Jeremia
28 Laos di taon na sarupa, di mula ni pamarettaon ni si Sedekia+ raja ni Juda, i ma di bulan na palimahon di taon na paopatton, makkatai ma Panurirang Hanania anak ni si Azur na sian Gibeon+ di jabu ni Jahowa di jolo ni akka malim dohot sude rakyat, 2 “Songon on ma hata ni Jahowa Pamimpin ni Akka Tentara,* Debata ni Israel, ‘Paluaokku ma hamu sian raja ni Babel na mambahen hamu gabe hatoban.*+ 3 Nang pe nungnga diboan si Nebukadnesar raja ni Babel i sude parkakas na di jabu ni Jahowa tu Babel, alai di bagasan dua taon boanokku do i muse mulak tuson.+ 4 Jala boanokku ma muse mulak si Jekonia+ anak ni si Jehoyakim+ raja ni Juda dohot sude halak Juda naung diboan musu tu Babel.+ Boanokku ma nasida mulak tu inganan on. Ai paluaokku ma nasida sian raja ni Babel na mambahen nasida gabe hatoban,’* ninna Jahowa.”
5 Dung i makkatai ma Panurirang* Jeremia dohot Panurirang Hanania di jolo ni akka malim dohot di jolo ni sude rakyat na jongjong di jabu ni Jahowa. 6 Didok Panurirang Jeremia ma, “Amen!* Sai anggiat ma dipasaut Jahowa sude na nidokmi! Sai anggiat ma diboan Jahowa mulak sian Babel akka parkakas na di jabu ni Jahowa dohot sude akka halak na ditakkup. 7 Alai tolong ma jolo tangihon hata na lao hupaboa tu ho dohot tu sude rakyat on. 8 Nungnga godang dipaboa akka panurirang naung parjolo sian au dohot naung parjolo sian ho taringot tu luat dohot harajaon na balga, taringot tu porang, jea, dohot sahit na masa di godang inganan. 9 Molo adong panurirang paboahon na lao masa hadameon jala tutu saut hatana i, botoon ni jolma ma, na tutu ibana panurirang na sinuru ni Jahowa.”
10 Mambege hata i, dibuat Panurirang Hanania ma auga* na di rukkung ni Panurirang Jeremia. Jala diponggolhon ibana ma i.+ 11 Di jolo ni sude, didok si Hanania ma, “Songon on do hata ni Jahowa, ‘Di bagasan dua taon on, songon i ma carakku lao paluahon sude bangso sian tangan ni si Nebukadnesar raja ni Babel.’”*+ Dung i lao ma Panurirang Jeremia sian i.
12 Dung diponggolhon Panurirang Hanania auga na sian rukkung ni Panurirang Jeremia i, didok Jahowa ma tu si Jeremia, 13 “Lao ma ho jala dokkon ma tu si Hanania, ‘Songon on do hata ni Jahowa, “Nungnga diponggolhon ho auga na sian hau,+ alai ikkon gattionmu do i dohot auga na dibahen sian bosi.” 14 Ai songon on do hata ni Jahowa Pamimpin ni Akka Tentara, Debata ni Israel, “Bahenokku ma sude bangso gabe hatoban* jala tunduk tu si Nebukadnesar raja ni Babel. Ikkon dioloi nasida do ibana.+ Gari binatang buas na di tombak pe, nungnga hupatunduk tu ibana.”’”+
15 Dung i didok Panurirang Jeremia ma tu Panurirang Hanania,+ “Hanania, tangihon ma jolo hatakku! Dang na disuru Jahowa ho. Alai dibahen ho do sude rakyat on gabe porsea tu gabus na nidokmi.+ 16 Alani i, songon on ma hata ni Jahowa, ‘Bolokkonokku ma ho sian tano on. Jala di bagasan taon on ikkon mate do ho. Ai nungnga dijujui ho sude rakyat on lao mangalo Jahowa.’”+
17 Jadi mate ma Panurirang Hanania di bulan na papituhon di taon i.