Pangungkapon

9 Dung i dipalu suru-suruan na palimahon ma tarompetna.* Huida ma sada bintang naung madabu sian banua ginjang tu tano on. Dilehon do tu ibana kunci ni lombang na mansai bagas. 2 Dibungka ibana ma lombang na mansai bagas i. Gabe kaluar ma timus sian lombang i songon timus ni api na marsigorgor. Mangkolom ma mata ni ari dohot langit* alani timus i. 3 Kaluar ma angka sihapor* sian timus i jala turun tu tano on. Dilehon do huaso tu nasida songon huaso ni kalajengking* na di tano on. 4 Diorai do nasida manegai angka duhut-duhut* manang suan-suanan na asing manang angka hau, asing ni halak na so dibahen dope meterai ni Debata tu pardompahan ni nasida.

5 Ndang diloas angka sihapor i mambunu nasida, alai diloas do angka sihapor i mambahen na hansit tu nasida saleleng lima bulan. Na hansit na binahen ni sihapor i, dos songon hansit ni pangkilalaan ni sasahalak na didoit kalajengking.* 6 Di tingki i, dilului nasida do hamatean alai ndang dapot ni nasida. Naeng mate do nasida alai mandao do hamatean i sian nasida.

7 Songon angka hoda na naeng marporang do angka sihapor i. Adong do di ulu ni nasida na songon mahkota na sian mas jala bohi ni nasida songon bohi ni jolma. 8 Obuk ni nasida songon obuk ni borua jala ngingi ni nasida songon ngingi ni singa. 9 Adong do di andora ni nasida na songon baju partahanan na sian bosi. Soara ni habong ni nasida songon soara ni angka kareta hoda na laho marporang. 10 Adong do pandoit di ihur ni nasida songon pandoit ni kalajengking. Marhite ihur ni nasida i, marhuaso do nasida mambahen na hansit tu jolma saleleng lima bulan. 11 Raja ni nasida, i ma suru-suruan na manjaga lombang na mansai bagas i. Di bahasa Heber goarna Abdon* jala di bahasa Junani Apollion.*

12 Nunga salpu jea na parjolo. Alai dungkon i, adong dope dua nai jea na laho ro.

13 Dipalu suru-suruan na paonomhon ma tarompetna.* Dung i hubege ma soara sian suhi-suhi* ni langgatan na sian mas na di jolo ni Debata. 14 Didok soara i ma tu suru-suruan na paonomhon na maniop tarompet i, “Palua ma opat suru-suruan na tartali di Sunge Euprat na balga i.” 15 Dipalua ma opat suru-suruan i. Ai nunga diparade nasida laho mambunu sapartolu jolma jala nunga ditontuhon jam, ari, bulan, dohot taonna.

16 Na hubege, 200 juta ma godang ni tentara na marhoda i. 17 On ma na hubereng di parnidaan i taringot tu hoda dohot na hundul di hoda i: Adong do baju partahanan ni nasida. Warna ni baju partahanan ni nasida i ma na rara songon api, na balau dohot na hunik. Ulu ni hoda i songon ulu ni singa jala kaluar do api, timus, dohot barerang sian baba ni angka hoda i. 18 Hona bunu ma sapartolu ni jolma alani tolu bala, i ma api, timus, dohot barerang na kaluar sian baba ni nasida. 19 Huaso ni angka hoda i adong di babana dohot di ihurna. Songon ulok na marulu do ihur ni hoda i jala dipangke do ihurna i mambahen na hansit tu jolma.

20 Alai angka jolma na so hona bala i, tong do ndang muba nasida sian ulaon ni nasida. Sai disomba nasida do suru-suruan na jahat dohot angka gana-ganaan na sian mas, perak, tombaga, batu, nang hau. Hape ndang boi marnida, marbinege manang mardalan angka na sinombana i. 21 Alai ndang muba nasida sian dosa nasida, i ma mambunu, mangulahon ulaon hadatuon, mangulahon seks na so patut,* dohot manangko.