1 Raja-Raja
21 Dung salpu i, masa ma parsoalan taringot tu porlak anggur ni si Nabot halak Jisreel i.+ Di Jisreel do porlak anggur i, di labbung ni istana ni si Ahab Raja ni Samaria. 2 Didok si Ahab ma tu si Nabot, “Lehon ma porlak anggurmi tu au. Ai jonok do i tu istanakku, asa husuan disi akka sayur. Hulehon pe porlak anggur na dumenggan gattina. Manang molo lomo roham hutuhor pe i.” 3 Alai didok si Nabot ma tu si Ahab, “Dang mungkin hulehon tu ho tano parbagianan ni akka ompukku. Ai diorai Jahowa do i.”+ 4 Dung i mulak ma si Ahab tu jabuna. Marsak do ibana jala jut do rohana mambege alus ni si Nabot halak Jisreel i. Ai didok si Nabot do tu ibana, “Dang lehonokku tu ho tano parbagianan ni akka ompukku.” Dipapeak si Ahab ma tu podomanna alai sai tu tembok ma diida ibana. Jala dang olo ibana mangan.
5 Ro ma si Izebel+ istri ni si Ahab mandapotton ibana. Disukkun ma tu si Ahab, “Aha na niarsakkonmu* umbahen na so olo ho mangan?” 6 Dialusi si Ahab ma, “Songon on hudok tu si Nabot halak Jisreel i, ‘Lehon ma porlak anggurmi tu au, hutuhor pe i. Manang molo lomo roham, hulehon pe porlak anggur na dumenggan gattina.’ Alai didok ibana ma, ‘Dang lehonokku tu ho porlak anggurhi.’” 7 Didok si Izebel ma tu si Ahab, “Hehe ma ho, asa mangan. Unang be marsak ho. Hulehon pe porlak anggur ni si Nabot i tu ho. Kan ho do raja ni Israel!”+ 8 Jadi dibahen si Izebel ma akka surat mamakke goar ni si Ahab. Jala dibahen ibana ma materai ni si Ahab tu akka surat i.+ Dung i, dikirim ibana ma surat i tu akka pangituai*+ dohot tu akka na sangap na di huta ni si Nabot. 9 Songon on ma isi ni surat i, “Suru hamu ma akka halak marpuasa. Jala suru ma si Nabot hundul di jolo ni natorop i. 10 Suru ma muse dua bawa na so marguna hundul di jolo ni si Nabot. Jala suru hamu ma nasida mandok tu si Nabot,+ ‘Nungnga diburai ho Debata dohot Raja.’+ Dung i, boan hamu ma ibana tu luar ni kota, jala dangguri hamu ma ibana sappe mate.”+
11 Dibahen akka pangituai dohot akka na sangap na di huta ni si Nabot ma songon isi ni surat ni si Izebel i. 12 Disuru nasida ma akka halak marpuasa jala disuru ma si Nabot hundul di jolo ni natorop i. 13 Dung i ro ma dua bawa na so marguna jala hundul di jolo ni si Nabot. Di jolo ni natorop, didok nasida ma tu si Nabot, “Nungnga diburai ho Debata dohot Raja.”+ Dung i, diboan ma ibana tu luar ni kota, jala didangguri ma ibana sappe mate.+ 14 Dikirim akka pangituai dohot akka na sangap i ma surat tu si Izebel. Dipaboa nasida ma naung mate si Nabot didangguri.+
15 Tikki dibege si Izebel naung mate si Nabot didangguri, didok ibana ma tu si Ahab, “Nungnga mate be si Nabot halak Jisreel i. Lao ma ho, buat ma porlak anggurna na so nilehonna i tuhoronmu.”+ 16 Dung dibege si Ahab naung mate si Nabot, lao ma ibana mambuat porlak anggur ni si Nabot halak Jisreel i.
17 Alai didok Jahowa ma tu si Elia+ halak Tisbi i, 18 “Lao ma ho manjuppangi si Ahab, raja ni Israel na di Samaria.+ Naeng dibuat ibana do porlak anggur ni si Nabot, jala disi do ibana saonari. 19 Dokkon ma tu si Ahab, ‘On ma na nidok ni Jahowa, “Dung dipamate ho sasahalak,+ naeng buatonmu dope artana?”’*+ Dokkon ma muse tu si Ahab, ‘On ma na nidok ni Jahowa, “Apala di inganan ni biang mandilati mudar ni si Nabot, ikkon apala disi ma dilatan ni biang mudarmu.”’”+
20 Didok si Ahab ma tu si Elia, “Boi do dapotmu au ate, musukku!”+ Didok si Elia ma, “Ido. Songon on do didok Debata, ‘Ala sai diulahon ho na* jahat di jolo ni Jahowa,+ 21 parookku ma hasusaan tu ho. Pamateonku ma pinopparmu. Jala pamateonku ma sude bawa* sian pinoppar ni si Ahab,+ dohot ma i akka na undangol di Israel.+ 22 Bahenokku ma keluargam songon keluarga ni si Jerobeam+ anak ni si Nebat. Jala bahenokku ma keluargam songon keluarga ni si Baesa+ anak ni si Ahia. Ai nungnga muruk Au dibahen ho jala dohot do halak Israel mardosa dibahen ho.’ 23 Jala songon on ma didok Jahowa taringot tu si Izebel, ‘Allangon ni biang ma si Izebel di sada ladang na di Jisreel.+ 24 Manang ise sian keluarga ni si Ahab na mate di kota, allangon ni biang ma. Jala manang ise sian keluarga ni si Ahab na mate di luar ni kota, allangon ni pidong ma.+ 25 Ai dang adong halak na asing na songon si Ahab.+ Sai diulahon ibana do na* jahat di jolo ni Jahowa, ala dijujui si Izebel do ibana.+ 26 Diulahon si Ahab do ulaon na dihagigihon Debata. Ai disomba ibana do akka patung na dihagigihon* Debata. Ditiru ibana do halak Amori, naung dipalao Jahowa sian jolo ni halak Israel.’”+
27 Dung dibege si Ahab hata ni si Elia i, diribak ibana ma abitna jala dipakke ibana ma abit goni. Marpuasa ma ibana jala peak marabit goni. Dung i mardalan ma ibana huhut marsak. 28 Didok Jahowa ma muse tu si Elia halak Tisbi i, 29 “Diida ho do naung dipatutoru si Ahab dirina di jolokku?+ Ala nungnga dibahen ibana songon i, dang parookku be hasusaan i saleleng ngoluna. Di ngolu ni anakna pe parookku hasusaan tu keluargana.”+