1 Kronika
10 Marporang ma halak Palistim mangalo halak Israel. Godang ma halak Israel na dipamate di Dolok Gilboa.+ Alani i lari ma nasida sian halak Palistim. 2 Alai torus ma dilele halak Palistim si Saul dohot akka anakna. Dipamate nasida ma si Jonatan, si Abinadab, dohot si Malki-sua,+ i ma akka anak ni si Saul. 3 Lam borat ma parporangan i di si Saul. Diida tentara ni halak Palistim ma ibana, gabe dipanah ma ibana jala massai godang ma lukka ni si Saul.+ 4 Dung i, didok si Saul ma tu halak na mamboan sinjatana, “Sittak ma podangmi jala tikkam ma au, asa unang disiksa+ halak na so marsunat i au.” Alai, dang olo halak na mamboan sinjatana i mangulahon i. Mabiar situtu do ibana. Gabe dibuat si Saul ma podangna jala ditikkam ma dirina.+ 5 Dung diida siboan sinjatana i naung mate si Saul, ditikkam ibana ma dirina, gabe mate ma nasida. 6 Mate ma si Saul, anakna na tolu i, dohot sude keluargana na rap dohot ibana.+ 7 Diida halak Israel na di rura i ma naung lari akka tentara ni halak Israel. Diida nasida do muse naung mate si Saul dohot akka anakna. Gabe ditinggalhon nasida ma huta ni nasida. Ujungna, ro ma halak Palistim tusi jala tinggal ma nasida disi.
8 Marsogotna i, ro ma halak Palistim naeng mambuat pakkean dohot sinjata ni akka tentara naung mate i. Diida nasida ma bakke ni si Saul dohot bakke ni akka anakna di Dolok Gilboa.+ 9 Dibuat nasida ma ulu ni si Saul dohot akka sinjatana. Disuru nasida ma halak lao tu sude luat ni halak Palistim paboahon barita i. Dipaboa nasida ma i di inganan ni akka debata ni nasida+ dohot di jolo ni halak Palistim. 10 Dibahen nasida ma sinjata ni si Saul di inganan ni nasida manomba debata ni nasida. Jala digattukkon nasida ma ulu ni si Saul di jabu ni debata Dagon.+
11 Tikki dibege sude pangisi ni huta Jabes-gilead+ na binahen ni halak Palistim tu si Saul,+ 12 ro ma sude akka tentara na disi. Diboan nasida ma bakke ni si Saul dohot bakke ni akka anakna i tu Jabes. Dikuburhon nasida ma i di toru ni hau na balga na adong di Jabes.+ Jala marpuasa ma nasida saleleng pitu ari.
13 Ala dang setia si Saul tu Jahowa, mate ma ibana. Ai dang dioloi ibana hata ni Jahowa.+ Lao do ibana tu sahalak datu na boi makkatai tu halak na mate.+ 14 Dang Jahowa na disukkun ibana. Alani i, dibahen Debata ma ibana mate, jala dibahen ma si Daud anak ni si Isai gabe raja manggattihon ibana.+