1 Kronika

26 On ma akka punguan ni panjaga gerbang:+ Sian pinoppar ni si Kora, i ma si Meselemya+ anak ni si Kore pinoppar ni si Asap. 2 Anak siakkangan ni si Meselemya, i ma si Sakaria. Anakna paduahon, i ma si Jediael. Anakna patoluhon, i ma si Sebadia. Anakna paopatton, i ma si Jatniel. 3 Anakna palimahon, i ma si Elamit. Anakna paonomhon, i ma si Johohanan. Jala anakna papituhon, i ma si Eliho-enai. 4 Anak siakkangan ni si Obed-edom, i ma si Semaya. Anakna paduahon, i ma si Jehosabad. Anakna patoluhon, i ma si Joa. Anakna paopatton, i ma si Sahar. Anakna palimahon, i ma si Netaneel. 5 Anakna paonomhon, i ma si Ammiel. Anakna papituhon, i ma si Isasar. Jala anakna paualuhon, i ma si Peuletai. Ai dipasu-pasu Debata do si Obed-edom.

6 Akka anak ni si Semaya do pamimpin ni nasida na saompu. Ai gogo jala setia do nasida mangulahon tugas ni nasida. 7 Akka anak ni si Semaya, i ma si Otni, si Repael, si Obed, dohot si Elsabad. Adong do keluarga ni si Elsabad na margoar si Elihu dohot si Semakia. Nasida pe setia do mangulahon tugas ni nasida. 8 On ma akka anak ni si Obed-edom. Malo jala setia do nasida mangulahon tugas ni nasida, songon i nang anak ni nasida dohot haha anggi ni nasida. Adong do 62 pinoppar ni si Obed-edom. 9 Adong 18 anak dohot haha anggi ni si Meselemya.+ Setia do nasida mangulahon tugas ni nasida. 10 Anak ni si Merari do si Hosa jala adong do akka anak ni si Hosa. Si Simri do pamimpin ni nasida, nang pe dang ibana anak siakkangan. Ai bapakna do na mamillit ibana gabe pamimpin. 11 Si Hilkia ma na paduahon, si Tebalia na patoluhon, jala si Sakaria ma na paopatton. Adong 13 anak dohot haha anggi ni si Hosa.

12 Rap martugas di jabu ni Jahowa do akka pamimpin ni panjaga gerbang dohot haha anggi ni nasida. 13 Dung i diundi+ ma nasida lao manottuhon di gerbang na dia nasida martugas. Sude do nasida diundi, otik manang na godang nasida na saompu. 14 Dung dibahen undi, gabe tarpillit ma si Selemia martugas di gerbang sabola timur. Jala anakna si Sakaria martugas di gerbang sabola utara. Sahalak penasehat na marbisuk do si Sakaria. 15 Si Obed-edom ma na martugas di gerbang sabola selatan, jala dibahen ma akka anakna+ manjaga akka gudang. 16 Si Suppim dohot si Hosa+ ma na martugas di gerbang sabola barat. Jonok do gerbang i tu Gerbang Salehet na di labbung ni dalan nakkok-nakkohan. Dang dao punguan ni panjaga gerbang na sada tu punguan ni panjaga gerbang na asing. 17 Adong onom halak Lepi na martugas di sabola timur. Opat ma di sabola barat na martugas ganup ari. Opat ma di sabola selatan na martugas ganup ari. Jala dua ma na martugas di akka gudang.+ Adong do muse dua nai na martugas di labbung ni nasida. 18 Di terras na di sabola barat adong opat na martugas di dalan+ jala dua nai martugas di terras i. 19 On ma punguan ni akka panjaga gerbang na sian pinoppar ni si Kora dohot si Merari.

20 Halak Lepi na manjaga panimpanan ni arta di jabu ni Debata na sittong dohot na manjaga panimpanan ni arta naung dipabadia,*+ i ma si Ahia. 21 Sian pinoppar ni si Gerson, i ma si Jehieli pinoppar ni si Ladan. Si Jehieli+ do pamimpin ni pinoppar ni si Ladan na saompu. 22 Akka anak ni si Jehieli, i ma si Jetam dohot si Joel. Nasida ma na manjaga panimpanan ni arta di jabu ni Jahowa.+ 23 Sian pinoppar ni si Amram, pinoppar ni si Ishar, pinoppar ni si Hebron, dohot sian pinoppar ni si Usiel,+ 24 si Sebuel ma na manjaga akka gudang. Pinoppar ni si Gersom anak ni si Musa do si Sebuel. 25 Haha anggi ni si Sebuel sian pinoppar ni si Elieser,+ i ma si Rehabia,+ si Jesaya, si Joram, si Sikri, dohot si Selomit. 26 Si Selomit dohot akka haha anggina do na manjaga panimpanan ni arta naung dipabadia.+ Na pabadiahon akka arta i, i ma Raja Daud,+ pamimpin ni na sasaompu,+ pamimpin ni na sasaribu dohot na sasaratus, dohot akka pamimpin ni tentara. 27 Sian akka parporangan+ dohot sian akka bangso naung ditaluhon+ do dibuat nasida akka arta i. Dipabadia nasida ma i sude lao dipakke di jabu ni Jahowa. 28 Dijaga nasida do muse akka barang na dipabadia si Samuel na boi mandapot parnidaan i,+ na dipabadia si Saul anak ni si Kis, si Abner+ anak ni si Ner, dohot si Joab+ anak ni si Seruya.+ Si Selomit dohot haha anggina do na manjaga sude barang naung dipabadia i.

29 Akka halak na mandapot tugas na asing di luar jabu ni Debata, i ma si Hanania dohot akka anakna na sian pinoppar ni si Ishar.+ Nasida do na gabe akka pejabat dohot akka hakim+ di Israel.

30 Sian pinoppar ni si Hebron+ adong do si Hasabya dohot haha anggina, na godangna 1.700 halak. Setia do nasida mangulahon tugas ni nasida. Nasida do na gabe pengawas ni akka halak na martugas di sabola barat ni Sunge Jordan. Ai adong do disi akka halak na marhobas tu Jahowa dohot na marhobas tu raja. 31 Si Jeria+ do pamimpin ni na sasaompu dohot pamimpin ni pinoppar ni si Hebron. Di taon na paopatpuluhon si Daud mamaretta,+ dilului do halak na gogo jala na barani sian pinoppar ni si Hebron na adong di Jaser+ na di Gilead. 32 Adong ma 2.700 haha anggi ni si Jeria na sian pinoppar ni si Hebron. Nasida ma akka pamimpin ni na sasaompu. Jala setia do nasida mangulahon tugas ni nasida. Alani i, dibahen Raja Daud do nasida gabe pengawas ni marga Ruben, marga Gad, dohot satonga marga Manasse na mangulahon akka ulaon tu Debata na sittong dohot ulaon tu raja.