Job
23 Didok si Job ma mangalusi,
2 “Sadari on pe sai morong-orong dope au.+
Suda do gogokku ala sai marungut-ungut.
3 Autsugari ma huboto didia Debata!+
Lao do au tu ingananna i.+
4 Pasahatonku ma parsoalakku tu Ibana
Jala paboaokku ma na so marsala au.
5 Tangihonokku ma alusna
Jala huparrohahon ma na nidokna tu au.
6 Pakkeonna do gogona na massai balga i mangalo au?
Daong, tangihononna do au.+
7 Pasaeon ni halak na tigor marroha ma parsoalanna di jolo ni Debata,
Jala malua ma au saleleng ni lelengna bahenon ni Hakim na mangadili au.
8 Molo lao au tu timur, dang adong Ibana disi.
Jala molo lao au tu barat, tong do dang adong Ibana disi.
9 Molo karejo Ibana di sabola kiri, dang boi huida Ibana.
Jala molo mulak Ibana tu sabola kanan, tong do dang huida Ibana.
10 Alai diboto Ibana do lakkakku.+
Molo dung diuji Ibana au, gabe songon mas murni ma au.+
11 Manat do huihutton bogas ni patna,
Jala dang manirpang au sian dalanna.+
12 Dang hea hualo parettana.
Huulahon do na nidokna+ lobi sian na pinangidona.
13 Molo nungnga adong na ditontuhon Ibana, ise ma na boi mangalo Ibana?+
Molo nungnga adong sakkap ni rohana, pasautonna do i.+
14 Ai pasautonna do sude sakkapna tu au,
Jala godang dope na lao bahenonna tu au.
15 Alani i do dibahen Ibana au holsoan.
Molo hupikkiri Ibana, gabe mabiar do au.
16 Dibahen Debata do au marmetmet ni roha,
Jala dibahen Pargogo na So Hatudosan i do au mabiar.
17 Alai dang boi au sip bahenon ni na holom
Jala dang boi na holom manutup bohikku.