Job
13 “Nungnga diida matakku i sude,
Nungnga dibege pinggolhu i jala huattusi do i.
2 Huboto do na binotomuna i,
Dang talu au martimbakkon hamu.
3 Molo au, tumagon ma makkatai au tu Pargogo na So Hatudosan i.
Jala pasahatonku ma parsoalakku tu Debata.+
4 Diparoa-roa hamu do goarhu alani gabusmuna.
Akka pangubati na so marguna do hamu sude.+
5 Ai molo sip hian hamu,
Tarida ma na marbisuk hamu.+
6 Tangihon hamu ma jo hatorangankon,
Jala parrohahon hamu ma pangidoakkon.
7 Boasa margabus hamu lao mambela Debata,
Jala boasa manipu hamu lao marpihak tu Ibana?
8 Naeng marpihak do hamu tu Ibana,
Manang naeng urupanmuna do Debata na sittong pasaehon parsoalanna?
9 Autsura dipareso Debata hamu, adong ma na denggan dapotna sian hamu?+
Boi do oto-otoanmu Ibana songon na mangoto-otoi jolma?
10 Molo diulahon hamu gabus lao marpihak tu Debata jala ditabunihon hamu i+
Pasti do muruk Ibana tu hamu.
11 Tung so mabiar do hamu tu hasangaponna i?
Jala na so adong do biarmuna tu Ibana?
12 Dang marguna akka podamuna* i dos songon abu,
Jala dos songon perisai na sian tano liat do hatamuna i.
13 Sip ma jo hamu, asa makkatai au.
Manang aha pe na masa tu au, masa ma i!
14 Boasa ma pola hubahen dirikku marjea,*
Jala boasa ma ikkon martaru hosa au?
15 Nang pe dibunu Ibana au, toktong do au porsea tu Ibana.+
Patuduokku do di jolona na so marsala au.
17 Tangihon hamu ma jo hatakkon,
Jala parrohahon hamu ma jo na hudok on.
18 Nungnga rade au molo diboan parkarokkon tu pengadilan.
Ai huboto do, sittong do au.
19 Ise do na olo marsoal dohot au?
Molo holan na sip au mate ma au!*
20 Ale Debata, holan dua do na hupangido sian Ho,*
Asa unang martabuni au sian Ho:
21 Angkat ma tanganmu na borat on sian au,
Jala unang ma bahen au mabiar tu Ho.+
22 Jou ma au asa hualusi,
Loas ma au makkatai jala alusi ma au.
23 Aha do haroa dosakku dohot salakku?
Paboa jolo tu au aha do dosakku dohot salakku.
25 Dos songon bulung-bulung na niullus ni alogo do au,
Dos songon durame na koring do au.
Boasa ma dilele jala dipabiar-biar Ho au?
26 Sai disurat Ho do akka hata na so sittong taringot au,
Jala dibahen Ho do au susa alani dosakku tikki poso.
27 Dipasung Ho do pattu,
Sai dipareso Ho do sude lakkakku,
Jala diihutton Ho do bogas ni pattu.
28 Alani i nungnga songon barang na busuk bawa i,*
Songon abit na diallang ngitngit.