2 Samuel
14 Diboto si Joab anak ni si Seruya+ ma naung masihol Raja Daud tu si Absalom.+ 2 Disuru si Joab ma sasahalak tu Tekoa+ lao manjou sahalak borua na malo. Didok si Joab ma tu borua i, “Bahen ma ho songon halak na marsak ala ni na matean. Pakke ma abit goni* jala unang bahen miak tu dagingmu.+ Bahen ma ho songon sahalak borua naung leleng sai marsak. 3 Lao ma ho manjuppangi raja jala paboa ma songon on tu ibana.” Dung i, dipaboa si Joab ma na lao dokkonon ni borua i.
4 Lao ma borua na sian Tekoa i manjuppangi raja. Marsinggang ma ibana pola sahat bohina tu tano. Didok ibana ma, “Urupi ma au ale rajanami!” 5 Disukkun raja i ma, “Aha na masa?” Dialusi borua i ma, “Ale tuannami, nungnga mabalu au. Nungnga mate suamikku. 6 Adong do dua anak ni naposomon. Alai marbadai ma nasida di ladang jala dang adong na manolai. Gabe hona attuk ma na sada jala mate. 7 Nungnga mangamuk be sude keluargakku tu naposomon. Didok nasida do, ‘Pasahat ma tu hami anakmu na mambunu i, asa hupamate hami. Ai nungnga dipamate ibana adekna.+ Ikkon pamateonnami do ibana, nang pe holan ibana nama na lao mandapot parbagianan!’ Holan ibana nama anakku na mangolu, hape pamateon ni nasida ma ibana doshon na pamatehon gara ni api. Gabe dang adong be siboan goar ni suamikku jala dang adong be pinopparna na tading di tano on.”
8 Didok raja i ma tu borua i, “Mulak ma ho. Huurus pe parsoalanmi.” 9 Didok borua na sian Tekoa i ma tu raja, “Ale tuan rajanami, au dohot keluarga ni bapakku pe na martanggung jawab tu hasalaan ni anakki. Unang pola gabe tuan dohot akka anak ni tuan na lao gabe raja na martanggung jawab.” 10 Didok raja i ma, “Molo adong halak na mandok manang aha tu ho, boan ma ibana tu jolokku, asa unang diganggu ibana be ho.” 11 Didok borua i ma, “Ale tuannami, sai ingot ma Jahowa Debatam. Unang ma paloas halak na naeng mambalos i* pamatehon anakki.”+ Didok raja i ma, “Songon pastina Jahowa mangolu,*+ dang adong nanggo sada pe sian obuk ni anakmi na madabu tu tano.” 12 Didok borua i ma, “Ale rajanami, adong dope sada nai dohonokku. Paloas ma jo au paboahon i.” Didok raja i ma, “Paboa ma inang!”
13 Didok borua i ma, “Boasa ma dibahen tuan rugi naposo ni Debata?+ Molo sian hatam na tu au i, nungnga sala be tuan disi. Ai so diboan ho mulak anakmi.+ 14 Ai sude do hita ikkon mate. Songon aek na use do hita tu tano na so tarpapungu be muse. Alai dang dibuat Debata hosa ni jolma jala sai dipikkirhon Ibana do songon dia asa boi mulak sasahalak na dipalao sian jolona. 15 Ro pe au tuson lao mandokkon on do, ai mabiar do au tu akka halak. Alani i ma didok naposomon, ‘Hupaboa ma jo on tu raja i. Atik boha dioloi raja i pangidoakkon, 16 jala tangihononna naposona on. Anggiat dipalua ibana au dohot anakku na sasada i, sian akka halak na mangabbati hami mandapot parbagianan naung dilehon Debata tu hami.’+ 17 Ai didok roha ni naposomon do, ‘Anggiat ma dame rohakku dibahen raja i.’ Ai songon suru-suruan ni Debata na sittong i do raja i di au. Diboto ho do dia na denggan dohot dia na roa. Sai anggiat ma didongani Jahowa Debatam ho tuan.”
18 Didok raja i ma tu borua i, “Saonari, sukkunokku ma ho. Unang adong tabunihon sian au.” Didok borua i ma, “Dok ma rajanami.” 19 Didok raja i ma, “Ai si Joab do manuru ho mangulahon on sude?”+ Didok borua i ma, “Ale rajanami, songon pastina ho mangolu,* tutu do na nidokmi.* Ibana do na manuru au jala na mangajari mandok songon i tu ho. 20 Dibahen si Joab pe songon i, asa denggan do dipikkiri tuan taringot parsoalan on. Alai marbisuk do ho rajanami, dos songon suru-suruan ni Debata na sittong i. Diboto ho do sude na masa di tano on.”
21 Didok raja i ma tu si Joab, “Huoloi pe na nidokmi.+ Lao ma ho, alap ma si Absalom anakki.”+ 22 Marsinggang ma si Joab sappe hona bohina tu tano jala dipuji ibana ma raja i. Didok si Joab ma, “Sadari on, huboto ma na holong dope roham mangida au, ale rajanami. Ai dioloi ho do pangidoan ni naposomon.” 23 Borhat ma si Joab tu Gesur,+ jala diboan ibana ma mulak si Absalom tu Jerusalem. 24 Alai didok raja i ma, “Tu jabuna ma ibana boan mulak. Unang boan ibana tu jolokku.” Alani i, mulak ma si Absalom tu jabuna jala dang ro ibana manjuppangi raja i.
25 Sai dipuji-puji halak do si Absalom, ai ibana do na ungganteng di Israel. Dang adong nanggo saotik pe na hurang, mulai sian uluna sahat tu ujung ni patna. 26 Digusting si Absalom do obukna ganup ujung ni taon. Ai massai hapal do obukna jala borat dihilala. Molo mamakke batu timbangan ni istana,* hira-hira dua kilogram* ma borat ni obukna na digusting i. 27 Adong do tolu anak ni si Absalom+ jala sada boruna, goarna si Tamar, bagak situtu do boruna i.
28 Nungnga dua taon si Absalom tinggal di Jerusalem, alai dang hea dijuppangi ibana Raja Daud.+ 29 Dijou si Absalom ma si Joab asa diboan ibana manjuppangi raja i. Alai, dang olo ro si Joab. Dijou si Absalom ma muse si Joab alai tong do dang olo ro si Joab. 30 Ujungna didok si Absalom ma tu akka parkarejona, “Lao ma hamu manutung ladang ni si Joab. Di labbung ni ladangki do ladangna i. Tubu do nuaeng disi barli.”* Dung i, lao ma akka parkarejona i, ditutung nasida ma ladang ni si Joab i. 31 Ro ma si Joab tu jabu ni si Absalom. Didok ibana ma, “Boasa ditutung akka parkarejom ladangki?” 32 Didok si Absalom ma, “Husuru do halak manjuppangi ho asa lao ho mandok tu raja i, ‘Boasa pola boanonmu au mulak sian Gesur.+ Ai tumagon do au torus tinggal disan. Saonari pe, naeng lao dope au manjuppangi raja i. Molo adong na sala hubahen, lok ma dipamate raja i au.’”
33 Dung i, lao ma si Joab mandapotton raja jala dipaboa ibana ma hata ni si Absalom. Dijou raja i ma si Absalom. Ro ma si Absalom jala marsinggang ma ibana di jolo ni raja i, sappe sahat do bohina tu tano. Gabe diumma raja i ma si Absalom.+