hamatean. Alai adong do dosa na parohon hamatean, jala ndang hudok asa ditangiangkon dosa sisongon i. 17 Dosa do sude ulaon na jahat, alai adong do dosa na so parohon hamatean.
18 Taboto do, ndang ulahonon ni angka anak ni Debata dosa, ai jagaon ni Anak ni Debata* do nasida. Jala ndang boi jamaon ni Sibolis* nasida. 19 Taboto do, na sian Debata hita. Alai di bagasan huaso ni Sibolis* do saluhut portibi on. 20 Nang pe songon i, taboto do naung ro Anak ni Debata jala nunga dilehon tu hita pangantusion, asa taboto taringot tu Debata na sintong. Jala marsada do hita dohot Debata na sintong i marhite Anakna, Jesus Kristus. Ibana do Debata na sintong jala haroroan ni hangoluan na saleleng ni lelengna. 21 Hamu angka anakkonku, padao hamu ma dirimuna sian gana-ganaan.