2 Samuel
16 Dang sadia dao dung lao si Daud sian pussu ni dolok i,+ ro ma si Siba+ parkarejo ni si Mepiboset+ mandapotton ibana. Diboan ibana do sapasang halode* na mamboan 200 roti, 100 kue kismis, 100 kue ara dohot kue kurma, dohot anggur sagucci na balga.+ 2 Disukkun raja i ma tu si Siba, “Lao tu aha do boanonmu on sude?” Didok si Siba ma, “Akka halode on lao hundulan ni akka keluarga ni raja. Roti dohot parbue ni hau on lao allangon ni akka parkarejom jala anggur on lao inumon ni nasida ma molo dung loja di gurun.”+ 3 Didok raja i ma, “Ai didia si Mepiboset pahoppu* ni tuanmi?”+ Didok si Siba ma, “Di Jerusalem do ibana. Ai didok do, ‘Saonari, pilliton ni halak Israel nama au gabe raja songon oppungku.’”*+ 4 Didok raja i ma tu si Siba, “Saonari, di ho ma sude arta ni si Mepiboset.”+ Didok si Siba ma, “Mauliate ma rajanami. Marsomba ma au tu ho. Sai anggiat ma toktong lomo roha ni raja i mangida au.”+
5 Tikki sahat Raja Daud di Bahurim ro ma sahalak bawa mamburai ibana.+ Si Simei+ do goar ni bawa i, anak ni si Gera na sian keluarga ni si Saul. 6 Didangguri si Simei ma si Daud dohot sude parkarejona. Didangguri ibana do muse sude tentara dohot akka tentara na gogo na di kanan dohot na di kiri ni Raja Daud. 7 Diburai si Simei ma si Daud. Didok ibana do, “Lao ma ho! Lao ma ho! Pambunu do ho! Jolma na so hasea do ho! 8 Nungnga dihukum Jahowa be ho. Ai dibunu ho do keluarga ni si Saul jala dibuat ho do harajaon i sian ibana. Alani i, dilehon Jahowa ma harajaon i tu si Absalom anakmi. Saonari, susa ma ngolum ai pambunu do ho!”+
9 Dung i, didok si Abisai anak ni si Seruya+ ma tu raja i, “Ai boasa dipasombu ho biang na mate on+ mamburai ho rajanami?+ Paloas ma au, asa huponggol uluna i.”+ 10 Didok raja i ma, “Dang urusanmuna i, hamu akka anak ni si Seruya.+ Pasombu ma ibana mamburai au.+ Ai molo Jahowa do na manuru ibana+ mamburai au, ise ma na boi mangabbati?” 11 Didok si Daud ma muse tu si Abisai dohot tu sude parkarejona, “Haru anakku, mudarhu sandiri, naeng pamatehon au.+ Lam halak Benjamin on ma?+ Molo Jahowa do na manuru ibana, pasombu ma diburai ibana au! 12 Sai anggiat ma ditatap Jahowa au na dangol on.+ Sai dibahen Jahowa ma na denggan tu au, unang ma songon hata bura na didokna i sadari on.”+ 13 Torus ma mardalan si Daud dohot akka tentarana i turun sian dolok i. Alai sai diihutton si Simei do nasida sian pudi. Sai diburai ibana do nasida,+ didanggur ibana do batu tu nasida, jala disappatton do abu tu nasida.
14 Nungnga sahat be raja dohot sude halak na mangihutton ibana di inganan na tinuju ni nasida. Loja do nasida, alani i maradi ma nasida disi.
15 Di tikki i, nungnga sahat si Absalom dohot sude halak Israel na mangihutton ibana di Jerusalem. Jala rap dohot nasida do si Ahitopel.+ 16 Ro ma si Husai+ halak Arkhi+ ale-ale* ni si Daud i manjuppangi si Absalom. Didok ibana ma tu si Absalom, “Sai ganjang ma umur ni raja i!+ Sai ganjang ma umur ni raja i!” 17 Didok si Absalom ma tu si Husai, “Ai songon on do ho patuduhon holong ni roham* tu ale-alem? Boasa dang diihutton ho ibana?” 18 Didok si Husai ma tu si Absalom, “Dang ihuttonokku ibana. Ai manang ise halak na dipillit Jahowa, na dipillit bangso i, dohot na dipillit sude halak Israel, i do ihuttonokku. Halak na dipillit i do toktong ihuttonokku. 19 Hudok ma sahali nai: Ai ise be huroa sioloakku molo dang anak ni raja i? Songon carakku mangoloi bapakmu, songon i ma bahenokku mangoloi ho.”+
20 Didok si Absalom ma tu si Ahitopel, “Attong, boha do pandapotmu?*+ Aha do na ikkon taulahon?” 21 Didok si Ahitopel ma tu si Absalom, “Adong do ditinggalhon bapakmu akka gundikna mangurus istana.+ Ulahon ma seks dohot nasida.+ Dung i, botoon ni sude halak Israel ma naung lea dibahen ho bapakmi, jala gabe lam pos ma roha ni akka halak na mangihutton ho.” 22 Dipajongjong ma sada tenda di ginjang ni atap* ni istana.+ Mangulahon seks ma si Absalom disi dohot akka gundik ni bapakna,+ jala diida sude halak Israel do na binahenna i.+
23 Songon hata ni* Debata na sittong do poda ni si Ahitopel+ di tikki i. Sai diihutton si Daud dohot si Absalom do sude podana.