Amos
7 Songon on ma parnidaan na dipatudu Jahowa Tuan Natumimbul i tu au: Ida ma diparo Ibana do sada sihapor* tikki mulai tubu suan-suanan di musim dingin.* Disuan do suan-suanan i dung dipotong ramba na di ladang ni raja. 2 Dung habis diallang akka sihapor i suan-suanan na di luat i hudok ma, “Ale Jahowa Tuan Natumimbul, sai sesa ma dosa ni bangsomon!+ Songon dia ma boi mangolu* pinoppar ni si Jakkob? Ai gale do nasida!”+
3 Gabe disolsoli Jahowa ma keputusanna i.+ Didok Jahowa ma, “Dang na lao saut i masa.”
4 Dipatudu Jahowa Tuan Natumimbul i ma muse parnidaan on tu au: Ida ma! Diparo Jahowa Tuan Natumimbul i ma api lao manghukum luat i. Gabe koring ma dibahen api i laut na bagas. Jala ditutung api i ma deba luat i. 5 Dung i hudok ma, “Ale Jahowa Tuan Natumimbul, unang be torusson on.+ Songon dia ma boi mangolu* pinoppar ni si Jakkob? Ai gale do nasida!”+
6 Gabe disolsoli Jahowa ma keputusanna i.+ Didok Jahowa Tuan Natumimbul i ma, “I pe, dang na lao saut i masa.”
7 Dipatudu Debata ma muse on tu au: Ida ma! Jongjong do Jahowa di labbung ni tembok na dibahen mamakke batu lot.* Jala ditiop Ibana do batu lot. 8 Didok Jahowa ma tu au, “Aha do na niidami Amos?” Hudok ma, “Sada batu lot.” Didok Jahowa ma, “Ida ma, bahenokku ma batu lot di tonga-tonga ni bangsokku Israel. Jala dang sesaokku be dosa ni nasida.+ 9 Na lao tarulang ma akka inganan panombaon* ni si Isak,+ jala na lao hancur ma akka inganan na badia appuna ni halak Israel.+ Dung i ro ma Au mangalo pinoppar ni si Jerobeam mamakke podang.”+
10 Dung i disuru Malim Amasia na sian Betel+ ma halak mandok songon on tu si Jerobeam+ raja ni Israel, “Nungnga marsakkap si Amos mangalo ho di tonga-tonga ni bangso on.+ Dang na lao martahan be akka halak di luat on molo dibege hatana i.+ 11 Ai songon on do didok si Amos, ‘Na lao mate do si Jerobeam alani podang. Jala na lao diboan do halak Israel gabe tawanan.’”+
12 Dung i didok si Amasia ma tu si Amos, “E halak na boi mandapot parnidaan, lao ma ho tu Juda. Paboa ma disi aha na lao masa jala disi ma ho mangalului siallangonmu.*+ 13 Alai sotung hea be ho ro tu Betel+ lao paboahon aha na lao masa. Ai inganan na badia do on di raja i,+ jala on do inganan panombaon ni harajaon.”
14 Dialusi si Amos ma si Amasia, “Dang panurirang* hian au, jala dang anak ni panurirang au. Alai parmahan do au+ jala mangurus* parbue ni hau ara. 15 Alai saonari, dang parmahan be au. Ai dijou Jahowa do au. Jala didok Jahowa do tu au, ‘Lao ma ho. Paboa ma tu bangsokku Israel aha na lao masa.’+ 16 Saonari tangihon ma hata ni Jahowa, ‘Didokkon ho do, “Unang be paboa manang aha na lao masa taringot Israel,+ jala unang be dok manang aha+ taringot pinoppar ni si Isak.” 17 Alani i songon on ma hata ni Jahowa taringot ho, “Gabe boru-boru na so hasea nama istrim di kota on. Akka anakmu dohot borum pe mate ma bahenon ni podang. Na lao dibagi-bagi ma tanom mamakke tali pangukkur jala mate ma ho di luat ni bangso na asing. Halak Israel pe, lao diboan nama gabe tawanan.”’”+